នៅថ្ងៃទី ១៣ ខែកញ្ញា ប្រធានគណៈកម្មការអឺរ៉ុប (EC) លោកស្រី Ursula von der Leyen បានអំពាវនាវឱ្យមានការបង្កើតក្រុមប្រឹក្សាអ្នកជំនាញ និងតំណាងក្រុមហ៊ុនបច្ចេកវិទ្យាទូទាំងពិភពលោក ដើម្បីដោះស្រាយបញ្ហាប្រឈមដែលបង្កឡើងដោយបច្ចេកវិទ្យា AI ។

 

រដ្ឋាភិបាលជុំវិញពិភពលោកកំពុងប្រឈមមុខនឹងបញ្ហាលំបាកនៃរបៀបគ្រប់គ្រងហានិភ័យដែលបង្កដោយ AI ចំពោះសង្គមដោយមិនអាចទប់ស្កាត់បានការផ្លាស់ប្តូរថ្មី និងការច្នៃប្រឌិត។ EU ក៏មានការព្រួយបារម្ភអំពីផលប៉ះពាល់នៃបច្ចេកវិទ្យានេះចំពោះការបោះឆ្នោតសភាអឺរ៉ុបនៅឆ្នាំក្រោយផងដែរ ។

 

ប្រមុខគណៈកម្មការអឺរ៉ុបលោកស្រី Ursula von der Leyen បានសង្កត់ធ្ងន់ថា ៖« អ្នកអភិវឌ្ឍន៍ប្រព័ន្ធបច្ចេកវិទ្យា អ្នកសិក្សា និងអ្នកជំនាញកំពូលៗរាប់រយនាក់នាពេលថ្មីៗនេះបានព្រមានអំពីហានិភ័យពី AI បន្ថែមពីលើហានិភ័យផ្សេងទៀតដូចជាជំងឺកូវីដ-១៩ និងសង្គ្រាមនុយក្លេអ៊ែរដែលអំពាវនាវឱ្យផ្តល់អាទិភាពដោះស្រាយហានិភ័យពី AI ដែលមានលក្ខណៈជាសកល»។

 

លោកស្រីស្នើឱ្យការបង្កើតក្រុមប្រឹក្សាអ្នកជំនាញ AI សកលជាមួយនឹងយន្តការប្រតិបត្តិការនេះ ស្រដៀងនិងក្រុមប្រឹក្សាអន្តររដ្ឋាភិបាលរបស់អង្គការសហប្រជាជាតិស្តីពីការប្រែប្រួលអាកាសធាតុ (IPCC) ដោយចេញរបាយការណ៍ដោយផ្អែកលើការស្រាវជ្រាវវិទ្យាសាស្ត្រ ដើម្បីវាយតម្លៃហានិភ័យ និងអត្ថប្រយោជន៍នៃ AI សម្រាប់មនុស្សជាតិ។

 

បើតាមលោកស្រី Ursula von der Leyen ការបង្កើតក្រុមប្រឹក្សាអ្នកជំនាញជាសាកលស្តីពី AI នឹងជួយផ្តល់ការឆ្លើយតបរហ័ស និងសម្របសម្រួលលើមាត្រដ្ឋានសកល ។ 

 

សហភាពអឺរ៉ុបស្ថិតនៅជួរមុខនៃកិច្ចខិតខំប្រឹងប្រែងដើម្បីគ្រប់គ្រង AI ហើយត្រូវបានគេរំពឹងថានឹងអនុម័តសេចក្តីព្រាងច្បាប់ដំបូងរបស់ពិភពលោកដើម្បីគ្រប់គ្រងបច្ចេកវិទ្យានៅចុងឆ្នាំនេះ៕