នៅថ្ងៃទី១៤ ខែកញ្ញា ធនាគារកណ្តាលអ៊ឺរ៉ុបបានសម្រេចចិត្តដំឡើងអត្រាការប្រាក់ដ៏សំខាន់របស់ខ្លួនជាលើកទី ១០ ដែលជាកម្រិតខ្ពស់បំផុតក្នុងកិច្ចខិតខំប្រឹងប្រែងដើម្បីប្រយុទ្ធប្រឆាំងនឹងអតិផរណា។

 

ECB បានបង្កើនអត្រាការប្រាក់សំខាន់ៗចំនួនបីរួមទាំងការផ្តល់អត្រាការប្រាក់ឡើងវិញដល់ ៤,២៥ភាគរយ អត្រាការប្រាក់បញ្ញើកើនដល់ ៤ភាគរយ និងអត្រាការប្រាក់ផ្តល់ប្រាក់កម្ចីដល់ ៤,៥ភាគរយដែលកម្រិតខ្ពស់ចាប់តាំងពីការចាប់ផ្តើមនៃប្រាក់អឺរ៉ូក្នុងឆ្នាំ ១៩៩៩។

 

ទោះបីជាមានការកើនឡើងអត្រាការប្រាក់ចំនួន៩ ជាប់ៗគ្នាក៏ដោយ អតិផរណានៅតែមានច្រើនជាងទ្វេដងនៃគោលដៅ ២ភាគរយដែលកំណត់ដោយ ECB ហើយមិនត្រូវបានរំពឹងថានឹងធ្លាក់ចុះដល់កម្រិតនេះក្នុងរយៈពេល ២ឆ្នាំខាងមុខឡើយ។

 

ECB ជឿជាក់ថាអតិផរណានឹងនៅតែខ្ពស់នាពេលអនាគតដ៏ខ្លីក្នុងកម្រិត ៥,៦ភាគរយឆ្នាំ២០២៣ និង ៣,២ភាគរយនៅឆ្នាំ ២០២៤ មុនពេលត្រជាក់មកវិញបន្តិចដល់ ២,១ភាគរយនៅឆ្នាំ ២០២៥។

 

លើសពីនេះទៀត ECB ក៏បានបន្ទាបការព្យាកររបស់ខ្លួនសម្រាប់កំណើនសេដ្ឋកិច្ចតំបន់ចាយប្រាក់អឺរ៉ូនៅរយៈពេល ៣ឆ្នាំខាងមុខ ក្នុងបរិបទនៃលក្ខខណ្ឌហិរញ្ញវត្ថុដ៏លំបាកដែលជះឥទ្ធិពលអវិជ្ជមានដល់តម្រូវការ និងការធ្លាក់ចុះនៃពាណិជ្ជកម្មអន្តរជាតិ។

 

បើតាមការព្យាកររបស់ ECB កំណើនសេដ្ឋកិច្ចក្នុងតំបន់នេះនឹងមាន ០,៧ភាគរយនៅឆ្នាំនេះ ១ភាគរយឆ្នាំក្រោយ និង១,៥ភាគរយនៅឆ្នាំ ២០២៥។ 

 

អ្នកវិភាគនិយាយថា ការដំឡើងអត្រាការប្រាក់នឹងទប់ស្កាត់អតិផរណាព្រោះវាអាចបង្អាក់ដល់ការខ្ចីប្រាក់ និងការចំណាយ ប៉ុន្តែក៏មានហានិភ័យចំពោះសកម្មភាពសេដ្ឋកិច្ចផងដែរ។

 

អ្នកបង្កើតគោលនយោបាយមើលឃើញថាការព្យាករឆ្នាំ ២០២៤មានសារៈសំខាន់ក្នុងការកំណត់ថាតើអតិផរណាដែលនៅតែលើសពី ៥ភាគរយដែលអាចត្រឡប់ទៅគោលដៅ ឬហានិភ័យនៃការជាប់គាំងនៅកម្រិតខ្ពស់ពេក។

 

កាលពី ១៤ខែមុន អត្រាការប្រាក់នៅក្នុងតំបន់ចាយប្រាក់អឺរ៉ូមានកម្រិតទាបបំផុតគឺ -០,៥ភាគរយដែលមានន័យថាធនាគារត្រូវបង់ថ្លៃសេវាដើម្បីដាក់ប្រាក់នៅធនាគារកណ្តាល៕