របាយការណ៍ថ្មីដែលចេញផ្សាយដោយ UNICEF និងធនាគារពិភពលោក នៅថ្ងៃទី១៣ ខែកញ្ញា បានលើកឡើងថា ជំងឺកូវីដ-១៩ បានធ្វើឱ្យកុមារជាច្រើនលើពិភពលោកបានធ្លាប់ក្នុងស្ថានភាពក្រីក្រខ្លាំង។ លទ្ធផលនៃការស្រាវជ្រាវនេះ បានបង្ហាញថា កុមារម្នាក់ក្នុងចំណោមកុមារ៦នាក់លើពិភពលោក បានរស់នៅជាមួយប្រាក់ប្រមាណ​២,១៥ដុល្លារប៉ុណ្ណោះក្នុងមួយថ្ងៃ។ 
 

«វិបត្តិជាច្រើនរួមបញ្ចូលគ្នាពីផលប៉ះពាល់នៃជំងឺ​កូវីដ-១៩ បម្រែ​បម្រួលអាកាសធាតុ និងវិបត្តិសេដ្ឋកិច្ច បានបញ្ឈប់ការវិវឌ្ឍនៃការជួយកុមារ ហើយបានធ្វើឱ្យកុមាររាប់លាននាក់ស្ថិតក្នុងភាពក្រីក្រខ្លាំង»។ លោកស្រី Catherine Russell នាយិកាប្រតិបត្តិ UNICEF បាននិយាយនៅក្នុងសេចក្តីថ្លែងការណ៍មួយបែបនេះ។ បើតាមលោកស្រី Catherine Russell លទ្ធផលនៃរបាយការណ៍នេះ​ បាន​ជះ​ឥទ្ធិពល​ដល់​ការងារសម្រេចគោលដៅ​របស់​អង្គការ​សហ​ប្រជាជាតិ​ក្នុង​ការ​លុប​បំបាត់​ភាព​ក្រីក្រ​បំផុត​របស់​កុមារត្រឹម​ឆ្នាំ​២០៣០។
 

លើសពីនេះ លោក Luis-Felipe Lopez-Calva នាយកផ្នែកភាពក្រីក្រនិងសមធម៌របស់ធនាគារពិភពលោក បានបន្ថែមក្នុងសេចក្តីថ្លែងការណ៍មួយថា កុមារប្រមាណ៣៣៣លាននាក់រស់នៅក្នុងភាពក្រីក្រខ្លាំង ហើយបានបាត់បង់សិទ្ធិជាមូលដ្ឋាន សេចក្តីថ្លៃថ្នូរ ឱកាស និងក្តីសង្ឃឹមផងដែរ។
 

របាយការណ៍នេះ បានរកឃើញថា ៤០ភាគរយនៃកុមារដែលរស់នៅអនុតំបន់សាហារ៉ាអាហ្រ្វិក កំពុងរស់នៅក្នុងស្ថានភាពក្រីក្រខ្លាំង ដែលជាភាគរយខ្ពស់បំផុតធៀបនឹងតំបន់ដទៃក្នុងពិភពលោក​។ កំណើនប្រជាជនយ៉ាងឆាប់រហ័ស ជំងឺកូវីដ-១៩និងគ្រោះមហន្តរាយទាក់ទងនឹងអាកាសធាតុ បានធ្វើឱ្យកុមារកាន់តែធ្លាក់ក្នុងភាពក្រីក្រជាងមុននៅអនុតំបន់សាហារ៉ាអាហ្រ្វិកក្នុងប៉ុន្មានឆ្នាំថ្មីៗនេះ ក៏ដូចជាតំបន់ផ្សេងទៀតក្នុងពិភពលោក។ 
 

ទន្ទឹមនឹងនេះ ធនាគារពិភពលោក និង UNICEF បានអំពាវនាវឱ្យប្រទេសនានាផ្តល់អាទិភាពដល់ការដោះស្រាយភាពក្រីក្ររបស់កុមារ និងបង្កើតវិធានការជាច្រើនរួមទាំងការពង្រីកកម្មវិធីអត្ថប្រយោជន៍កុមារជាសកលផងដែរ៕