អំឡុងទស្សនកិច្ចនៅរដ្ឋធានីម៉ានីល នាយឧត្តមនាវី John Aquilino មេបញ្ជាការយោធាឥណ្ឌូប៉ាស៊ីហ្វិកនៃកងទ័ពអាម៉េរិក និយាយថា លោក និងប្រមុខយោធាហ្វីលីពីន ឧត្តមសេនីយ៍ Romeo Brawner បានពិភាក្សាអំពីការពង្រីកមូលដ្ឋានដែលកងកម្លាំងអាម៉េរិកអាចចូលប្រើប្រាស់​បាន​ក្រោម​កិច្ច​ព្រម​ព្រៀងពង្រឹងកិច្ចសហប្រតិបត្តិការការពារជាតិ (EDCA) និងបានផ្ដល់អនុសាសន៍នេះដល់​មេដឹកនាំ​ប្រទេសទាំងពីរ។

 

បច្ចុប្បន្ន យោធាអាម៉េរិក អាចប្រើប្រាស់មូលដ្ឋានយោធាហ្វីលីពីន៩ទៅហើយ។ ទីតាំងបន្ថែមចំនួន បួនដែលត្រូវបានអនុម័តគឺមានទីតាំងនៅជិតចំណុចក្ដៅជាមួយចិន ដោយក្នុងនោះមូលដ្ឋាន៣បែរ​មុខ​ទៅទិសខាងជើងឆ្ពោះទៅកាន់កោះតៃវ៉ាន់ និងមួយកន្លែងនៅជិតប្រជុំកោះ Spratlys នៃ​សមុទ្រ​ចិន​ខាង​ត្បូង ទីដែលទីក្រុងម៉ានីល និងទីក្រុងប៉េកាំងប្រឈមមុខគ្នាថ្មីៗនេះ។

 

យ៉ាងណាមិញលោក Brawner បាននិយាយថា គោលបំណងនៃ EDCA គឺលំហាត់ហ្វឹកហ្វឺន និង​ការ​ឆ្លើយតបផ្នែកមនុស្សធម៌ និងគ្រោះមហន្តរាយ ដែលជាផ្នែកសំខាន់ក្នុងសម្ព័ន្ធភាព​មាន​អាយុ​រាប់​ទសវត្សរ៍រវាងប្រទេសទាំងពីរ ហើយក៏មិនទាក់ទងនឹងការគំរាម កំហែងផ្នែកសន្តិសុខក្នុងតំបន់នោះទេ។

 

ឯលោក Aquilino ដែលកំពុងស្ថិតនៅទីក្រុងម៉ានីលសម្រាប់កិច្ចប្រជុំប្រចាំឆ្នាំលើកិច្ចសហប្រតិបត្តិ​ការ​ទ្វេភាគីផ្នែកយោធា ក៏បានបញ្ជាក់ដែរថា ភាគីទាំងពីរស្វែងរកការបំពេញចន្លោះ​ផ្សេងៗ​នៃ​កិច្ច​ព្រម​ព្រៀង​ដើម្បីជំរុញការចែករំលែកលើផ្នែកស៊ើបការណ៍សម្ងាត់៕