ក្នុងជំនួបទល់មុខ នៅមហាវិមានប្រជាជន ក្រុងប៉េកាំង នាថ្ងៃទី១៥ ខែកញ្ញា  សម្ដេច ហ៊ុន ម៉ាណែត បានស្នើដល់លោក លី ឈាង នាយករដ្ឋមន្រ្តីចិន ពិចារណាលើគម្រោងពាក់ព័ន្ធនឹងសន្តិសុខថាមពល ប្រព័ន្ធហេដ្ឋារចនាសម្ព័ន្ធ។  ជាពិសេសការជំរុញផ្នែកវិនិយោគ លើគម្រោងកិច្ចសហប្រតិបត្តិការត្បូងពេជ្រ និងការស្តារ និងជំរុញវិស័យទេសចរណ៍។ 
 

នាយករដ្ឋមន្រ្តី ហ៊ុន ម៉ាណែត បានថ្លែងដូច្នេះ៖« កម្ពុជាត្រៀមខ្លួនជាស្រេចក្នុងការបន្តអនុវត្តនូវគម្រោងដែលបានព្រមព្រៀងគ្នា និងខិតខំស្វែងរកនូវគម្រោងថ្មីៗ បន្ថែមទៀត ដើម្បីអនុវត្តសម្រាប់ជាផលប្រយោជន៍ជូនប្រជាជនទាំងពីរ ឱ្យបានកាន់តែប្រសើរ»។ 
 

ក្នុងជំនួបដដែលនេះ សម្ដេច ហ៊ុន ម៉ាណែត និង លោក លី ឈាង  ក៏បានធ្វើជាសាក្សីលើការចុះអនុស្សរណៈនៃការយោគយល់គ្នាចំនួន ១៥ រួមមាន ឯកសារស្តីពីផែនការសកម្មភាព នៃការកសាងសហគមន៍វាសនារួមកម្ពុជា-ចិន ក្នុងឆ្នាំ២០២៤-២០២៨។
 

ជាមួយគ្នានេះ សម្ដេច ហ៊ុន ម៉ាណែត ក៏បានប្រកាសពីការរក្សាជំហរក្នុងការគាំទ្រចិន នៅក្នុងក្របខ័ណ្ឌតំបន់ និងពិភពលោក ព្រមទាំងបន្តគាំទ្រនូវគំនិតផ្តួចផ្តើមនានារបស់ចិន។ 
 

គួរជម្រាបថា  ដំណើរទស្សនកិច្ចទ្វេភាគីរបស់ប្រមុខរដ្ឋាភិបាលកម្ពុជា បានប្រព្រឹត្តទៅនៅថ្ងៃទី ១៤-១៦ កញ្ញា  តាមការអញ្ជើញរបស់នាយករដ្ឋមន្រ្តីចិន លោក លី ឈាំង។  តាមរយៈដំណើរទស្សនកិច្ចនេះ ប្រមុខរដ្ឋាភិបាលកម្ពុជា បានមានជំនួបដោយឡែកជាមួយលោក ស៊ី ជិនភីង ប្រធានាធិបតីចិន និងលោក ចាវ ឡឺជឺ ប្រធានសភាតំណាងប្រជាជន៕