នៅថ្ងៃទី២០ ខែកញ្ញា រដ្ឋាភិបាលម៉ារ៉ុកបាននិយាយថា ខ្លួនគ្រោងនឹងចំណាយយ៉ាងហោចណាស់១២០ពាន់លាន dirhams (១១,៧ពាន់លានដុល្លារ) ក្នុងរយៈពេល ៥ឆ្នាំ ដើម្បីសាងសង់ឡើងវិញនូវតំបន់ដែលរងផលប៉ះពាល់ដោយការរញ្ជួយដីដ៏ខ្លាំងនាពេលថ្មីៗនេះ ។

 

ការរញ្ជួយដីកម្រិត ៦,៨រ៉ិចទ័របានកើតឡើងកាលពីថ្ងៃទី ៨ខែកញ្ញា បានសម្លាប់មនុស្សជាង ២៩០០នាក់ ភាគច្រើននៅតាមភូមិដែលពិបាកចូលសង្គ្រោះក្នុងតំបន់ភ្នំ High Atlas ។

 

យោងតាមរដ្ឋាភិបាលម៉ារ៉ុក ផែនការខាងលើនឹងកំណត់គោលដៅប្រជាជន ៤,២លាននាក់នៅក្នុងខេត្តដែលរងផលប៉ះពាល់ខ្លាំងបំផុតដោយការរញ្ជួយដីនេះ Al Haouz, Chichaoua, Taroudant, Marrakech, Ouarzazate និង Azizlal រួមទាំងការតាំងទីលំនៅថ្មី និងការធ្វើឱ្យប្រសើរឡើងនូវហេដ្ឋារចនាសម្ព័ន្ធដើម្បីបម្រើដល់ការអភិវឌ្ឍន៍សេដ្ឋកិច្ចសង្គម។

 

ថវិកាសម្រាប់ផែនការនេះ បានមកប្រាក់របស់រដ្ឋាភិបាល ជំនួយអន្តរជាតិ និងមូលនិធិដែលបង្កើតឡើងដើម្បីឆ្លើយតបនឹងគ្រោះរញ្ជួយដី។

 

កាលពីសប្តាហ៍មុន រដ្ឋាភិបាលម៉ារ៉ុកបាននិយាយថា គ្រួសារដែលរងផលប៉ះពាល់ដោយការរញ្ជួយដីនឹងទទួលបានការគាំទ្រកន្លែងស្នាក់នៅបណ្តោះអាសន្នក្នុងចំនួនទឹកប្រាក់ ៣០ ០០០dirhams (៣០០០ដុល្លារ)។ រដ្ឋាភិបាលក៏បានសន្យាជួយឧបត្ថម្ភសម្រាប់ផ្ទះដែលរងការខូចខាត ឬដួលរលំដោយសារការរញ្ជួយដី៕