ចិន ជាប្រទេសដែលប្រើប្រាស់ឥន្ធនៈហ្វូស៊ីលដ៏ធំបំផុតមួយរបស់ពិភពលោក។ ធ្យូងថ្ម និងប្រេងឥន្ធនៈជាច្រើន ត្រូវបានចិនប្រើប្រាស់ជារៀងរាល់ឆ្នាំ ដ្បិតចិនកំពុងព្យាយាមអភិវឌ្ឍសេដ្ឋកិច្ចរបស់ខ្លួន។ 
 

ប្រេសិតពិសេសផ្នែកអាកាសធាតុចិនលោក Xie Zhenhua នៅថ្ងៃទី​២១ ខែកញ្ញា លើកឡើងថា ការ​បញ្ឈប់ការប្រើប្រាស់​ឥន្ធនៈ​ហ្វូស៊ីល​ ជារឿងមិនអាចទៅរួច។ 
 

ប្រទេសនានាបានស្ថិតក្រោមសម្ពាធ ដើម្បីសម្រេចមហិច្ឆតាដោះស្រាយការឡើងកំដៅផែនដីជាសកលដោយការកាត់បន្ថយការប្រើប្រាស់​ឥន្ធនៈ​ហ្វូស៊ីល ក៏ជាកត្តាមួយដែលអាចជួយឱ្យរក្សាកំណើនសីតុណ្ហភាពពិភពលោកមិនឱ្យឡើងដល់កម្រិត១,៥អង្សា។ 
 

ទោះជាយ៉ាងណាក៏ដោយ លោក Xie បានសង្កត់ធ្ងន់ថា ការប្រើប្រាស់ថាមពលកកើតឡើងវិញដែលនៅមានកម្រិត និងភាពមិនទាន់រឹងមាំនៃបច្ចេកវិទ្យាសំខាន់ៗសម្រាប់ផ្ទុកថាមពល មិនទាន់អាចបំពេញតម្រូវការថាមពលពិភពលោកឡើយ។ លោកបន្តថា ពិភពលោកនៅតែត្រូវតែបន្តពឹងផ្អែកលើឥន្ធនៈហ្វូស៊ីលដើម្បីការពារកំណើនសេដ្ឋកិច្ច។
 

«វាជារឿងដែលមិនអាចទៅរួចក្នុងការ​បញ្ឈប់ការប្រើប្រាស់​ឥន្ធនៈ​ហ្វូស៊ីល​ទាំងស្រុង»។ ប្រេសិតពិសេសផ្នែកអាកាសធាតុដែលត្រូវតំណាងចិនក្នុងកិច្ចប្រជុំអាកាសធាតុ COP28 បានលើកឡើងបែបនេះ។ 
 

នៅឯកិច្ចពិភាក្សាអាកាសធាតុនៅទីក្រុង Glasgow ក្នុងឆ្នាំ ២០២១ កន្លងទៅ ចិនបានជំរុញឱ្យផ្លាស់ប្ដូរការប្រើប្រាស់ភាសានៃកិច្ចព្រមព្រៀងអាកាសធាតុពីការបញ្ឈប់ទៅជាការបន្ថយការប្រើប្រាស់ឥន្ធនៈហ្វូស៊ីលវិញ៕