នៅក្នុងសេចក្ដីថ្លែងការណ៏របស់កូរ៉េខាងត្បូងដែលចេញនៅថ្ងៃទី២៣ ខែកញ្ញា រដ្ឋមន្ត្រីការបរទេសអាម៉េរិក អាន់តូនី ប្លីងខិន រដ្ឋមន្ត្រីការបរទេសកូរ៉េខាងត្បូង ផាក ជីន និងរដ្ឋមន្ត្រីការបរទេសជប៉ុនលោកស្រី យ៉ូកូ កាមីកាវ៉ា បានឯកភាពគ្នាឆ្លើយតបយ៉ាងម៉ឺងម៉ាត់ចំពោះសកម្មភាពណាមួយដែលគំរាមកំហែងដល់សន្តិសុខក្នុងតំបន់ដោយរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ

 

នៅក្នុងកិច្ចប្រជុំខ្លីមួយកាលពីថ្ងៃទី២២ ខែកញ្ញា មន្ត្រីប្រទេសទាំង៣ ជឿថា ជំនួបកំពូលរវាងមេដឹកនាំកូរ៉េខាងជើង និងរុស្ស៉ីនេះអាចអនុញ្ញាតឱ្យរុស្ស៊ីទទួលបានគ្រាប់រំសេវពីកូរ៉េខាងជើងដើម្បីបំពេញបន្ថែមចន្លោះសម្រាប់សង្គ្រាមរបស់ខ្លួននៅអ៊ុយក្រែន។ 

 

មេដឹកនាំកូរ៉េខាងជើងលោក គីម ជុងអ៊ុន បានធ្វើទស្សនកិច្ចរយៈពេលមួយសប្តាហ៍ទៅកាន់រុស្ស៊ីកាលពីសប្តាហ៍មុន ហើយបានពិភាក្សាអំពីកិច្ចសហប្រតិបត្តិការយោធាជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន។

 

ប្រធានាធិបតីកូរ៉េខាងត្បូង យូន សុកយ៉ល ព្រមានកាលពីថ្ងៃទី២០ ខែកញ្ញាថា ប្រសិនបើរុស្ស៊ីជួយកូរ៉េខាងជើងបង្កើនកម្មវិធីអាវុធរបស់ខ្លួនជាថ្នូរនឹងជំនួយសម្រាប់សង្គ្រាមរបស់ខ្លួននៅអ៊ុយក្រែន សកម្មភាពនេះ នឹងជាការបង្កហេតុដោយផ្ទាល់មួយរបស់ភាគីទាំងពីរ ហើយទីក្រុងសេអ៊ូល និងសម្ព័ន្ធមិត្តនឹងមិនឈរនៅស្ងៀមឡើយ៕