ជាតិ
ឥណ្ឌា នឹងបង្កើនការបណ្តុះបណ្តាលធនធានមនុស្សកម្ពុជា លើផ្នែកបច្ចេកទេស បដិសណ្ឋារកិច្ច និងអាហារ លោក ហេង សួរ រដ្ឋមន្ត្រីការងារ ជូនវត្ថុអនុស្សាវរីយ៍ ដល់លោកស្រី ទេវ្យានី ឧត្តម ខូប្រាគតិ ឯកអគ្គរដ្ឋទូតឥណ្ឌាប្រចាំកម្ពុជារូបភាពពី៖ ក្រសួងការងារ
×
ដោយ៖ សែម ប្រាក់ដាវ
ភ្នំពេញ៖ ឥណ្ឌា សម្រេចបង្កើនកិច្ចសហប្រតិបត្តិការលើការបណ្តុះបណ្តាលបច្ចេកទេស និងវិជ្ជាជីវៈ រួមទាំងការបណ្តុះបណ្តាលបដិសណ្ឋារកិច្ច ដល់ពលរដ្ឋកម្ពុជា ដើម្បីបង្កើនកម្លាំងពលកម្មជំនាញ នៅក្នុងវិស័យទេសចរណ៍។ ការសម្រេចបែបនេះ ត្រូវបានប្រកាសឡើងក្នុងជំនួបការងាររវាងលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជាមួយលោកស្រី ទេវ្យានី ឧត្តម ខូប្រាគតិ ឯកអគ្គរដ្ឋទូតឥណ្ឌាប្រចាំកម្ពុជា នាថ្ងៃទី២២កញ្ញា។
បច្ចុប្បន្ន ការបណ្តុះបណ្តាលបច្ចេកទេស និងវិជ្ជាជីវៈនៅកម្ពុជា កំពុងដើរតួនាទីសំខាន់ក្នុងការជ្រោងសេដ្ឋកិច្ចកម្ពុជា ក៏ដូចជាការអនុវត្តចក្ខុវិស័យកម្មវិធីជាតិ លើការបណ្តុះបណ្តាលជំនាញបច្ចេកទេសកម្រិត១ដល់យុវជនមកពីគ្រួសារក្រ១ ក្រ២(គ្រួសារដែលអាជ្ញាធរចេញបណ្ណក្រីក្រ)និងគ្រួសារងាយរងហានិភ័យតាមកម្មវិធីយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិទី៧។ នេះជាការលើកឡើងរបស់លោក ហេង សួរ ដែលទទួលបានគាំទ្រ ពីលោកស្រី ទេវ្យានី ឧត្តម ខូប្រាគតិ ដើម្បីជួយពង្រឹងសមត្ថភាពដល់ពលរដ្ឋកម្ពុជា លើវិស័យបច្ចេកទេសឱ្យកាន់តែប្រសើរបន្ថែម។
លើសពីនេះ លោកស្រីឯកអគ្គរដ្ឋទូតឥណ្ឌាប្រចាំកម្ពុជា ក៏បានឯកភាពជាមួយលោក ហេង សួរ ក្នុងការជួយបណ្តុះបណ្តាលជំនាញបដិសណ្ឋារកិច្ច និងម្ហូបអាហារ តាមតម្រូវការរបស់ភ្ញៀវទេសចរឥណ្ឌា ផងដែរ។ កម្មវិធីបណ្តុះបណ្តាលបដិសណ្ឋារកិច្ច និងម្ហូបអាហារនេះ គឺជាគន្លឹះមិនអាចខ្វះបាន ដើម្បីទាក់ទាញភ្ញៀវទេសចរឥណ្ឌា ខណៈអាហារដ្ឋាននៅកម្ពុជាមានតិចតួចនៅឡើយ។ នេះបើតាមការចុះផ្សាយរបស់ក្រសួងការងារ។
ក្រសួងបានបញ្ជាក់ថា៖ « ការគាំទ្ររបស់ឥណ្ឌានេះ គឺដើម្បីអាចឱ្យពលរដ្ឋកម្ពុជាមានជំនាញដ៏សំខាន់មួយ ក្នុងការទាក់ទាញភ្ញៀវទេសចរ ពីប្រទេសឥណ្ឌាមកកម្ពុជាឱ្យកាន់តែច្រើនបន្ថែមទៀត ដែលលើសពីទំនាក់ទំនងវប្បធម៌ និងសាសនារវាងប្រទេសទាំងពីរ»។
ការបញ្ជាក់ពីការឯកភាពលើកិច្ចសហប្រតិបត្តិការរបស់ឥណ្ឌាជាមួយកម្ពុជានេះ គឺបានធ្វើឡើងស្របពេលដែលប្រទេសទាំងពីរ នឹងមានការហោះហើរត្រង់ជាលើកដំបូង នាពេលឆាប់ៗនេះ។
យោងតាមសេចក្តីប្រកាសព័ត៌មានរបស់ក្រសួងទេសចរណ៍ កាលពីថ្ងៃទី២២កញ្ញា កម្ពុជា-ឥណ្ឌា បានផ្លាស់ប្តូរយោបល់គ្នាក្នុងការជំរុញវិនិយោគ របស់ឥណ្ឌាលើឧស្សាហកម្មទេសចរណ៍កម្ពុជា។ ជាពិសេសការផ្តួចផ្តើមគំនិតឱ្យបង្កើតកញ្ចប់ទេសចរណ៍បែបជំនឿ និងសាសនា, ការឯកភាពគ្នាក្នុងការជំរុញឱ្យមានជើងហោះហើរត្រង់រវាងទីក្រុងភ្នំពេញ និងទីក្រុងញូដែល តាមរយៈក្រុមហ៊ុន Cambodia Angkor Air ដើម្បីទាក់ទាញភ្ញៀវទេសចររវាងប្រទេសទាំងពីរឱ្យកាន់តែច្រើន។
ឆ្នាំ២០២៣នេះ ជាខួបលើកទី៧១ នៃការបង្កើតទំនាក់ទំនងការទូត រវាងកម្ពុជា និងឥណ្ឌា ហើយថ្នាក់នាំទាំង២បានប្ដេជ្ញាចិត្តរួមគ្នាក្នុងការលើកកម្ពស់កិច្ចសហប្រតិបត្តិការទេសចរណ៍បន្ថែមទៀត តាមរយៈការលើកកម្ពស់ទំនាក់ទំនង សង្គម-វប្បធម៌-សេដ្ឋកិច្ច ទំនាក់ទំនងរវាងប្រជាជន និងប្រជាជន៕
© រក្សាសិទ្ធិដោយ thmeythmey.com