ក្នុងសន្និសីទមួយនៅថ្ងៃទី២ ខែតុលា លោក Matthew Miller​ អ្នកនាំពាក្យក្រសួងការបរទេសអាម៉េរិក បានរំពឹងថា ជំនួបរវាងលោកស៊ី ជិនភីង ប្រធានាធិបតីចិន និងសមភាគីរុស្ស៊ី លោកវ៉្លាឌីមៀ ពូទីន នៅក្នុងខែតុលានេះ នឹងនាំឱ្យមានកិច្ចសហប្រតិបត្តិការទ្វេភាគី រួមជាមួយកូរ៉េខាងជើងផង។ 

 

ទាក់ទិននឹងបញ្ហានេះ មន្រ្តីក្រសួងការបរទេសអាម៉េរិក បានទទូចជាថ្មីឱ្យរដ្ឋាភិបាលក្រុងប៉េកាំង ប្រើឥទ្ធិពលរបស់ខ្លួន ដើម្បីលើកទឹកចិត្តឱ្យរដ្ឋាភិបាលក្រុងព្យុងយ៉ាង ចូលតុចរចាឡើងវិញ។ 

 

«រឿងមួយ ដែលយើងបានជំរុញនៅក្នុងកិច្ចសន្ទនាជាមួយមន្រ្តីចិន ក៏ដូចជាលោកប្លីងខិន និងមន្រ្តីអាម៉េរិកផ្សេងទៀតបានធ្វើ គឺថា ចិនមានតួនាទី ក្នុងការប្រើប្រាស់ឥទ្ធិពលរបស់ខ្លួនជាមួយកូរ៉េខាងជើង ដើម្បីជំរុញឱ្យកូរ៉េខាងជើងដាក់ចេញចំណាត់ការបន្ធូរបន្ថយ និងវិលមករកតុចរចាឡើងវិញ»។ លោក Miller បានសង្កត់ធ្ងន់បែបនេះ។ 

 

ត្រង់ចំណុចនេះ អ្នកនាំពាក្យក្រសួងការបរទេសអាម៉េរិក បានជំរុញឱ្យរដ្ឋាភិបាលក្រុងប៉េកាំងប្រើប្រាស់ឥទ្ធិពលនៅគ្រប់កម្រិតទាំងអស់ ដែលក្រុងព្យុងយ៉ាងមានឆន្ទៈនឹងចូលរួម។ 

 

ជាការពិត ក្រោយកិច្ចចរចារំសាយកម្មវិធីនុយក្លេអ៊ែរជាមួយអាម៉េរិកត្រូវផ្អាកនៅក្នុងឆ្នាំ២០១៩ កូរ៉េខាងជើង បានចាប់ផ្តើមបានមីស៊ីលឡើងវិញ និងធ្វើឡើងជាញឹកញាប់ ដោយក្នុងនោះរួមមានមីស៊ីលប៉ាលីស្ទិកអន្តរទ្វីបផង។ 

 

មិនតែប៉ុណ្ណោះ លោក Miller ក៏បានបង្ហាញពីក្តីបារម្ភផងដែរលើការពង្រឹងកិច្ចសហប្រតិបត្តិការរវាងរុស្ស៊ី និងកូរ៉េខាងជើង ដែលអាចនាំឱ្យមានការផ្ទេរអាវុធប្រភេទណាមួយពីរុស្ស៊ីទៅកូរ៉េខាងជើង ឬពីកូរ៉េខាងជើងទៅរុស្ស៊ីសម្រាប់ធ្វើសង្រ្គាមនៅអ៊ុយក្រែន៕