សហព័ន្ធបាល់ទាត់ទ្វីបអឺរ៉ុប UEFA បានសម្រេចចិត្តពន្យាពេលនៃការប្រកួតរបស់ក្រុមជម្រើសជាតិអ៊ីស្រាអែល ក៏ដូចជាការប្រកួតបាល់ទាត់ទាំងអស់ក្នុងប្រទេសអ៊ីស្រាអែល ក្នុងរយៈពេល ២ខែ ព្រោះតែបញ្ហាជម្លោះកំពុងតែបន្ត ហើយបានធ្វើឱ្យមនុស្សពាន់នាក់បានបាត់បង់ជីវិត។
 

ក្រុមអ៊ីស្រាអែលស្ថិតនៅក្នុងពូល I នៃវគ្គជម្រុះពានរង្វាន់ ​Euro 2024 ដោយពួកគេនឹងត្រូវប្រកួតទល់នឹងស្វ៊ីសនៅថ្ងៃទី១២ ខែតុលា ក្នុងទីក្រុង Tel Aviv។ 
 

UEFA បានអះអាងថាការប្រកួតរវាងក្រុមទាំងពីរនឹងត្រូវលើកពេលទៅប្រកួតនៅក្នុងខែវិច្ឆិកា តាមពេលដែលបានកំណត់ថ្មី។
 

«UEFA នឹងបន្តតាមដានស្ថានការណ៍យ៉ាងដិតដល់ ហើយនឹងបន្តទំនាក់ទំនងជាងមួយនឹងក្រុមទាំងអស់ដែលពាក់ព័ន្ធ មុនពេលមានការសម្រេចចិត្តផ្លាស់ប្តូរដែលអាចកើតមានបន្ថែមទៀតចំពោះការប្រកួតនាពេលខាងមុខ ជាពិសេសទាក់ទងនឹងប្រទេសអ៊ីស្រាអែល។»។ នេះបើតាមសេចក្តីប្រកាសរបស់ UEFA នាថ្ងៃទី១០ ខែតុលា។
 

ចាប់តាំងពីព្រឹកថ្ងៃទី៧ ខែតុលាមក យោធាអ៉ីស្រាអែល និងក្រុមហាម៉ាស នៅតែបន្តប្រយុទ្ធគ្នា ក្រោយមានការលួចវាយប្រហារពីក្រុមហាម៉ាស។ ក្រុមហាម៉ាស បានចូលទៅក្នុងតំបន់ចំនួន ២២ ផ្នែកខាងក្រៅនៃតំបន់កាហ្សា។ គិតមកដល់ពេលនេះមនុស្សប្រមាណជាង​ ២ពាន់នាក់ត្រូវបានស្លាប់បាត់បង់ជីវិត ខណៈយោធាអ៊ីស្រាអែល បានឡោមពាត់តំបន់កាហ្សា ហើយបន្តទម្លាក់គ្រាប់បែកនៅគោលដៅដែលជាទីតាំងរបស់ក្រុមសកម្មប្រយុទ្ធហាម៉ាសលាក់ខ្លួន៕