សេចក្តីថ្លែងការណ៍របស់សេតវិមានបានធ្វើឡើងមួយខែបន្ទាប់ពីមេដឹកនាំកូរ៉េខាងជើងលោក គីម ជុងអ៊ុនបានធ្វើដំណើរទៅកាន់ភាគខាងកើតរុស្ស៊ី និងបានជួបជាមួយប្រធានាធិបតី លោក វ្ល៉ាឌីមៀ ពូទីនដែលបង្កឱ្យមានការព្រួយបារម្ភក្នុងចំណោមសម្ព័ន្ធមិត្តរបស់ទីក្រុងកៀវជុំវិញ លទ្ធភាពនៃកិច្ចព្រមព្រៀងអាវុធដ៏មានសក្តានុពលមួយ។

 

«យើងថ្កោលទោសកូរ៉េខាងជើងចំពោះការផ្តល់ឱ្យរុស្ស៊ីនូវឧបករណ៍យោធានេះដែលនឹងត្រូវ បានប្រើដើម្បីវាយប្រហារទីក្រុងនានារបស់អ៊ុយក្រែន សម្លាប់ជនស៊ីវិលអ៊ុយក្រែន និងបន្ត សង្គ្រាមខុសច្បាប់របស់រុស្ស៊ី»។ អ្នកនាំពាក្យសន្តិសុខជាតិរបស់សេតវិមានលោក John Kirby បានប្រាប់អ្នកសារព័ត៌មានបែបនេះរួចសង្កត់ធ្ងន់ថា​ អាម៉េរិកនឹងបន្តតាមដាន​រាល់​ការ​ដឹក​ជញ្ជូន ​សព្វាវុធ​របស់​កូរ៉េខាងជើង​ទៅ​កាន់​រុស្ស៊ី។

 

ជាថ្នូរនឹងការគាំទ្ររបស់ខ្លួន លោក Kirby អះអាងថា ទីក្រុងព្យុងយ៉ាងកំពុងស្វែងរកជំនួយ ផ្នែកយោធាពីរុស្ស៊ី រួមទាំងយន្តហោះចម្បាំង មីស៊ីលពីដីទៅអាកាស រថពាសដែក ឧបករណ៍ផលិតមីស៊ីលផ្លោង ឬសម្ភារៈផ្សេងៗ និងបច្ចេកវិទ្យាទំនើបផ្សេងទៀត។ លោកបន្តថា ការពង្រីកភាពជាដៃគូយោធារវាងកូរ៉េខាងជើង និងរុស្ស៊ី រួមទាំងការផ្ទេរបច្ចេក វិទ្យាណាមួយពីរុស្ស៊ីទៅកូរ៉េខាងជើងនឹងធ្វើឱ្យប៉ះពាល់ដល់ស្ថិរភាពក្នុងតំបន់ និងការមិនរីក សាយភាយជាសកលនៃអាវុធនុយក្លេអ៊ែរ។ 

 

យោងតាមក្រាហ្វិចដែលផ្តល់ដោយសេតវិមាន ចន្លោះពីថ្ងៃទី១​ ខែកញ្ញា ដល់ថ្ងៃទី១ ខែតុលា កុងតឺន័រជាច្រើនត្រូវបានដឹកជញ្ជូនតាមសមុទ្រពីទីក្រុង Najin កូរ៉េខាងជើងទៅកាន់ទីក្រុង Dunay ប្រទេសរុស្ស៊ី។ សព្វាវុធទាំងអស់នេះបន្ទាប់មកត្រូវបានបញ្ជូនតាមរថភ្លើងទៅកាន់ ឃ្លាំងរំសេវមួយនៅជិតក្រុង Tikhoretsk ភាគនិរតីរុស្ស៊ីដែលមានចម្ងាយប្រហែល ២៩០ គីឡូម៉ែត្រពីព្រំដែនអ៊ុយក្រែន។

 

គួរបញ្ជាក់ថា កូរ៉េខាងជើង ដែលអាម៉េរិកធ្លាប់បានចោទប្រកាន់ថាបានផ្គត់ផ្គង់គ្រាប់ផ្លោង ដល់ក្រុមទាហានស៊ីឈ្នួលរុស្ស៊ី Wagner គឺជាអ្នកផលិតអាវុធមួយ ហើយបានផ្គត់ផ្គង់សម្ភារ សង្គ្រាមជាច្រើនសម្រាប់រុស្ស៊ីតាំងពីដើមមក។ រុស្ស៊ី​បាន​បង្កើន​ការផលិត​គ្រាប់​ផ្លោង​ក្នុង​ឆ្នាំ​នេះ ​ដល់​ការ​ព្យាករ​ចំនួន ២,៥ លាន​គ្រាប់ ប៉ុន្តែ​ក្រុម​អ្នកវិភាគ​បាន​ណែនាំ​ថា​អាច​ខ្វះ​តម្រូវការ​របស់ ខ្លួន​នៅលើ​សមរភូមិ។

 

រុស្ស៊ី និងកូរ៉េខាងជើង ដែលជាសម្ព័ន្ធមិត្តជាប្រវត្តិសាស្ត្រ ស្ថិតក្រោមការដាក់ទណ្ឌកម្មជា សកលពោលគឺទីក្រុងមូស្កូសម្រាប់ការលុកលុយអ៊ុយក្រែន និងទីក្រុងព្យុងយ៉ាងសម្រាប់ ការសាកល្បងអាវុធនុយក្លេអ៊ែររបស់ខ្លួន៕