ការឈ្នះចុងក្រោយនៅក្នុងក្របខណ្ឌ Europa League ដោយក្រុម ​Liverpool បំបាក់ក្រុម Union St.Gilloise លទ្ធផល ២-០ និងស្មើជាមួយ Brighton ២-២ នៅក្របខណ្ឌ Premier League ។

ឆ្លងកាត់ ៨ប្រកួតកន្លងមកនៃ​ ​Premier League ក្រុមរហស្សនាមហង្សក្រហមបានយកឈ្នះការប្រកួត ៥លើក ស្មើ ២ និងចាញ់ ១ ហើយនឹងបន្តឈ្នះនៅពានរង្វាន់ក្រៅប្រទេសអង់គ្លេសថែមទៀត។
 

រដូវកាលថ្មី Liverpool នៅតែជាក្រុមតែមួយ ដែលត្រូវបានគេសម្លឹងឃើញថា នឹងអាចជាក្រុមដែលអាចបំបាក់ក្រុម Manchester City នៅក្នុង Premier League ក៏ដូចជាបញ្ឈប់ពួកគេពីការក្រសោបពានរង្វាន់ជាបន្តបន្ទាប់ នៅការប្រកួតប្រជែងកម្រិតខ្ពស់។
 

បន្ទាប់ពីមានការផ្លាស់ប្តូរកីឡាករ ក៏ដូចជាប្រព័ន្ធលេងមួយចំនួន សម្រាប់ក្រុមទាំងមូលនៅរដូវកាលថ្មី Liverpool បានបង្ហាញនូវហេតុផល ២យ៉ាង ដែលពួកគេកំពុងតែមានទម្រង់លេងល្អខ្លាំងឡើងវិញ ។
 

ខ្សែការពារចំនួន ២រូប ដែល Liverpool បានចុះកិច្ចសន្យាមកដូចជា​ Alexis Mac Allister និង Dominic Szoboszlai កំពុងតែបង្ហាញទម្រង់លេងដ៏អស្ចារ្យរបស់ពួកគេរៀងៗខ្លួន សម្រាប់ក្រុមរបស់លោក Klopp។ ការប៉ះបាល់ជិត និងវែងដ៏ល្អរបស់ពួកគេ ត្រូវបានបង្កើតឱកាសជាច្រើន ទៅដល់តំបន់ខ្សែប្រយុទ្ធក្នុងការស្វែងរកគ្រាប់បាល់។
 

មិនត្រឹមតែរឹងមាំនៅក្នុងតំបន់ខ្សែបម្រើនោះទេ ខ្សែបម្រើចំណូលថ្មីទាំង ២នេះ ក៏អាចផ្លាស់ទីសម្រាប់ប្តូរទីតាំងជំនួសតំបន់ដែលខ្វះចន្លោះ ដូចជានៅស្លាបសងខាងថែមទៀត។ ការញ៉ាកបាល់ ការបង្កើតឱកាសនៃការបញ្ជូលបាល់ឱ្យមិត្តរួមក្រុមនោះ Szoboszlai  ក្លាយជាកីឡាករដ៏សំខាន់ នៅក្នុងទម្រង់ក្រុមរបស់លោក Klopp ដែលមានរហស្សនាមថា Liverpool 2​.០។ 
 

ចំណែកខ្សែបម្រើ Mac Allister ពាក់អាវលេង ៦ មានគុណភាពខ្ពស់ក្នុងការពង្រឹងតំបន់ខ្សែបម្រើ និងការពារ ដែលជាតំបន់រូបគេធ្លាប់បង្ហាញភាពអស្ចារ្យតាំងពីពេលនៅ World Cup ជាមួយនឹងអាហ្សង់ទីន។
 

Mohamed Salah បានវិលត្រឡប់ក្លាយទៅជាអធិរាជលើវាលស្មៅនៃតំបន់ប្រយុទ្ធរបស់ក្រុម ​Liverpool ក្នុងរដូវកាលនេះ ដោយរូបគេរកបានគ្រាប់បាល់ជាបន្តបន្ទាប់ ក៏ដូចជាការបញ្ជូនបាល់ទៅមិត្តរួមក្រុម។ ការប៉ះបាល់ខ្លីៗ ការញ៉ាក់បាល់ទៅកាន់ក្នុងតំបន់ប្រអប់គ្រោះថ្នាក់ បានជួយដល់ក្រុមបញ្ចប់ទីបានយ៉ាងល្អ។
 

ក្រៅពីនេះ Darwin Nunez ក៏បានបង្ហាញទម្រង់លេងល្អខ្លាំងឡើងវិញ បើទោះរដូវកាលមុន រូបគេមិនបានបង្ហាញទម្រង់លេងបានល្អយ៉ាងណាក្តី ហើយទទួលបានការរិះគន់យ៉ាងខ្លាំងផងដែរ។ តំបន់ខ្សែប្រយុទ្ធដទៃដែលមានដូចជា ​Diogo Jota, Luis Diaz និង Cody Gakpo តែងតែរកបានគ្រាប់បាល់ហើយជួយបង្កើនភាពងាយស្រួលនៅតំបន់ប្រយុទ្ធ។ ជាលទ្ធផល Liverpool រកបាន ២១គ្រាប់ ក្នុងចំនួន ៨ប្រកួតចុងក្រោយមកនេះ ហើយពួកគេក៏កំពុងតែបន្តភាពខ្លាំងនៃតំបន់ប្រយុទ្ធរបស់ពួកគេ និងធ្វើឱ្យគូប្រកួតប្រជែងមានភាពភ័យខ្លាច៕