ចំពោះទិសដៅអនាគត លោក វ៉ាង ជៀនភីង បានសង្កត់ធ្ងន់ថា ក្រុមហ៊ុនមានផែនការវិនិយោគលើគម្រោងធំៗបន្ថែមទៀត រួមមាន បង្កើតមជ្ឈមណ្ឌលគ្រប់គ្រងប្រព័ន្ធទិន្នន័យ សម្រាប់គាំទ្រដល់រដ្ឋាភិបាលអេឡិចត្រូនិក, គម្រោងផ្លូវដែកតភ្ជាប់ភ្នំពេញ-សៀមរាប និងភ្នំពេញ-ប៉ោយប៉ែត និងចុងក្រោយ គម្រោងផ្គត់ផ្គង់ទឹកស្អាតតាមបណ្តាខេត្តស្របដងទន្លេមេគង្គ ។
 

សម្ដេច ហ៊ុន ម៉ាណែត ចាត់ទុកការវិនិយោគក្នុងប្រព័ន្ធផ្គត់ផ្គង់ទឹកស្អាត និងប្រព័ន្ធផ្លូវដែក គឺជាផ្នែកមួយដ៏សំខាន់នៃការពង្រឹងវិស័យឡូជីស្ទីក ។ សម្ដេច ក៏លើកទឹកចិត្តឱ្យក្រុមហ៊ុន CRCC បន្តពង្រីកការវិនិយោគទៅលើវិស័យផ្សេងៗទៀត ដែលក្រុមហ៊ុនមានបទពិសោធន៍ និងមានលទ្ធភាព។
 

ប្រមុខរដ្ឋាភិបាល ក៏ចង់ឱ្យមានការអភិវឌ្ឍប្រព័ន្ធផ្លូវដែក ឱ្យមានសមត្ថភាពគ្រប់ដណ្តប់ទូទាំងប្រទេសកម្ពុជាដែរ។ សម្តេចនាយករដ្ឋមន្ត្រី បានសង្កត់ធ្ងន់ឱ្យក្រុមហ៊ុន CRCC ពិនិត្យលទ្ធភាពលើការជួសជុល និងទំនើបកម្មផ្លូវដែក ដែលមានស្រាប់ និងសិក្សាលើការតភ្ជាប់ប្រព័ន្ធផ្លូវដែកពីភ្នំពេញ-បាវិត និងប៉ោយប៉ែត-សៀមរាប ក៏ដូចជាការតភ្ជាប់រហូតដល់ព្រំដែនវៀតណាម ដោយឆ្លងកាត់ខេត្តស្ទឹងត្រែង និងខេត្តមណ្ឌលគិរីទៀតផង។
 

គិតមកដល់ពេលនេះ ក្រុមហ៊ុន CRCC មានគម្រោងវិនិយោគសរុប ៥៣គម្រោង ជាមួយនឹងដើមទុនប្រមាណ ៥,៣០០ លានដុល្លារអាមេរិក៕