លោក កត្តា អ៊ន បានបញ្ជាក់ថា រោងចក្រទាំង១៧ មានកម្មករនិយោជិតសរុប៧៧២០នាក់។ រោងចក្រទាំងនេះ ភាគច្រើន គឺមានទឹកលិចជុំវិញទីតាំងនោះ ។ បើតាមលោក អ៊ន មានតែ៣រោងចក្រប៉ុណ្ណោះ ដែលលិចចូលក្នុងអគារផលិតកម្ម ខណៈរោងចក្រ៤ទៀត កំពុងផ្អាកដំណើរការបណ្ដោះអាសន្ន ដោយសារទឹកជន់លិច។ រោងចក្រទាំងនោះ ស្ថិតនៅភ្នំពេញ ចំនួន៤រោងចក្រ, ១០រោងចក្រនៅខេត្តកំពង់ស្ពឺ និង៣រោងចក្រ នៅខេត្តតាកែវ។

 

ដើម្បីបង្ការហានិភ័យដែលអាចកើតមានឡើងជាយថាហេតុ ដោយសារគ្រោះជំនន់ទឹកភ្លៀងនៅតំបន់រោងចក្រ សហគ្រាស និងកន្លែងស្នាក់នៅរបស់កម្មករនិយោជិត ក្រសួងការងារបានបញ្ជាឱ្យម្ចាស់រោងចក្រ សហគ្រាស ត្រូវតាមដានស្ថានភាពទឹកជំនន់ជាប្រចាំ។  

 

ក្រសួងណែនាំឱ្យនិយោជក ត្រូវតែរៀបចំបង្កើតក្រុមការងារ និងត្រៀមផែនការសង្គ្រោះ មធ្យោបាយការពារ និងជម្លៀសកម្មករនិយោជិត ក្នុងករណីមានទឹកជំនន់។ ជាងនេះទៀត អ្នកគ្រប់គ្រងរោងចក្រ សហគ្រាស ត្រូវត្រួតពិនិត្យបណ្តាញអគ្គិសនីឱ្យបានត្រឹមត្រូវ និងសមស្របតាមលក្ខណៈបច្ចេកទេស សុវត្ថិភាព សម្រាប់បង្ការនិងបញ្ចៀសនូវបញ្ហាចំពោះមុខ ទៅតាមកាលៈទេសៈ៕