លាក់, លក្ខ, ល័ក្ខ, លក្ខណ៍, លក្ស, លក្សណ៍, លក្ស្មណ៍ និងល័ក្ត ជាដើម សុទ្ធតែជាសទិសសព្ទ ដែលអានថា «លាក់»។ សារព័ត៌មានឌីជីថលថ្មីៗ សូមលើកយកពាក្យទាំងនេះ មកពន្យល់ ដោយដោយស្រង់តាមវចនានុក្រមខ្មែរ២០២២ របស់ក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា។
-«លាក់» ជាកិរិយាសព្ទ ដែលមានន័យពីរយ៉ាងគឺ ធ្វើឱ្យមានគន្លាក់ : លាក់ឈើ។ បិទបាំង, បំបាំងឬទុកមិនឱ្យគេឃើញ មិនឱ្យគេដឹង : លាក់របស់, លាក់ខ្លួន, លាក់ពុត។
«លាក់» មានកូនពាក្យដូចជា លាក់កំណួច, លាក់ពុត, លាក់កលល្បិច។ សំនួនវោហារ «លាក់បាំងអ្វី»ដែលជាពាក្យសម្រាប់និយាយផ្ដើមប្រាប់សេចក្ដីទៀងត្រង់មិនលាក់មិនបំបាំង : លាក់បាំងអ្វី ខ្ញុំសព្វថ្ងៃនេះទ័លក្រណាស់បានជាមករកខ្ចីប្រាក់អ្នក។ «លាក់លៀប» ឬ «លាក់លៀម» ដែលមានន័យថា លាក់ក្បិតក្បៀតទុកសំចៃ ឬលាក់ទុកនៅកៀនកោះ។ «លាក់សុំ» គឺលាក់ទុកត្រដក់ត្រសុំ។
-«លក្ខ» [សូរអាន ល័ក-ខៈ] , «ល័ក្ខ» ឬ «លក្ស» ជានាមសព្ទដែលមានន័យថា កំណត់; ទីសម្គាល់, គ្រឿងចំណាំ; ចន្លោង; គ្រឿងកំណត់រាប់, ខ្នាត, ទីវ; បុណ្យ, បុណ្យភ័ព្វ, សំណាង។ ន័យមួយទៀតគឺចំនួនសែន, មួយសែន (១០០ ០០០)។
លក្ខមូល គឺតម្លៃមួយសែន (ហៅ អនេកត្ថសំខ្យា)។ លក្ខខណ្ឌ គឺកម្រិត; សង្កាត់, ប៉ែកដោយឡែក; កំណត់គោល; ព្រំ : ទីមានល័ក្ខខ័ណ្ឌ, សម្ដីមានល័ក្ខខ័ណ្ឌ, ត្រូវធ្វើលក្ខខណ្ឌឱ្យទៀងទាត់។
-លក្ខណ, លក្ខណៈ [សូរអាន ល័ក-ខៈ ឬ ល័ក-ខៈ-ណៈ], លក្ខណ៍, ល័ក្សណ៍ ឬ លក្សណ៍ ជាគ្រឿងសម្គាល់, គ្រឿងចំណាំ; គ្រឿងសង្កេតនាខ្លួនប្រាណ ចង្អុលឱ្យឃើញច្បាស់ថាមានភ័ព្វឬឥតភ័ព្វ; គុណសម្បត្តិ : លក្ខណៈមានបុណ្យ, លក្ខណៈឥតបុណ្យ; ហោរទាយលក្ខណៈ។
លក្ខណការណ៍ ឬលក្ខណហេតុ ជាហេតុឬការណ៍ ដែលប្រកបដោយលក្ខណៈ, ដែលត្រូវលក្ខណៈ។ លក្ខណញ្ញូ គឺអ្នកស្គាល់លក្ខណៈ; ហោរ។ លក្ខណប្បញ្ញត្តិ គឺបញ្ញត្តិតាមលក្ខណៈច្បាប់។ មនុស្សខាតលក្ខណ៍ គឺមនុស្សមានលក្ខណៈអភ័ព្វឬមានឫកពាថោក។ ស្ត្រីគ្រប់លក្ខណ៍ ជាស្ត្រីដែលបរិបូណ៌ដោយលក្ខណៈល្អ។ល។ (សរសេរជា ល័ក្ខណ៍ លក្សណ៍ឬល័ក្សណ៍ ក៏បាន)។
-លក្ស្មណៈ [សូរអានល័ក-ស្មៈ ឬ ល័ក-ស្មៈ-ណៈ] ឬ លក្ស្មណ៍ ជានាមព្រះអនុជរបស់ព្រះរាមជាព្រះរាជបុត្រនៃព្រះបាទទសរថនិងនាងសុមិត្រាទេវី: ព្រះរាម និងព្រះលក្ស្មណ៍។ (សរសេរឃ្លាតក្លាយជា លក្ខណ៍ឬលក្សណ៍ ក៏មាន, គួរកុំប្រើ) ។
-ល័ក្ដ ជាជ័រខះរឹងកើតអំពីសត្វល្អិតពួកមួយ មានសម្បុរក្រហម សម្រាប់ប្រើការជ្រលក់សូត្រ អម្បោះជាដើម : ល័ក្ដស្រម៉។ ន័យមួយឬទៀតគឺ ផង់ល្អិតឬកករឹងជាដុំមានព័ណ៌ផ្សេងៗ សម្រាប់ប្រើជាគ្រឿងជ្រលក់ : ល័ក្ដខៀវ, ល័ក្ដបៃតង, ល័ក្ដស្វាយ, ល័ក្ដលឿងទុំ ...។
កាកល័ក្ដ គឺកាករបស់ល័ក្ដស្រម៉ ដែលស្ងោររំងាស់អស់ជាតិហើយ, សម្រាប់ប្រើការបិទឬភ្ជ័រភ្ជាប់អ្វីផ្សេងៗ។ ចងល័ក្ដ
មានន័យថាយកស្រម៉ល័ក្ដដែលនៅមានសត្វល្អិតជាមេ ដាក់ក្នុងសំបកកាតំស្លឹកត្នោតជាដើមចងភ្ជាប់នឹងឈើរស់មានដើមសង្កែ, ត្រាង, ស្នួលជាដើម ដើម្បីឱ្យមេនោះចេញមកវាររោមមែកឈើ កកើតបានជាស្រម៉ល័ក្ខតទៅទៀត : របរចងល័ក្ដ។ ល័ក្ដជុំកន្លង់ គឺស្រម៉ល័ក្ដដែលដុះព័ទ្ធស្រោបរុំជុំវិញមែកឈើ។
«ល័ក្ដ» ក៏ជាឈ្មោះឈើឬដំណាំដែលមានសម្បុរដូចល័ក្ដស្រម៉ : ចេកល័ក្ដ ម្ទេសល័ក្ដ ...៕