ប្រធានក្រុមប្រឹក្សាសហគមន៍មៀនប៉ៃលិន លោក សារ ចំរើន បានលើកឡើងថា ឆ្នាំនេះទិន្នផលមៀនប៉ៃលិនមួយចំនួនតូច បានរងការខូចខាតដោយសារគ្រោះរាំងស្ងួតរយៈពេលវែង។ ស្របពេល ចម្ការខ្លះ គ្មានប្រព័ន្ធស្រោចស្រពគ្រប់គ្រាន់ ដែលធ្វើឱ្យការបញ្ចូលអកម៉ូន (Hormone) ជំរុញផ្លែផ្កា បរាជ័យ។ 
 

លោក ប្រាប់សារព័ត៌មានថ្មីៗ ដូច្នេះថា៖ «ឆ្នាំនេះមៀនប៉ៃលិន មានការខូចខាតខ្លះ​ ដោយសារតែចម្ការបងប្អូនកសិករយើងមួយចំនួនខ្វះទឹកស្រោចស្រព ដោយឆ្នាំនេះរាំងយូរពេក។ ការណ៍ដែលអត់ទឹកនេះ បានធ្វើឱ្យការដាក់អកម៉ូនជំរុញផ្លែផ្កា របស់កសិករយើងនៅតំបន់ខ្លះ អត់បានផល»។ 
 

ទោះបីប្រឈមនឹងវិបត្តិអាកាសធាតុ ប៉ុន្តែកសិករនៅតែសប្បាយរីករាយក្នុងការប្រមូលផល ដោយគ្មានការព្រួយបារម្ភ ព្រោះថាឆ្នាំនេះទីផ្សារចិនបើកទូលាយ រីឯតម្លៃបានខ្ពស់ថែមទៀត។ ចាប់ពីខែកក្កដា ដល់ខែធ្នូ ក្រុមហ៊ុនចិន បានដាក់តម្លៃមៀនប៉ៃលិន ៣ ៦០០រៀល ក្នុងមួយគីឡូក្រាម។ ខែមករា ដល់ខែកុម្ភៈ មានតម្លៃ ៤ ០០០រៀល និងចាប់ពីខែ មីនា តទៅមានតម្លៃ ៤ ៥០០រៀល ក្នុងមួយគីឡូក្រាម។
 

លោក សារ ចំរើន យល់ថា នាពេលបច្ចុប្បន្ន តម្លៃលែងជាបញ្ហាចោទសម្រាប់កសិករទៀតហើយ។ ផ្ទុយទៅវិញ ពួកគេគួរត្រូវបន្តពង្រឹងការដាំដុះឱ្យល្អ និងត្រូវស្ដង់ដារ ស្របតាមលក្ខខណ្ឌតម្រូវរបស់ចិន។ 
 

លោក បន្ថែមដូច្នេះថា៖«ខ្ញុំគិតថាតម្លៃមៀនប៉ៃលិន មិនអាចដើរថយក្រោយទេ គឺវាមានតែទៅមុខរហូត។ គ្រាន់តែកសិករយើង ត្រូវតែពង្រឹងការដាំដុះឱ្យល្អ និងត្រូវស្ដង់ដាររបស់គេទៅបានហើយ ព្រោះធម្មតាមុននឹងទិញរបស់យើង ភាគីទាំងពីរ (កម្ពុជា-ចិន ) បានព្រមព្រៀងលើលក្ខខណ្ឌតម្រូវតម្រូវរួចអស់ហើយ»។ 
 

លោក ផែម វ៉ារី កសិករដាំមៀនប៉ៃលិន ប្រមាណ៤០០ដើម នៅស្រុកភ្នំព្រឹក ខេត្តបាត់ដំ​បង បានលើកឡើងដូចទៅនឹងលោក សារ ចំរើន ដែរថា ឆ្នាំនេះតម្លៃមៀនប៉ៃលិន ហក់ឡើងខ្ពស់ជាងឆ្នាំមុនៗ។ ជាក់ស្ដែងត្រឹមខែវិច្ឆិកានេះ នៅតំបន់របស់លោក អាចលក់បានតម្លៃ ៤ ០០០ ទៅ ៤ ៥០០រៀល ក្នុងមួយគីឡូក្រាម ធៀបនឹងពេលដូចគ្នាឆ្នាំ២០២២ មានតម្លៃប្រមាណ ៣ ០០០រៀល ប៉ុណ្ណោះក្នុងមួយគីឡូក្រាម។ 
 

តម្លៃនេះ អាចឱ្យលោក និងកសិករ ផ្សេងទៀតចំណេញបាន ដ្បិតថាឆ្នាំនេះជួបគ្រោះរាំងស្ងួតរយៈពេលវែងក៏ដោយ។ បញ្ហាអាកាសធាតុ មិនបានបំផ្លាញដាំមៀនប៉ៃលិនរបស់លោក វ៉ារី ទេ ប៉ុន្តែមានកសិករមួយចំនួនដែលនៅជុំវិញតំបន់លោក បានរងផលប៉ះពាល់ខ្លះ ដោយសារខ្វះប្រព័ន្ធទឹកស្រោចស្រព។ 
 

មៀនប៉ៃលិនមួយចំនួនធំ ត្រូវបានផ្គត់ផ្គង់ទៅកាន់ទីផ្សារប្រទេសចិនដោយផ្ទាល់ ហើយមួយចំណែកត្រូវចាក់បញ្ចូលទីផ្សារក្នុងស្រុក។ ការចូលមកទិញរបស់ក្រុមចិននៅពេលនេះ បានផ្ដល់ទំនុកចិត្តយ៉ាងខ្លាំងដល់កសិករខ្មែរ ក្នុងការធានាបាននូវតម្លៃល្អ និងទីផ្សារធំទូលាយ។ 
 

លោក ផែម វ៉ារី ប្រាប់ដូច្នេះថា៖«បានតម្លៃបែបៗនេះ ពួកយើងសប្បាយចិត្ត និងមានកម្លាំងចិត្តធ្វើបន្តទៀត ព្រោះអី វាអាចចំណេញបានមកវិញខ្លះ។ កន្លងទៅ យើងលក់ឱ្យឈ្មួញដែលចូលកន្លែង ដូច្នេះត្រូវគេទម្លាក់តម្លៃញឹកញាប់។ តែឥឡូវអត់ទេ គឺធ្វើតាមរយៈសហគមន៍ ហើយនាំចេញទៅចិនដោយផ្ទាល់»។ 
 

មួយឆ្នាំកន្លងទៅនេះ អគ្គនាយកដ្ឋានកសិកម្ម បានចុះបញ្ជីចម្ការមៀន និងរោងចក្រវេចខ្ចប់ សម្រាប់នាំចេញផ្លែមៀនស្រស់ទៅចិន​បាន ៩៧ក្រុមហ៊ុន-ម្ចាស់ចម្ការ និងរោងចក្រវេចខ្ចប់ចំនួន១២ ដោយបានការអនុម័តទទួលស្គាល់ជាផ្លូវការពីអគ្គរដ្ឋបាលគយចិន (GACC)។
 

ចាប់ពីខែតុលា ឆ្នាំ២០២២ ដល់តុលា ឆ្នាំ២០២៣ ការនាំចេញផ្លែមៀនស្រស់កម្ពុជាទៅចិន សរុប ១៤ ៣៤៥,៧៤តោន ។ ក្នុងនោះ មានចំនួន ២ ៩៤២,៥១តោន ឆ្នាំ២០២២ និង ១១ ៤០៣,២៣តោន នៅឆ្នាំ២០២៣។ ក្រៅពីការនាំចេញទៅកាន់ទីផ្សារប្រទេសចិន សហគ្រាសនៅកម្ពុជា កំពុងកែច្នៃផ្លែមៀនស្រស់របស់ខ្មែរ ទៅជាដំណាប់មៀន ផ្លែមៀនកំប៉ុង ទឹកមៀនកៀប និងស្រាមៀន ដែលមានដាក់លក់នៅតាមផ្សារទំនើបនានានៅក្នុងប្រទេសផងដែរ៕