តាមវចនានុក្រមខ្មែរ២០២២របស់ក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជា «ជក់» មាននិយមន័យដល់ទៅ៦ផ្សេងៗគ្នា។
-ជក់ [ន.] ប្រដាប់ធ្វើដោយរោមសត្វឬសរសៃសំបកឈើ សម្រាប់គូរ, សម្រាប់សរសេរ, សម្រាប់លាបថ្នាំទឹក។
-ជក់ [កិ.] បឺតស្រូបផ្សែង : ជក់បារី។
-ជក់ [កិ.] បឺតខ្យល់ : ក្ដោងជក់ខ្យល់, រនាំងជក់ខ្យល់ឡើងប៉ោង។
-ជក់ [កិ.] ស្រូប បឺតវត្ថុរាវខ្លះ : ក្រណាត់ជក់ទឹក, សំឡីជក់អាល់កុល។
-ជក់ [ន.] សរសៃតូចៗនៃសំបកផ្លែដូងឬស្រទបគល់ធាងត្នោត ដែលគេទាញចេញបន្ទាប់ពីដំឱ្យទក់ សម្រាប់កែច្នៃជាសម្ភារៈប្រើប្រាស់ផ្សេងៗ : អម្បោសជក់ដូង, អម្បោសជក់ត្នោត, ពួរជក់ដូង, ខ្សែជក់ត្នោត។
-ជក់ [កិ.] ជាប់ចិត្តយ៉ាងខ្លាំង, វក់ឬងប់នឹងអ្វីមួយ : ជក់មើលរឿងភាគ, គាត់ជក់នឹងល្បែង។
«ជក់ចិត្ត» មានន័យថា ស្លុងចិត្ត ដក់ចិត្ត ជាប់ចិត្ត : គាត់ជក់ចិត្តនឹងទេសភាព, ទេសភាពដ៏សែនជក់ចិត្ត។ «ជក់ភ្នែក» គឺខំសម្លឹងមើលអ្វីមួយជាប់សឹងមិនដាក់ភ្នែក : កុមារនេះជក់ភ្នែកនឹងភាពយន្តគំនូរជីវចល។
«ជក់អារម្មណ៍» គឺ ស្លុងអារម្មណ៍ ជាប់អារម្មណ៍ : ជក់អារម្មណ៍នឹងទេសភាពធម្មជាតិ។ រីឯ «ជក់មាត់» មានន័យថា ដែលត្រូវមាត់ ជាប់មាត់នឹងរសជាតិអ្វីមួយ : រសជាតិថ្មីប្លែកឆ្ញាញ់ជក់មាត់តែម្ដង។ «ជក់មាត់» ក៏ជាសំនួនវោហារផងដែរ គឺសំដៅលើជ្រុលមាត់ឬជាប់មាត់និយាយស្ដីបន្តអ្វីមួយ : ជក់មាត់និយាយ, និយាយជក់មាត់៕