តាមរយៈព្រះរាជសារក្នុងទិវាបុណ្យឯករាជ្យជាតិ ព្រះមហាក្សត្រ បានរម្លឹកដល់គុណូបការៈដល់សម្ដេចនរោត្ត សីហនុ ព្រះបរមរតនកោដ្ឋ ដែលបានធ្វើព្រះរាជបូនីយកិច្ច ក្នុងការទាមទារឯករាជ្យពេញលេញពីបារាំងមកវិញ។ 
 

«អង្គមីទ្ទីញនាពេលនេះ គឺជាមហាព្រឹត្តិការណ៍ជាតិដ៏មានអត្ថន័យឆ្លើយតបបានយ៉ាងស័ក្តសមទៅនឹងបេសកកម្ម និងពលិកម្មប្រកបដោយមនសិកាជាតិដ៏ខ្ពង់ខ្ពស់បំផុតរបស់ព្រះមហាវីរក្សត្រ ព្រះវររាជវបិតាឯករាជ្យជាតិ ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត»។ នេះជាព្រះរាជសាររបស់ព្រះមហាក្សត្រ ដែលបានបន្ថែមព្រះរាជឱង្ការរម្លឹកគុណសម្បត្តិរបស់រដ្ឋាភិបាល និងថ្នាក់ដឹកនាំគ្រប់ស្ថាប័ន ក្នុងការអភិវឌ្ឍគ្រប់វិស័យ ដែលនាំឱ្យកម្ពុជា មានភាពរីកចម្រើនមកដល់សព្វថ្ងៃនេះ។
 

ទន្ទឹមនេះ ព្រះអង្គក៏មានព្រះរាជឱង្ការអំពាវនាវឱ្យប្រជាពលរដ្ឋគ្រប់មជ្ឈដ្ឋាន រួបរួមសាមគ្គីគ្នាជាធ្លុងមួយ ក្រោមដំបូលរដ្ឋធម្មនុញ្ញ និងច្បាប់រដ្ឋ ដើម្បីចូលរួមចំណែកការពារ និងកសាងមាតុភូមិលើគ្រប់វិស័យ។ «តាមរយៈមីទ្ទីញនេះ យើងអាចសន្និដ្ឋានបានថា មាតុភូមិ និងប្រជាជនកម្ពុជាយើង ពិតជាទទួលបានអនាគតភ្លឺស្វាង ក្នុងក្តីសង្ឃឹមខ្ពស់ រស់នៅក្រោមដំបូលរដ្ឋធម្មនុញ្ញតែមួយ តែធានាបានឯកភាពជាតិដ៏រឹងមាំ»។ ព្រះអង្គមានព្រះរាជឱង្ការបន្ថែមដូច្នេះ។