សហព័ន្ធកីឡាតេក្វាន់ដូ ITF នឹងរៀបចំការប្រកួតពានរង្វាន់ ហ៊ុន ម៉ានី ឆ្នាំ២០២៣ ចាប់ពីថ្ងៃទី១៧-១៩ ខែវិច្ឆិកា នៅសាកលវិទ្យាល័យភូមិន្ទភ្នំពេញ។ ជាលើកទី១ ដែលសហព័ន្ធរៀបចំ ពានរង្វាន់ ហ៊ុន ម៉ានី ជាពានបន្ទាប់ពីការប្រកួតថ្នាក់ជាតិ កាលពីថ្ងៃទី១៤-១៦ ខែកក្កដា ឆ្នាំ២០២៣។
 

លោក បួនហ៊ីង សុធីយ៉ា បានប្រាប់សារព័ត៌មានថ្មីៗ តាមតេលេក្រាមថា សហព័ន្ធ ចង់ឲ្យមានការប្រកួតញឹកញាប់ ដើម្បីឲ្យកីឡាករ-កីឡាការិនី មានឱកាសបញ្ចេញនូវអ្វី ដែលបានហ្វឹកហាត់។ ម្យ៉ាងវិញទៀត អ្នកទាំងនោះ ក៏នឹងទទួលបានបទពិសោធន៍ជាក់ស្ដែងពីការប្រកួតផងដែរ។ 
 

ក្រៅអំពីសិទ្ធផលកីឡាករ-កីឡាការិនី អគ្គលេខាធិការរូបនេះ បន្ថែមថា រៀបចំការប្រកួតញឹកញាប់ ធ្វើឲ្យមន្ដ្រីបច្ចេកទេស អាជ្ញាកណ្ដាល ចៅក្រម និងគណៈកម្មការរៀបចំការប្រកួត ក៏អាចពង្រឹងសមត្ថភាព គុណភាព ដែលអាចឲ្យអ្នកទាំងនោះ មានសមត្ថភាពរៀបចំព្រឹត្តិការណ៍ធំ ទាំងថ្នាក់ជាតិ និងអន្ដរជាតិ។
 

«យើង រៀបចំការប្រកួតច្រើន កីឡាករ-កីឡាការិនី នៃក្លិប និងសមាគម របស់យើង ពួកគាត់មានឱកាសច្រើន ក្នុងប្រកួតប្រជែង ដោយបញ្ចេញសមត្ថភាព។ ទាំងក្លិប ទាំងសមាគម ពួកគាត់កាន់តែមានគោលដៅក្នុងការពង្រឹងធនធានកីឡាករ-កីឡាការិនី ដើម្បីប្រជែងពាន ផងដែរ។ ចំណែក អាជ្ញាកណ្ដាល ចៅក្រម និងគណៈកម្មការរៀបចំ ក៏បានបទពិសោធន៍ និងការពង្រឹងសមត្ថភាព ក្នុងការរៀបចំការប្រកួតផងដែរ។»។ អគ្គលេខាធិការសហព័ន្ធតេក្វាន់ដូ ITF រូបនេះ បាននិយាយដូច្នេះ។
 

លោក សុធីយ៉ា បន្ថែមថា ក្រុមកីឡាករ-កីឡាការិនីជម្រើសជាតិមុនៗ មានខ្លះ ក៏ធ្លាក់សិទ្ធផល ព្រោះតែមានវ័យច្រើន ដូច្នេះត្រូវការកីឡាករ-កីឡាការិនីវ័យក្មេង ដើម្បីបន្ដវេន។ មន្ដ្រីជាន់ខ្ពស់សហព័ន្ធរូបនេះ បញ្ជាក់ថា ការប្រកួតពានរង្វាន់នេះ គឺជាឱកាសសម្រាប់សហព័ន្ធ រើសយកកីឡាករ-កីឡាការិនីថ្នាល់ ដែលមានសមត្ថភាព និងភាពពិនប្រសព្វ ចូលហ្វឹកហាត់ជាមួយក្រុមជម្រើសជាតិ ដើម្បីត្រៀមប្រកួតព្រឹត្តិការណ៍អន្ដរជាតិនានា ដូចជាជើងអាស៊ី លើកទី១០ នៅឆ្នាំ២០២៤ ជាដើម។
 

ការប្រកួតនេះ ចែកចេញជា ២វ័យ ដែលសរុបមាន ២៩វិញ្ញាសា។ 
 

វិញ្ញាសាមេគុនឯកត្តជន ខ្សែក្រវ៉ាត់ក្រោមខ្មៅ បុរស

វិញ្ញាសាមេគុនឯកត្តជន ខ្សែក្រវ៉ាត់ក្រោមខ្មៅ នារី

វិញ្ញាសាប្រយុទ្ធ បុរស (៥០គីឡូក្រាម, ៥៥គីឡូក្រាម និង ៦០គីឡូក្រាម)

វិញ្ញាសាប្រយុទ្ធ នារី (៤៥គីឡូក្រាម, ៥០ គីឡូក្រាម និង ៥៥គីឡូក្រាម)
 

វិញ្ញាសាមេគុនខ្សែក្រវ៉ាត់ក្រោមខ្មៅ ឯកត្តជន បុរស

វិញ្ញាសាមេគុនខ្សែក្រវ៉ាត់ក្រោមខ្មៅ ឯកត្តជន នារី

វិញ្ញាសាមេគុនខ្សែក្រវ៉ាត់ខ្មៅ ១ជាន់ ឯកត្តជនបុរស

វិញ្ញាសាមេគុនខ្សែក្រវ៉ាត់ខ្មៅ ១ជាន់ ឯកត្តជន នារី
 

វិញ្ញាសាមេគុន ខ្សែក្រវ៉ាត់ខ្មៅ ១ជាន់ ឯកត្តជន បុរស

វិញ្ញាសាមេគុន ខ្សែក្រវ៉ាត់ខ្មៅ ១ជាន់ ឯកត្តជន នារី

វិញ្ញាសាមេគុន ខ្សែក្រវ៉ាត់ខ្មៅ ២ជាន់ ឯកត្តជន បុរស

វិញ្ញាសាមេគុន ខ្សែក្រវ៉ាត់ខ្មៅ ២ជាន់ ឯកត្តជន នារី
 

បុរស (៥០, ៥៥, ៦០, ៦៥គីឡូក្រាម)

នារី (៤៥, ៥០, ៥៥, ៦០ គីឡូក្រាម)

វិញ្ញាសាប្រយុទ្ធសម្រាប់ជម្រើសជាតិ

បុរស (៥២ ដល់ ៥៨ គីឡូក្រាម, ៥៨ ដល់ ៦៤គីឡូក្រាម, ៦៤ ដល់ ៧០គីឡូក្រាម)

នារី (៤៨ ដល់ ៥៥គីឡូក្រាម, ៥៥ ដល់ ៦៥គីឡូក្រាម)៕