អន្តរជាតិ
អូស្ត្រាលីរិះគន់ចិនចំពោះអន្តរកម្មនាវាចរណ៍ដែលគ្មានសុវត្ថិភាព និងគ្មានវិជ្ជាជីវៈ
× រដ្ឋាភិបាលអូស្ត្រាលីនាថ្ងៃទី១៨ ខែវិច្ឆិកាបានព្រួយបារម្ភយ៉ាងខ្លាំង បន្ទាប់ពីអន្តរកម្ម គ្មានសុវត្ថិ ភាព និងគ្មានវិជ្ជាជីវៈ រវាងនាវាកងទ័ពជើងទឹកអូស្ត្រាលី និងនាវាចម្បាំងចិនបានធ្វើឱ្យអ្នកមុជ ទឹកយោធាអូស្ត្រាលីរងរបួស។
រដ្ឋមន្ត្រីក្រសួងការពារជាតិ លោក Richard Marles បានលើកឡើងថា នាវាចម្បាំង HMAS Toowoomba ដែលជានាវាចម្បាំងរយៈចម្ងាយឆ្ងាយបានធ្វើប្រតិបត្តិការមុជទឹកនៅក្នុងតំបន់ សេដ្ឋកិច្ចផ្តាច់មុខរបស់ជប៉ុនកាលពីថ្ងៃទី ១៤ ខែវិច្ឆិកា ដើម្បីជម្រះអួននេសាទចេញ ពីនាវានៅពេលឧប្បត្តិហេតុកើតឡើង។
«ខណៈពេលដែលប្រតិបត្តិការមុជទឹកកំពុងដំណើរការ នាវាពិឃាត (ចិន) PLA-N ដែលប្រតិបត្តិការនៅតំបន់ជុំវិញបាននៅជិតឆ្ពោះទៅរកនាវា HMAS Toowoomba»។ លោក Marles បញ្ជាក់ក្នុងសេចក្តីថ្លែង ការណ៍មួយបែបនេះរួចបន្តថា ទោះបីជានាវាអូស្ត្រាលីបានជូន ដំណឹងដល់នាវាចម្បាំងចិនអំពី ប្រតិបត្តិការមុជទឹក និងស្នើសុំឱ្យចិនឱ្យរក្សាភាពច្បាស់លាស់ ក៏ដោយ ក៏នាវាពិឃាតបានចូលទៅជិតក្នុងចម្ងាយកាន់តែជិតដដែល។
លោក Marles សង្កត់ធ្ងន់ថា ការប្រព្រឹត្តនេះគឺ គ្មានសុវត្ថិភាព និងគ្មានវិជ្ជាជីវៈ។ មកទល់ពេលនេះ ស្ថានទូតចិនប្រចាំអូស្រ្តាលីមិនទាន់បានឆ្លើយតបថា យ៉ាងណាឡើយ។
ការវិនិច្ឆ័យវិជ្ជសាស្ត្របានរកឃើញគ្រោះថ្នាក់ និងរបួសស្រាលដល់អ្នកមុជទឹកអូស្ត្រាលីដែល បង្កឡើងដោយសារសូណារបស់នាវា។
ទន្ទឹមនេះ រដ្ឋមន្ត្រីក្រសួងការពារជាតិអូស្ត្រាលីរូបនេះ រំពឹងថា រាល់ប្រទេសទាំងអស់ រួមទាំង ចិនផងដែរ ត្រូវតែប្រកាន់ខ្ជាប់ថាប្រតិបត្តិការយោធារបស់ពួកគេត្រូវតែប្រកបដោយវិជ្ជាជីវៈ និងសុវត្ថិភាព។ បន្ថែមពីនេះ សុវត្ថិភាព និងសុខុមាលភាពរបស់បុគ្គលិកយោធាអូស្ត្រាលី គឺជា អាទិភាពធំបំផុតរបស់រដ្ឋាភិបាល។
ចិនបានលេចឡើងក្នុងប៉ុន្មានឆ្នាំថ្មីៗនេះក្នុងនាមជាមហាអំណាចកាន់តែខ្លាំងឡើងនៅក្នុង តំបន់ឥណ្ឌូប៉ាស៊ីហ្វិករួមទាំងការធ្វើឱ្យប្រសើរឡើងនូវទំនាក់ទំនងសន្តិសុខជាមួយកោះសូឡូ ម៉ុននៅក្នុងខែកក្កដា។ ចំណែកឯអូស្ត្រាលី កាលពីដើមឆ្នាំនេះ បានធ្វើសមយុទ្ធសង្រ្គាមរយៈ ពេលពីរសប្តាហ៍ដែលពាក់ព័ន្ធនឹងទាហានជាង ៣ ម៉ឺននាក់ជាមួយអាម៉េរិក នៅក្នុងការបង្ហាញ កម្លាំងចំពេលមានការកើនឡើងនៃឥទ្ធិពលក្នុងតំបន់របស់ចិន៕
© រក្សាសិទ្ធិដោយ thmeythmey.com