ឡាវកំពុងខិតខំប្រឹងប្រែងបង្កើនការនាំចេញថាមពលអគ្គិសនីទៅកាន់ប្រទេសជិតខាងក្នុងតំបន់អាស៊ីអាគ្នេយ៍ និងជំរុញការអភិវឌ្ឍប្រភពថាមពលកកើតឡើងវិញ ដោយក្តីសង្ឃឹមនឹងក្លាយជាប្រភពបម្រុងការផ្គត់ផ្គង់អគ្គិសនីក្នុងតំបន់នាពេលអនាគត។

 

ជាច្រើនឆ្នាំមកនេះ រដ្ឋាភិបាលឡាវបានផ្តោតការយកចិត្តទុកដាក់ខ្លាំងលើការអភិវឌ្ឍប្រភពថាមពល និងហេដ្ឋារចនាសម្ព័ន្ធដែលពាក់ព័ន្ធ។ ទិន្នន័យពីក្រសួងថាមពល និងរ៉ែឡាវបង្ហាញថា បច្ចុប្បន្នប្រទេសនេះមានទីតាំងផលិតថាមពលអគ្គិសនីចំនួន៩៤ ដែលមានសមត្ថភាពជាង ១១,៦ជីហ្កាវ៉ាត់ (GW) ក្នុងនោះ ៨១រោងចក្រជាវារីអគ្គិសនី និងនៅសេសសល់ជារោងចក្រដើរដោយថាមពលធ្យូងថ្ម ថាមពលពន្លឺព្រះអាទិត្យ ថាមពលកម្តៅជីវម៉ាស។ 

 

នៅឆ្នាំ២០២២ ការនាំចេញអគ្គិសនីឡាវទទួលបានប្រាក់ចំណូលជាង ២,៣ពាន់លានដុល្លារ ខណៈប្រទេសនេះចំណាយត្រឹមតែជាង ៤០លានដុល្លារប៉ុណ្ណោះសម្រាប់ការនាំចូលអគ្គិសនី។

 

បើតាមក្រសួងថាមពល និងរ៉ែឡាវ បច្ចុប្បន្នប្រទេសនេះកំពុងនាំចេញអគ្គិសនីទៅកាន់ប្រទេសចំនួន៦ រួមមានថៃ ចិន មីយ៉ាន់ម៉ា វៀតណាម កម្ពុជា និងសិង្ហបុរី។ 

 

នាពេលខាងមុខ ឡាវនឹងបន្តការចរចាដើម្បីបង្កើនការនាំចេញថាមពលអគ្គិសនី ព្រមទាំងជ្រើសរើសការអភិវឌ្ឍប្រភពថាមពលប្រកបដោយប្រសិទ្ធភាពខ្ពស់ គុណភាពល្អ ការវិនិយោគទាប ដើម្បីស្របតាមនិន្នាការបច្ចុប្បន្ន។ ក្នុងនោះ វារីអគ្គិសនីមានចំណែកដល់ទៅ៧០ភាគរយនៃការផលិតអគ្គិសនីសរុប ហើយប្រទេសនេះមានគម្រោងថាមពលខ្យល់នៅលើគោកប្រហែល១០ ដែលមានសមត្ថភាពដំឡើងសរុប ៣,៦ជីហ្គាវ៉ាត់ (GW) តែនៅក្នុងដំណាក់កាលធ្វើផែនការនៅឡើយ។

 

នៅថ្ងៃទី១៤ ខែវិច្ឆិកា ឡាវបានដំឡើងតួប៊ីនទី១ នៃគម្រោងថាមពលខ្យល់មូសុងដែលមានកម្លាំង៦០០មេហ្កាវ៉ាត់នៅស្រុក Dakcheung ខេត្ត Xekong ជាប់នឹងវៀតណាម។

 

គម្រោងថាមពលខ្យល់មូសុងនេះ នឹងក្លាយជារោងចក្រថាមពលខ្យល់ដ៏ធំបំផុតនៅអាស៊ីអាគ្នេយ៍នាពេលបច្ចុប្បន្ន ជាមួយនឹងតួប៊ីនខ្យល់ចំនួន១៣៣ដើម ដែលមានតម្លៃវិនិយោគប្រហែល ៩០០លានដុល្លារ។

 

គម្រោងនេះមិនត្រឹមតែជាផ្នែកនៃផែនការអភិវឌ្ឍថាមពលស្អាត ដើម្បីការពារបរិស្ថាន និងប្រព័ន្ធអេកូឡូស៊ី រួមចំណែកធានាសន្តិសុខថាមពល និងបំពេញតម្រូវការក្នុងស្រុកប៉ុណ្ណោះទេ ប៉ុន្តែថែមទាំងបម្រើដល់ការនាំចេញ និងឆាប់សម្រេចគោលដៅក្លាយជាប្រភពបម្រុងថាមពលសម្រាប់អាស៊ីអាគ្នេយ៍៕