ការបោះឆ្នោតប្រធានាធិបតី និងសភាតៃវ៉ាន់ នឹងធ្វើឡើងនៅក្នុងខែមករាខាងមុខ ស្របពេលប្រធានបទចិន បានក្លាយជាការឃោសនាដ៏សំខាន់នៅក្នុងដែនកោះមួយនេះ។ 

 

ថ្លែងទៅកាន់អ្នកសារព័ត៌មាន បន្ទាប់ពីចុះឈ្មោះប្រកួតប្រជែងក្នុងការបោះឆ្នោតប្រធានាធិបតីរួច លោក William Lai ប្រធានបក្សប្រជាធិបតេយ្យជឿនលឿន (DPP) និងជាអនុប្រធានាធិបតីតៃវ៉ាន់ បានលើកឡើងថា សន្តិសុខកោះតៃវ៉ាន់ ជាបញ្ហាអន្តរជាតិ ហើយពិភពលោក កំពុងតាមដានការបោះឆ្នោតនេះ។ 

 

«ប្រជាជនតៃវ៉ាន់ ត្រូវតែជ្រើសយករវាងតៃវ៉ាន់ប្រកបដោយទំនុកចិត្ត ដែលអនុញ្ញាតឱ្យបន្តដំណើរលើវិថីប្រជាធិបតេយ្យ ឬពឹងផ្អែកចិន ដោយគោរពតាមវិថីចាស់គោលការណ៍ចិនតែមួយ និងក្រសោបយកចិន»។ លោក Lai បានសង្កត់ធ្ងន់បែបនេះ នៅថ្ងៃទី២១ ខែវិច្ឆិកា។ 

 

ចិនតែងតែចាត់ទុកកោះតៃវ៉ាន់ជាដែនដីមួយរបស់ខ្លួន ហើយទាមទារឱ្យដែនដីទាំងពីរបង្រួបបង្រួមជាមួយគ្នាប្រកបដោយសន្តិភាព។ ប៉ុន្តែរដ្ឋាភិបាលក្រុងប៉េកាំង ក៏បានមិនបោះបង់ការប្រើប្រាស់កម្លាំងយោធាដែរ ប្រសិនបើក្រុងតៃប៉ិហ៊ានប្រកាសឯករាជ្យ។ ចិន ក៏តែងចាត់ទុកបក្សប្រជាធិបតេយ្យជឿនលឿន ជាកម្លាំងគាំទ្រឯករាជ្យកោះតៃវ៉ាន់។ 

 

នៅតៃវ៉ាន់ បក្សគូមីនតាង (KMT) ជាបក្សប្រឆាំងដ៏សំខាន់មួយ និងតែងបង្ហាញពីទំនោរគាំទ្ររដ្ឋាភិបាលក្រុងប៉េកាំង ដោយខុសផ្ទុយពីបក្សបក្សប្រជាធិបតេយ្យជឿនលឿន ដែលតែងរិះគន់ចិនពីសកម្មភាពយោធា និងការដាក់សម្ពាធមកលើដែនកោះរបស់ខ្លួន។ 

 

នៅថ្ងៃទី២០ ខែវិច្ឆិកា លោក Lai បានប្រកាស​លោកស្រី Hsiao Bi-khim ជាដៃគូរបស់ខ្លួនក្នុងការបោះឆ្នោតប្រធានាធិបតី។ លោកស្រី Hsiao Bi-khim នឹងចូលរួមប្រជែងតំណែងអនុប្រធានាធិបតី។ លោក Lai ក៏បានបញ្ជាក់ផងដែរថា ចិនមានបំណងជ្រៀតជ្រែកក្នុងការបោះឆ្នោតតៃវ៉ាន់។ 

 

សូមបញ្ជាក់ថា លោកស្រី Hsiao Bi-khim ដែលជាអតីតតំណាងតៃវ៉ាន់ប្រចាំនៅអាម៉េរិក ធ្លាប់រងទណ្ឌកម្មរបស់ចិន កាលពីខែមេសា ឆ្នាំ២០២៣។ ចិន បានហាមឃាត់ក្រុមហ៊ុន និងអ្នកវិនិយោគ ដែលបានពាក់ព័ន្ធនឹងលោកស្រី Hsiao មិនឱ្យរកស៊ីនៅចិន៕