​

ដោយ ៖ ធន់ សេងហុង​

(អន្តរជាតិ សង្គម) ម៉ាឡេស៊ី , សភា , ពហុពន្ធភាព 

 

សមាជិកសភា Tuan Ibrahim Tuan Man បានស្នើឱ្យបុរសមូស្លីមរៀបការជាមួយប្រពន្ធលើសពីមួយ ដើម្បីដោះស្រាយបញ្ហាស្ត្រីជាច្រើនដែលរៀបការយឺត។

 

លោក Tuan Ibrahim Tuan Man អនុប្រធានគណបក្សឥស្លាមម៉ាឡេស៊ី (PAS) បាននិយាយនៅថ្ងៃទី២២ ខែវិច្ឆិកាថា មនុស្សជាច្រើននៅតែចាត់ទុកថាពហុពន្ធភាពជាបញ្ហារសើប ប៉ុន្តែសម្រាប់បុរសដែលមានសមត្ថភាពគួរតែត្រូវបានគាំទ្រឱ្យរៀបការជាមួយប្រពន្ធច្រើន។

 

បើតាមកាសែត The Star ដែលដកស្រង់សម្តីសមាជិកសភា Tuan Ibrahim ម៉ាឡេស៊ីមានស្ត្រីនៅលីវជាង៨,៤លាននាក់ ហើយការ​ឱ្យ​បុរស​រៀបការ​ជាមួយប្រពន្ធ​ច្រើន​នឹង​ជួយ​ដោះស្រាយ​បញ្ហា​ស្ត្រី​រៀបការ​យឺត។

 

លោក Tuan Ibrahim បាននិយាយនៅសម័យប្រជុំសភាថា ៖« ខ្ញុំដឹងថា នេះមិនមែនជាដំណោះស្រាយចុងក្រោយទេ ប៉ុន្តែវាអាចដោះស្រាយបញ្ហានៃការរៀបការយឺត ហើយប្រាកដណាស់សមាជិកសភាបក្សប្រឆាំងមួយចំនួនក៏គាំទ្រដែរ»។

 

បើតាមច្បាប់ឥស្លាម ម៉ាឡេស៊ីអនុញ្ញាតឲ្យបុរសអាចរៀបការជាមួយប្រពន្ធបានរហូតដល់បួននាក់ ប៉ុន្តែទាមទារការយល់ព្រមពីតុលាការឥស្លាមរបស់រដ្ឋនីមួយៗ ក្រោយពីអាពាហ៍ពិពាហ៍លើកដំបូង។ សម្រាប់អ្នកមិនមែនជាមូស្លីម ពហុពន្ធភាពត្រូវបានហាមឃាត់នៅក្រោមច្បាប់អាពាហ៍ពិពាហ៍សហព័ន្ធម៉ាឡេស៊ីឆ្នាំ ១៩៧៦។

 

សំណើ​របស់​លោក Tuan Ibrahim ត្រូវ​បាន​មហាជន​ជាច្រើន​រិះគន់។ មេធាវី Siti Kasim បានលើកឡើងថា មានបញ្ហាជាតិសំខាន់ៗជាច្រើនដែលត្រូវលើកមកពិភាក្សានៅចំពោះមុខរដ្ឋសភា មិនមែនជាបញ្ហានៃការរៀបការយឺតយ៉ាវនោះទេ។ លោក Siti បានឲ្យលោក Tuan Ibrahim គួរតែសុំទោសស្ត្រី និងបុរសទាំងអស់។ 

 

ទន្ទឹមនេះ អង្គការជំនួយស្ត្រី (WAO) បានបញ្ជាក់ថា មុននឹងលើកកម្ពស់ពហុពន្ធភាព ចាំបាច់ត្រូវធានាថា បុរសយល់ច្បាស់អំពីទំនួលខុសត្រូវរបស់ពួកគេចំពោះភរិយាក្នុងការរស់នៅជាមួយគ្នា និងការចិញ្ចឹមកូន។

 

អង្គការនេះបាននិយាយថា  បុរសត្រូវយល់ថា ស្ត្រីមិនមែនគ្រាន់តែចង់រៀបការ និងមានកូនប៉ុណ្ណោះទេ យើងក៏ជាមនុស្សដែលសមនឹងទទួលបានការគោរព និងកិច្ចសហប្រតិបត្តិការស្មើភាពគ្នា និងមិនទទួលរងនូវអំពើហិង្សាក្នុងគ្រប់រូបភាព រួមទាំងហិរញ្ញវត្ថុ និងផ្លូវចិត្តផងដែរ។

 

ចំណែកនៅម៉ាឡេស៊ី ស្ត្រី​នៅលីវ​ជាច្រើន​​បាន​រិះគន់​សមាជិកសភា Tuan Ibrahim យ៉ាងខ្លាំង។ កញ្ញា Husna Karim អាយុ ៣៤ឆ្នាំជាអ្នកបង្កើតមាតិកាប្រព័ន្ធផ្សព្វផ្សាយបាននិយាយថា ស្ត្រីមិនទាន់រៀបការ មិនមែនជាបញ្ហាដែលត្រូវដោះស្រាយនោះទេ។ បើ​ចង់​ដោះស្រាយ ​គួរតែ​ផ្តោត​លើ​ឱកាស​ការងារ​សម្រាប់​យុវវ័យ ព្រោះ​មាន​មនុស្ស​ច្រើន​ចង់​រៀបការ ប៉ុន្តែ​មិន​ហ៊ាន ដោយសារ​តម្លៃ​រស់នៅ​ខ្ពស់ ដែលអាចនឹង​នាំ​ឱ្យ​មាន​ការ​លែង​លះ​ និង​​បែកបាក់គ្រួសារផងដែរ​៕