ជាតិ
USAID ប្រកាសគម្រោងការពារធនធានធម្មជាតិ និងជីវៈចម្រុះនៅកម្ពុជា ប្រជាពលរដ្ឋនៅសហគមន៍សម្រស់កោះហាន ស្ថិតក្នុងខេត្តស្ទឹងត្រែង ដុតជ័រច្បោះ។ រូបភាព៖ ឈុំ ចន្ថា
× ភ្នំពេញ៖ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) កាលពីថ្ងៃទី៤ ធ្នូ បានប្រកាសបើកគម្រោងថ្មីមួយ ឈ្មោះថា «USAID អភិរក្ស» ដើម្បីគាំទ្រដល់ការអភិរក្សជីវៈចម្រុះ ការពារប្រព័ន្ធអេកូឡូស៊ីសំខាន់ៗ និងលើកកម្ពស់ជីវភាពរបស់សហគមន៍នៅកម្ពុជា។ គម្រោងនេះ មានទឹកប្រាក់ ២៤លានដុល្លា សម្រាប់រយៈពេល៥ឆ្នាំ។
បើតាមសេចក្តីប្រកាសព័ត៌មានរបស់ USAID Cambodia គម្រោង «USAID អភិរក្ស» នឹងពង្រីកការគាំទ្ររបស់ខ្លួនទៅដល់សហគមន៍ដែលរស់នៅក្នុង និងជុំវិញតំបន់ការពារធម្មជាតិ ក្នុងខេត្តព្រះវិហារ កំពង់ធំ ស្ទឹងត្រែង និងក្រចេះ។ ក្រៅពីនោះ គម្រោងក៏នឹងអនុវត្តគំនិតផ្តួចផ្តើមថ្មីៗសម្រាប់សហគមន៍ទាំងឡាយ ដែលរស់នៅជុំវិញបឹងទន្លេសាប និងតាមតំបន់ឆ្នេរនៃខេត្តកោះកុង និងខេត្តព្រះសីហនុ ផងដែរ។
គម្រោងនេះ នឹងបង្កើតយុទ្ធនាការផ្លាស់ប្តូរឥរិយាបថសង្គម នៅថ្នាក់ជាតិ ខេត្ត ស្រុក និងឃុំ ដែលផ្តោតលើការប្រយុទ្ធប្រឆាំងការជួញដូរសត្វព្រៃខុសច្បាប់។ ជាមួយគ្នានេះ USAID ប្ដេជ្ញាពង្រីកការគាំទ្របន្តទៅលើគម្រោង ហិរញ្ញប្បទានកាបូនព្រៃឈើ ដែលធ្លាប់បានទទួលជោគជ័យកន្លងមក តាមរយៈការគាំទ្រដល់កិច្ចខិតខំប្រឹងប្រែងក្នុងការអភិវឌ្ឍគម្រោងប្ល៊ូកាបូននៅក្នុងតំបន់ព្រៃលិចទឹក និងតំបន់ឆ្នេរកម្ពុជា។
លោកស្រី Kerry Pelzman នាយិកាបេសកកម្មនៃ USAID បានលើកឡើងថា គម្រោង «USAID អភិរក្ស» បានឆ្លុះបញ្ចាំងអំពីការប្តេជ្ញាចិត្តចំពោះការធ្វើមូលដ្ឋានីយកម្មនៃជំនួយអភិវឌ្ឍន៍របស់អាមេរិក។
តាមរយៈគម្រោងនេះ USAID នឹងផ្ដល់ការគាំទ្រដល់សហគមន៍ក្នុងការបង្កើតការងារក្នុងស្រុក ដោយផ្អែកលើការប្រើប្រាស់ធនធានធម្មជាតិប្រកបដោយនិរន្តរភាព និងការប្រើប្រាស់ទុនឯកជនដើម្បី វិនិយោគក្នុងដំណោះស្រាយរយៈពេលវែងចំពោះវិបត្តិអាកាសធាតុ។ តាមរយៈវិធីសាស្រ្តនេះ គម្រោង «USAID អភិរក្ស» នឹងផ្តល់ការគាំទ្រដល់ការប្តេជ្ញាចិត្តរបស់រដ្ឋាភិបាលកម្ពុជាក្នុងការសម្រេចបាននូវអព្យាក្រឹតកាបូននៅ ឆ្នាំ២០៥០៕
Tag:
USAID
អភិរក្សជីវៈចម្រុះ
បរិស្ថាន
តំបន់ការពារធម្មជាតិ
© រក្សាសិទ្ធិដោយ thmeythmey.com