ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ ២០២៤ របស់ក្រសួងបរិស្ថាន នារសៀលថ្ងៃទី២១ ខែធ្នូ សម្ដេច ហ៊ុន ម៉ាណែត លើកឡើងថា អ្នកដែលរំលោភបំពានព្រៃឈើ កំពុងទទួលបានផលចំណេញយ៉ាងច្រើន ពីសកម្មភាពបំផ្លិចបំផ្លាញនេះ។ បើតាមសម្តេច អ្នកទាំងនោះ គឺត្រូវតែទទួលខុសត្រូវចំពោះមុខច្បាប់។  សកម្មភាពបែបនេះ សម្តេច នឹងមិនទុកឱ្យមានទៀតឡើយ ព្រោះដើម្បីប្រយោជន៍ប្រជាពលរដ្ឋទូទៅ និងប្រទេសជាតិ។ 

 

សម្ដេចនាយករដ្ឋមន្ត្រីបានបញ្ជាក់ថា ៖ « ការកាប់ព្រៃ និងរកសត្វ របស់ប្រជាសហគមន៍ មិនប៉ះពាល់ធ្ងន់ធ្ងរនោះទេ។ អ្វីដែលប៉ះពាល់ខ្លាំង គឺបទល្មើសព្រៃឈើទ្រង់ទ្រាយធំ»។ ពាក់ព័ន្ធនឹងបញ្ហានេះ សម្ដេច បញ្ជាឱ្យក្រសួងបរិស្ថាន ក្រសួងកសិកម្ម និងអាជ្ញាធរពាក់ព័ន្ធទាំងអស់ ត្រូវអនុវត្តច្បាប់ឱ្យបានតឹងរឹង ចំពោះអ្នកប្រព្រឹត្តបទល្មើសព្រៃឈើទ្រង់ទ្រាយធំ ព្រមទាំងអ្នកពាក់ព័ន្ធបទល្មើសធនធានធម្មជាតិ។ 

 

ជាមួយគ្នានេះ សម្ដេច ហ៊ុន ម៉ាណែត  ក៏ស្នើឱ្យ លោក សៅ សុខា ប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ គណៈបញ្ជាការឯកភាពរាជធានី-ខេត្ត និងកងរាជអាវុធហាត់ផ្ទៃប្រទេស ផ្ដល់ការគាំទ្រ និងចាត់វិធានការការពារឱ្យបានម៉ត់ចត់ ផងដែរ។
 

« អ្នកដែលរកស៊ីចំណេញពីព្រៃឈើនេះច្រើនពេក!  ឥឡូវ ត្រូវតែទទួលខុសត្រូវចំពោះមុខច្បាប់។ ក្រសួងបរិស្ថាន និងក្រសួងកសិកម្ម ត្រូវពង្រឹងកិច្ចសហការគ្នា និងយកចិត្តទុកដាក់ការពារឱ្យបាន ដើម្បីជាប្រយោជន៍សម្រាប់ប្រជាជនយើងទាំងអស់គ្នា។ យើងមិនទុកឱ្យមនុស្សតិចបានផល រីឯមនុស្សច្រើនត្រូវរងគ្រោះវេទនានោះទេ»។  នេះជាការលើកឡើងរបស់ សម្ដេច ហ៊ុន ម៉ាណែត។ 

 

ជារឿងៗ សម្ដេចតែងតែលិចឭព័ត៌មានបទល្មើសព្រៃឈើ ចេញពីបណ្ដាញសង្គមហ្វេសប៊ុក ខណៈអាជ្ញាធរខេត្ត និងមន្រ្តីមូលដ្ឋាន ហាក់ពុំមានវិធានការ។ សម្ដេច បាននិយាយទៅកាន់មន្រ្តីដែលពាក់ព័ន្ធ ថា​ ក្នុងករណីទាំងអស់នេះ មន្ត្រីគួរធ្វើយ៉ាងណាចាត់វិធានការឱ្យបានលឿន ដោយកុំចាំទាល់មានគេរាយការណ៍តាមហ្វេសប៊ុក។ 

សម្ដេច បន្តនិយាយដោយសង្កត់ធ្ងន់ដូច្នេះថា៖«​ដាវអាជ្ញាសឹកមានហើយ។ ការអនុវត្តខ្ញុំនៅពីក្រោយ តែត្រូវអនុវត្តឱ្យត្រឹមត្រូវ»៕