ក្រុមហ៊ុន Toyota Motor និង Honda Motor នឹងវិនិយោគប្រហែល ៥០ពាន់លានបាត (១,៤ពាន់លានដុល្លារ)ដូចៗគ្នា ដើម្បីផលិតរថយន្តនៅថៃ ខណៈ Isuzu Motors នឹងបណ្តាក់ទុនចំនួន ៣០ពាន់លានបាត (៨៦៦លានដុល្លារ) ហើយ Mitsubishi Motors ២០ពាន់លានបាត (៥៧៧លានដុល្លារ)។ បើតាមអ្នកពាក្យរដ្ឋាភិបាលថៃលោក Chai Wacharoke នៅថ្ងៃទី២៥ ខែធ្នូ ទំហំទឹកប្រាក់ទាំងនេះ ក៏រួមបញ្ចូលទាំងការផលិតរថយន្តភីកអាប់អគ្គិសនី។ 

 

ប្រទេសដែលមានសេដ្ឋកិច្ចធំទីពីររបស់អាស៊ីអាគ្នេយ៍មួយនេះ ជាអ្នកផលិត និងនាំចេញរថយន្តធំជាងគេនៅក្នុងតំបន់។ ក្រុមហ៊ុនផលិតរថយន្តជប៉ុន បានគ្រប់គ្រងលើវិស័យរថយន្តថៃអស់រយៈពេលជាច្រើនទសវត្សរ៍មកហើយ។ ទន្ទឹមនេះ ក្រុមហ៊ុនផលិតរថយន្តអគ្គិសនីចិននាពេលថ្មីៗនេះ ក៏បានបណ្តាក់ទុនយ៉ាងច្រើនផងដែរ។

 

ក្នុងកិច្ចសម្ភាសន៍ជាមួយទីភ្នាក់ងារព័ត៌មាន​ Reuters លោក Chai បានអះអាងថា ការវិនិយោគដោយក្រុមហ៊ុនផលិតរថយន្តជប៉ុន នឹងគាំទ្រដល់គោលនយោបាយរបស់រដ្ឋាភិបាលថៃក្នុងការផ្លាស់ប្តូរពីរថយន្តម៉ាស៊ីនចំហេះទៅជារថយន្តអគ្គិសនី។

 

ថៃដាក់គោលដៅបំប្លែងផលិតកម្មរថយន្តប្រចាំឆ្នាំប្រហែល១ភាគ៣ ដែលមានចំនួន ២,៥លានគ្រឿងទៅជារថយន្តអគ្គិសនីនៅឆ្នាំ២០៣០។ ជាពិសេសរដ្ឋាភិបាលថៃកំពុងរៀបចំការលើកទឹកចិត្តដល់ការវិនិយោគ និងការផ្លាស់ប្តូរទៅជាការផលិតរថយន្តអគ្គិសនី។

 

ការកាត់បន្ថយពន្ធ និងការឧបត្ថម្ភធនរបស់រដ្ឋាភិ​បាលថៃ បានទាក់ទាញក្រុមហ៊ុនផលិតរថយន្តចិនធំៗរួចហើយ រួមទាំងក្រុមហ៊ុន BYD និង Great Wall Motor ដែលបានប្តេជ្ញាចិត្តវិនិយោគ ១,៤៤ពាន់លានដុល្លារក្នុងរោងចក្រដែលទើបបង្កើតថ្មី ។ 

 

ទន្ទឹមនេះ នាយករដ្ឋមន្រ្តីថៃ លោក សេដ្ឋា ថាវីស៊ីន កាលពីដើមខែធ្នូក៏បានបង្ហាញនាយកប្រតិបត្តិក្រុមហ៊ុនផលិតរថយន្តអគ្គិសនី Tesla អំពីសក្តានុពលរបស់ថៃលើវិស័យរថយន្តផងដែរ៕