ជាតិ
ក្រសួងមុខងារសាធារណៈ នឹងរៀបចំស្ដង់ដារ SOP សម្រាប់ការប្រឡងរើសមន្រ្តី នាពេលអនាគត រូបភាពពីក្រសួងមុខងារសាធារណៈ
× ភ្នំពេញ៖ ក្នុងកិច្ចប្រជុំវាយតម្លៃ និងពិនិត្យឡើងវិញ លើដំណើរការរៀបចំការប្រឡងជ្រើសរើសមន្ត្រីកសិកម្មឃុំ នៅព្រឹកថ្ងៃទី២៦ ខែធ្នូនេះ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានប្រមូលធាតុចូល ដើម្បីគិតគូររៀបចំនិយាម SOP សម្រាប់រៀបចំការប្រឡងនាពេលអនាគត។ នេះបើតាមទំព័រហ្វេសប៊ុកក្រសួងមុខងារសាធារណៈ។
តាមរយៈកិច្ចប្រជុំខាងលើ សមាជិកគណៈកម្មការរៀបចំ អនុគណៈកម្មការ និងភាគីពាក់ព័ន្ធ បានលើកឡើងពីបញ្ហាប្រឈមមួយចំនួន ដែលជួបប្រទះទាំងក្នុងដំណាក់កាលមុនប្រឡង ការប្រឡង និងកំណែ ដើម្បីជាមូលដ្ឋានគោលសម្រាប់ការរៀបចំការប្រឡងបន្តបន្ទាប់។ មតិយោបល់ទាំងនោះ បានផ្ដល់ជាធាតុចូលយ៉ាងសំខាន់ សម្រាប់ លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែងជ្រើសរើសមន្ត្រីកសិកម្មឃុំ ។
លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ។ រូបភាពពីក្រសួងមុខងារសាធារណៈ
ជាមួយគ្នានេះលោក ហ៊ុន ម៉ានី ក៏បានវាយតម្លៃខ្ពស់ដល់ក្រសួង ស្ថាប័ន អង្គភាព ភាគីពាក់ព័ន្ធ ដែលជាចលករជួយឱ្យដំណើរការប្រឡងប្រជែង ប្រព្រឹត្តទៅបានដោយជោគជ័យ។
បើតាមក្រសួងមុខងារសាធារណៈ ការប្រឡងជ្រើសរើសមន្ត្រីកសិកម្មឃុំ ឆ្នាំ២០២៣នេះ ជាសមិទ្ធផលនៃចក្ខុវិស័យរបស់រាជរដ្ឋាភិបាល នីតិកាលទី៧ ក្នុងការរៀបចំការប្រឡងឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។
រូបភាពពីក្រសួងមុខងារសាធារណៈ
សូមបញ្ជាក់ថា ការប្រឡងប្រជែងជ្រើសរើសមន្ត្រីកសិកម្មឃុំ បានប្រព្រឹត្តទៅកាលពីថ្ងៃទី១៧ ខែធ្នូ ដោយមានបេក្ខជនចូលរួមប្រឡងប្រជែងសរុបចំនួន ៣១៧៣ នាក់។ ដំណើរការកំណែវិញ្ញាសា បានចប់សព្វគ្រប់នាថ្ងៃទី២២ ខែធ្នូ ដោយប្រើប្រាស់រយៈពេល៥ថ្ងៃ និងមានបេក្ខជនចំនួន២៥០នាក់ ក្នុងស្រី៩៤នាក់ ជាប់ជាស្ថាពរ និងមានបេក្ខជនជាប់បម្រុងចំនួន១០នាក់ ក្នុងមួយស្រុកផងដែរ៕
Tag:
ក្រសួងមុខងារសាធារណៈ
ហ៊ុន ម៉ានី
© រក្សាសិទ្ធិដោយ thmeythmey.com