RFI
អន្តរជាតិ
តុលាការជប៉ុនផ្ដន្ទាទោសប្រហារជីវិត ជនដែលបង្កអគ្គិភ័យនៅស្ទូឌីយោភាពយន្តគំនូរជីវចលក្យូតូ អគារស្ទូឌីយោផលិតភាពយន្តគំនូរជីវចល Kyoto Animation កំពុងឆាបឆេះដោយអណ្តាតភ្លើង ថ្ងៃទី១៨កក្កដា ២០១៩ AP
×
ដោយ៖ម៉ម ពិសី/RFI
ករណីអគ្គិភ័យបង្កឡើងដោយជនម្នាក់ នៅស្ទូឌីយោផលិតភាពយន្តគំនូរជីវចលមួយ នៅទីក្រុងក្យូតូ កាលពីឆ្នាំ២០១៩ បានធ្វើឲ្យជប៉ុនទាំងមូល មានការតក់ស្លុតជាខ្លាំង។ អគ្គិភ័យនេះ បានសម្លាប់ជីវិតមនុស្សចំនួន៣៦នាក់ និងរបួសជាង៣០នាក់។ នៅថ្ងៃទី២៥មករា តុលាការជប៉ុន បានសម្រេចផ្តន្ទាទោសប្រហារជីវិត ទៅលើជនដៃដល់ ដែលជាអ្នកបង្កអគ្គិភ័យនេះដោយចេតនា។
ជនឈ្មោះ Shinji Aoba បច្ចុប្បន្នអាយុ៤៥ឆ្នាំ ត្រូវបានតុលាការជប៉ុនផ្តន្ទាទោសប្រហារជីវិត ពីបទឧក្រិដ្ឋចំនួន៥ ក្នុងនោះមានបទមនុស្សឃាតដោយចេតនា បទប៉ុនប៉ងមនុស្សឃាត បង្ករបួសស្នាម និងបទបង្កអគ្គិភ័យដែលមានលក្ខណៈឧក្រិដ្ឋ។ ទោសប្រហារជីវិតនេះ ត្រូវបានស្នើដោយរដ្ឋអាជ្ញាជប៉ុន កាលពីខែធ្នូកន្លងទៅ។
នៅក្នុងសវនាការ ថ្ងៃទី២៥មករា មេធាវីការពារក្តីរបស់ជនជាប់ចោទ បានអះអាងថាថាកូនក្តីខ្លួនគ្មានទោសទេ ដោយព្យាយាមលើកអំណះអំណាង ថាជនជាប់ចោទមានបញ្ហាសតិស្មារតី មិនអាចបែងចែង អ្វីខុសអ្វីត្រូវ។ តែយ៉ាងណាង ចៅក្រុមជប៉ុនបានប្រកាសទទួលស្គាល់ថា ក្នុងពេលកើតហេតុ គឺជនជាប់ចោទ ឈ្មោះ Shinji Aoba ពិតជាមានសតិស្មារតីនឹងន អាចយល់ដឹងច្បាស់ អំពីទង្វើដែលខ្លួនកំពុងធ្វើ។ នៅក្នុងសវនាការ លោកចៅក្រមប្រធានអង្គជុំនំជំរះ បានលើកឡើងថា អំពើរបស់ជនជាប់ចោទ គឺជាអំពើព្រៃផ្សៃ និងអមនុស្សធម៌ខ្លាំងណាស់។
សូមរំលឹកថា ហេតុការណ៍អគ្គិភ័យ បានកើតឡើងនៅថ្ងៃទី១៨កក្កដា២០១៩ នៅអគារស្ទូឌីយោផលិតភាពយន្តគំនូរជីវចលដ៏ល្បីមួយ ឈ្មោះ KyoAni ក្នុងទីក្រុងក្យូតូ។ យោងតាមសាក្សីជាច្រើន ជនដៃដល់ឈ្មោះ Shinji Aoba បានសំរុកចូលមកក្នុងអគារ ហើយបានស្រែកថា “ពួកអ្នកឯងទាំងអស់គ្នានឹងស្លាប់” មុននឹងជះប្រេងសាំងដុតបង្កអគ្គិភ័យឆាបឆេះ។
មនុស្ស៣៦នាក់ បានស្លាប់ដោយអគ្គិភ័យ និងមានអ្នករបួសជាង៣០នាក់។ ភាគច្រើននៃជនរងគ្រោះ គឺសុទ្ធតែជាបុគ្គលិកវ័យក្មេងៗ ធ្វើការក្នុងស្ទូឌីយោផលិតភាពយន្តគំនូរជីវចល។ ហេតុការណ៍នេះ បានធ្វើឲ្យប្រជាជនជប៉ុនទូទាំងប្រទេស និងអ្នកស្នេហាវិស័យភាពយន្តគំនូរជីវចលជប៉ុន ទូទាំងពិភពលោក មានការតក់ស្លុតចិត្តជាខ្លាំង។
ជនដៃដល់បានធ្វើអំពើនេះ ដើម្បីសងសឹក ដោយចោទថាឌីយោ KyoAni បានលួចសាច់រឿងមួយ ដែលខ្លួនបាននិពន្ធ។ ជាការចោទដែលរដ្ឋអាជ្ញាជប៉ុន អះអាងថាជាការរវើរវាយរបស់ជនដាប់ចោទ។ កាលពីសវនាការនៅខែកញ្ញា ជនដៃដល់ ដែលរបួសឆេះខ្លួន ហើយជិះរទេះដើរលែងរួច ធ្លាប់បានសារភាពថា ខ្លួនមិននឹកស្មានថាអំពើរបស់ខ្លួន បានបណ្តាលឲ្យមានមនុស្សស្លាប់ និងរបួសច្រើនដល់ម្លឹងទេ។ ហើយក្នុងអង្គសវនាការនៅខែធ្នូ ជនជាប់ចោទ បានទទួលស្គាល់ថា ខ្លួនសមនឹងទទួលទោសប្រហារជីវិត ដូចអ្វីដែលក្រុមគ្រួសារជនរងគ្រោះបានទាមទារ។
គួរបញ្ជាក់ដែរថា ជប៉ុនស្ថិតក្នុងចំណោមប្រទេសមហាអំណាចប្រជាធិបតេយ្យមួយចំនួនតូច ដែលបន្តអនុវត្តទោសប្រហារជីវិត មិនខុសពីសហរដ្ឋអាមេរិក ឬឥណ្ឌា។ ការប្រហារជីវិតអ្នកទោសនៅជប៉ុន គឺធ្វើឡើងដោយការព្យួរក។ បើទោះជាមានការរិះគន់ខ្លះពីបរទេស តែមតិសាធារណៈជប៉ុនភាគច្រើនគាំទ្រ ឲ្យមានទោសប្រហារជីវិត។ បច្ចុប្បន្ននេះ នៅជប៉ុន មានអ្នកទោសចំនួន១០៧នាក់ ដែលកំពុងរងចាំការប្រហារជីវិត ដែលលើកចុងក្រោយបង្អស់ គឺបានធ្វើឡើងនៅឆ្នាំ២០២២៕
© រក្សាសិទ្ធិដោយ thmeythmey.com