លោក ប៊ូ ផានេត ប្រធានក្រុមការងារពលករនៅនាយកដ្ឋានអភិវឌ្ឍន៍ទេសចរណ៍ និងវប្បធម៌ រៀបរាប់ពីគោលបំណងនៃការដំឡើងបង្កាន់ដៃជណ្ដើរឈើទាំងនេះ គឺដើម្បីជួយសម្រួលដល់ការឡើងចុះរបស់ភ្ញៀវទេសចរ និងជួយការពារគ្រោះថ្នាក់ដល់ភ្ញៀវទេសចរ ដែលអាចនឹងកើតឡើងដោយថាហេតុណាមួយផង។ 
 

ជាមួយគ្នានេះ ការដំឡើងបង្កាន់ដៃនេះ ក៏ជួយបង្ការកុំឱ្យភ្ញៀវទេសចរចាប់តោង ឬប៉ះផ្ទាល់ទៅនឹងថ្មប្រាសាទ ដែលអាចនាំឱ្យសឹករឹករិលក្បាច់ចម្លាក់។ ជាពិសេស ជួយបង្ការកុំឱ្យរអិលនៅរដូវធ្លាក់ភ្លៀងទៀតផង។
  

លោក ផានេត ពន្យល់ថា បង្កាន់ដៃនេះបានប្រើឆ្អឹងដែកស្រោបឈើលើដើម្បីការពារកុំឱ្យច្រេះ និងមិនឱ្យប៉ះពាល់ដល់សោភ័ណភាពនៃប្រាសាទនោះទេ។ ប្រធានក្រុមការងារពលករនៅនាយកដ្ឋានអភិវឌ្ឍន៍ទេសចរណ៍ និងវប្បធម៌រូបនេះ បន្តថា ក្រុមទេសចរចម្រុះជាតិសាសន៍ ព្រមទាំងមគ្គទេសក៍ទេសចរជាច្រើន សប្បាយចិត្តនៅពេលឃើញអាជ្ញាធរជាតិអប្សរាដំឡើងបង្កាន់ដៃជណ្ដើរទាំងនេះ។
 

លោក យ៉ែម រ៉ូហ្សា មគ្គទេសក៍ទេសចរភាសាជប៉ុន បានសម្តែងក្តីរំភើប នៅពេលដែលបាននាំភ្ញៀវមកទស្សនាប្រាសាទអង្គរវត្ត ចំពេលដែលក្រុមការងារបានរៀបចំដំឡើងបង្កាន់ដៃជណ្ដើរនេះរួចរាល់។ មគ្គទេសក៍រូបនេះលើកឡើងថា៖ «កាលពីមុនជណ្ដើរទាំងនេះពិបាកឡើងចុះ ហើយនៅកន្លែងខ្លះដែលងងឹតបន្តិចផងនោះ ភ្ញៀវទេសចរដែលមានវ័យចំណាស់មួយចំនួនពិបាកឡើងចុះ។ ប៉ុន្តែពេលនេះ វាពិតមានភាពងាយស្រួលជាងកាលពីមុនឆ្ងាយណាស់»។ លោក រ៉ូហ្សា យល់ថា នេះជាគំនិតល្អ ដែលអាជ្ញាធរជាតិអប្សរាបានគិតគូរដល់សុវត្ថិភាពរបស់ភ្ញៀវទេសចរជាចម្បង៕