លោកស្រី Julie Bishop អតីតប្រមុខការទូតអូស្រ្តាលី ដែលបច្ចុប្បន្នជាអធិការបតីនៃសាកលវិទ្យាល័យជាតិអូស្ត្រាលី នឹងចូលកាន់តួនាទីបេ្រសិតរបស់អង្គការសហប្រជាជាតិ បន្តពីអ្នកការទូតសិង្ហបុរី Noeleen Heyzer ដែលលាលែងពីតំណែង។ បើតាម UN លោកស្រី Bishop មានបទពិសោធទូលាយផ្នែកគោលនយោបាយ ច្បាប់ និងបទពិសោធគ្រប់គ្រងជាន់ខ្ពស់។

 

លោកស្រី Bishop ដែលទទួលយកការតែងតាំងនេះ និយាយនៅក្នុងសេចក្តីថ្លែងការណ៍មួយថា លោកស្រីពិតជាមានកិត្តិយសយ៉ាងខ្លាំងដែលត្រូវបានតែងតាំងជាបេសកជនពិសេសនេះ។

 

រដ្ឋមន្ត្រី​​ការ​បរទេសអូស្ត្រាលី​លោកស្រី Penny Wong បាន​ស្វាគមន៍​ចំពោះ​ព័ត៌មានតែងតាំងនេះ។ លោកស្រី Wong និយាយថា​ លោកស្រី Bishop នាំយកបទពិសោធជាច្រើនដល់តួនាទីថ្មីនេះ ហើយការតែងតាំងនេះ ធ្វើឡើងក្នុងពេលវេលាដ៏សំខាន់មួយ នៅពេលដែលស្ថានភាពនយោបាយ មនុស្សធម៌ និងសន្តិសុខនៅមីយ៉ាន់ម៉ាកាន់តែអាក្រក់ទៅៗ។

 

«ប្រជាជនមីយ៉ាន់ម៉ានៅតែបន្តបង្ហាញពីការតាំងចិត្តដ៏អស្ចារ្យនៅចំពោះមុខអំពើហិង្សា និងការរំលោភសិទ្ធិមនុស្សធ្ងន់ធ្ងរ ហើយអូស្ត្រាលីនៅតែមានការតាំងចិត្តគាំទ្រចំពោះពួកគេ។» លោកស្រី Wong បញ្ជាក់បែបនេះ ដោយឆ្លៀតបង្ហាញជំហររបសអូស្រ្តាលីដែលនឹងធ្វើការយ៉ាងជិតស្និទ្ធជាមួយលោកស្រី Bishop អាស៊ាន និងសហគមន៍អន្តរជាតិ ដើម្បីកសាងលក្ខខណ្ឌសម្រាប់សន្តិភាពប្រកបដោយនិរន្តរភាពនៅមីយ៉ាន់ម៉ា។

 

មីយ៉ាន់ម៉ា ធ្លាក់ចូលវិបត្តិនយោបាយក្រោយរដ្ឋប្រហារខែកុម្ភៈ ឆ្នាំ២០២១ ។ បន្ថែមពីលើនេះ ការប៉ះទង្គិចរវាងកងទ័ព និងក្រុមប្រដាប់អាវុធជនជាតិភាគតិចជាច្រើនក្រុម រុញឱ្យស្ថានភាពក្នុងប្រទេសកាន់តែធ្ងន់ធ្ងរថែមទៀត៕