នៅថ្ងៃទី៥ ខែមេសា ឆ្នាំ២០២៤នេះ លោក នួន ផារ័ត្ន អភិបាលរងរាជធានីភ្នំពេញ និងលោកស្រី Yung Yeon SHIN នាយករងនៃទីភ្នាក់ងារKOICA បានចុះហត្ថលេខាលើកំណត់ហេតុនៃកិច្ចប្រជុំពិភាក្សាលើ គម្រោងនេះ ក្រោមវត្តមាន លោក ឃួង ស្រេង អភិបាលរាជធានីភ្នំពេញ។

 

លោក នួន ផារ័ត្ន បានសរសរនៅលើទំព័រហ្វេសប៊ុករបស់លោកថា៖«អគារមន្ទីរពេទ្យដ៏ធំនឹងលេចរូបរាងឡើង នៅទីតាំងមន្ទីរពេទ្យបង្អែកដង្កោ តាមរយៈជំនួយឥតសំណងរបស់ទីភ្នាក់ងារ KOICA ដែលមានទំហំទឹកប្រាក់ ១១ លានដុល្លារ។ សមិទ្ធផលនេះ កើតមកពីកិច្ចខិតខំប្រឹងប្រែងរបស់ក្រុមការងារយើង អស់រយៈពេលជាង ២ ឆ្នាំមកនេះ។»។

 

យោងតាមសេចក្ដីប្រកាសព័ត៌មានដែលត្រូវបានផ្សព្វផ្សាយនៅលើហ្វេសប៊ុករបស់ KOICA គម្រោងពង្រីកមន្ទីរពេទ្យបង្អែកដង្កោ ដែលមានរយៈពេល៦ឆ្នាំ (២០២៤ ដល់ ២០២៩) ដែលមានតម្លៃ១១លានដុល្លារនេះ នឹងធ្វើឱ្យមន្ទីរបច្ចុប្បន្ននេះ ក្លាយជាមន្ទីរពេទ្យទំនើបដែលត្រូវបំពាក់ដោយគ្រឿងបរិក្ខារវេជ្ជសាស្ត្រដែលប្រើប្រព័ន្ធបច្ចេកវិទ្យាឈានមុខ និងគ្រូពេទ្យដែលមានជំនាញ និងវិជ្ជាជីវៈខ្ពស់។

 

សេចក្ដីប្រកាសព័ត៌មានដដែលបន្តថា មន្ទីរពេទ្យទំនើបថ្មីនោះនឹងផ្ដល់សេវាជាច្រើនដូចជា ការវះកាត់កម្រិតមធ្យម សម្ភព សេវាថែទាំសុខភាពកុមារ ជាដើមសម្រាប់ប្រជាជននៅក្នុងខណ្ឌដង្កោ និងប្រជាជននៅតំបន់ជុំវិញផងដែរ។

 

កាសែត ខ្មែរថាមស៍ បានស្រង់ប្រសាសន៍របស់លោក ឃួង ស្រេង អភិបាលរាជធានីភ្នំពេញដែលពន្យល់អំពីមូលហេតុនៃរាជធានីភ្នំពេញសម្រេចចិត្តពង្រីកនិងអភិវឌ្ឍមន្ទីរពេទ្យបង្អែកដង្កោ។ លោកអភិបាលបានអធិប្បាយថា ខណ្ឌដង្កោនេះ គឺជាទីតាំងល្អសម្រាប់ការពង្រីកសេវាសុខាភិបាលនៅក្នុងរាជធានីភ្នំពេញ ពីព្រោះ តំបន់នេះមានរោងចក្រ សហគ្រាស និងកម្មករកម្មការិនីច្រើន ហើយថានៅក្នុងឆ្នាំ២០២៥ខាងមុខ អាកាសយានដ្ឋានអន្តរជាតិថ្មីនឹងត្រូវសម្ពោធ ដែលនឹងធ្វើឱ្យតំបន់នេះកាន់តែមានមនុស្សច្រើន។

 

លោកស្រី Yung Yeon SHIN អនុប្រធាន KOICA បានប្រសាសន៍ប្រាប់កាសែតខ្មែរថាមស៍ថា មកដល់ពេលនេះ KOICA អនុវត្តគម្រោងជំនួយដល់កម្ពុជាចំនួន១៣គម្រោងហើយ ដោយមានទឹកប្រាក់សរុបប្រមាណ៨៣លានដុល្លារ។ រីឯគម្រោងសាងសង់ពង្រីកមន្ទីរពេទ្យបង្អែកដង្កោនេះ គឺជាគម្រោងទី១៤៕