ប្រាក់បៀវត្សទាប, បញ្ហាទំនាក់ទំនង និងការបំពេញការងារលើសម៉ោង តែងត្រូវបានចាត់ទុកជាបញ្ហាដ៏សំខាន់ ដែលធ្វើឱ្យប៉ះពាល់អវិជ្ជមានដល់អារម្មណ៍របស់បុគ្គលិកនៅចិន។ តាមការស្រង់មតិនៅក្នុងឆ្នាំ២០២១ ពាក់ព័ន្ធនឹងផ្នែកផ្លូវអារម្មណ៍នៅកន្លែងការងារនៅចិន បុគ្គលិកចំនួន​លើសពី ៦៥ភាគរយ បានបង្ហាញពីភាពអស់កម្លាំង និងមិនសប្បាយចិត្តនៅកន្លែងការងារ។ 

 

ពាក់ព័ន្ធនឹងបញ្ហានេះ ក្រុមហ៊ុនលក់រាយមួយនៅចិន បានអនុញ្ញាតឱ្យបុគ្គលិកមានសិទ្ធិឈប់សម្រាកបន្ថែមរយៈពេល ១០ថ្ងៃ ប្រសិនបើមិនសប្បាយចិត្ត។ 

 

«ខ្ញុំចង់ឱ្យសហការីទាំងអស់មានសេរីភាព។ ពួកគេត្រូវតែមានពេលឈប់សម្រាកនៅពេលពួកគេមិនសប្បាយចិត្ត។ ដូចនេះ បើមិនសប្បាយចិត្ត កុំមកធ្វើការ»។ លោក​ Yu Donglai ប្រធាន និងជាស្ថាបនិកក្រុមហ៊ុនPang Dong Lai បានបញ្ជាក់បែបនេះ នៅក្នុងកម្មវិធី2024’s China Supermarket Week រៀបចំឡើងនៅចុងខែមីនា ឆ្នាំ២០២៤។ 

 

ក្នុងកម្មវិធីដដែលនោះ ប្រធានក្រុមហ៊ុនរូបនេះ បានយល់ឃើញថា បុគ្គលិក គួរតែមានពេលសម្រាកសម្រាប់ខ្លួនឯង ហើយពួកគេគួរតែមានពេលសម្រាកគ្រប់គ្រាន់។ ត្រង់ចំណុចនេះ លោក Yu បានអះអាងថា ច្បាប់អនុញ្ញាតឱ្យបុគ្គលិកឈប់សម្រាកពេលមិនសប្បាយចិត្ត មិនគួរត្រូវបានបដិសេធនៅក្នុងការគ្រប់គ្រងឡើយ។

 

សូម្បីតែអ្នកលេងបណ្តាញសង្គម Weibo របស់ចិន ក៏បានបង្ហាញការគាំទ្រចំពោះគំនិតបែបនេះដែរ។ តាមការបញ្ចេញមតិរបស់គណនីមួយ ប្រធានក្រុមហ៊ុន និងបរិយាកាសធ្វើការដ៏ល្អដូចខាងលើ គួរតែត្រូវបានផ្សព្វផ្សាយនៅទូទាំងប្រទេសចិន។ ចំណែកគណនីមួយចំនួន បានបង្ហាញចំណាប់អារម្មណ៍ចង់ផ្លាស់ប្តូរក្រុមហ៊ុនទៅធ្វើនៅក្រុមហ៊ុនលក់រាយ Pang Dong Lai វិញ។ 

 

នៅក្នុងក្រុមហ៊ុន Pang Dong Lai ប្រាក់បៀវត្សជាមធ្យមប្រចាំខែមានចំនួន ៩៧០ដុល្លារ ខណៈប្រាក់បៀវត្សប្រចាំខែរបស់បុគ្គលិកនៅក្រុមហ៊ុនផ្សេងទៀត ទាបជាងក្រុមហ៊ុននេះជិតពាក់កណ្តាល។ មិនតែប៉ុណ្ណោះ លោក Yu បានអនុញ្ញាតឱ្យបុគ្គលិកធ្វើការត្រឹម ៧ម៉ោង ក្នុងមួយថ្ងៃថែមទៀត។ 

 

គួររម្លឹកថា នៅក្នុងឆ្នាំ២០២៣ លោក Yu ក៏ធ្លាប់រិះគន់ប្រធានក្រុមហ៊ុន ដែលគាំទ្រឱ្យបុគ្គលិកធ្វើការជាច្រើនម៉ោងផងដែរ។ លោកYu បានសង្កត់ធ្ងន់ថា ការធ្វើការច្រើនម៉ោង គឺមិនមែនជាវិជ្ជាជីវៈឡើយ ហើយជាការរឹតត្បិតឱកាសបុគ្គលិកក្នុងការអភិវឌ្ឍខ្លួន៕