ដូចប្រពៃណីបណ្តាប្រទេសអាស៊ីអាគ្នេយ៍ដីគោកមួយចំនួនដែរ ថៃរៀបចំសង្រ្កាន្ត ដើម្បីអបអរចូលឆ្នាំប្រពៃណីខ្លួន។ មហាសង្រ្កាន្តពិភពលោកថៃ ត្រូវបានរៀបចំពីថ្ងៃទី១១ ដល់ថ្ងៃទី១៥ ខែមេសា នៅក្នុងក្រុងបាងកក។ នៅអំឡុងពេលសង្រ្កាន្តនេះ លោកសេដ្ឋា ថាវីស៊ីន នាយករដ្ឋមន្រ្តីថៃ នៅថ្ងៃទី១០ ខែមេសា បានត្រួតពិនិត្យបង្គន់ និងសេវាសាធារណៈផ្សេងៗដូចជា កន្លែងរង់ចាំរថយន្តក្រុង ដើម្បីធានាសុវត្ថិភាព និងសុខមាលភាពដល់អ្នកដំណើរ។ 

 

«លោកសេដ្ឋា​ បានត្រួតពិនិត្យលើបង្គន់រៀបចំឡើងវិញ ដោយកត់សម្គាល់ពីអនាម័យ ដោយសារវាត្រូវបានប្រើប្រាស់ជាច្រើនពីសាធារណជន»។ សារព័ត៌មាន Pattaya Mail បានចុះផ្សាយបែបនេះ ពាក់ព័ន្ធនឹងទស្សនកិច្ចរបស់លោកសេដ្ឋា នៅស្ថានីយរថយន្តក្រុង Mo Chit 2 ក្នុងក្រុងបាងកក។ 

 

ទន្ទឹមនេះ លោកសេដ្ឋា​ បានកត់សម្គាល់ថា ការប្រើប្រាស់បង្គន់តាមរយៈការបង់ប្រាក់ប្រមាណ ១០បាត គឺវាសមរម្យ ហើយអាចជួយធ្វើឱ្យបង្គន់នៅតែស្អាត និងអនាម័យ។ ទន្ទឹមនេះ លោកសេដ្ឋា បានពិនិត្យមើលកន្លែងភ្ញៀវរង់ចាំរថយន្តក្រុងផងដែរ ដោយលោកបានស្នើឱ្យដាក់កៅអីរង់ចាំបន្ថែម។

 

នៅកន្លែងរង់ចាំរថយន្តក្រុងនោះ ប្រមុខរដ្ឋាភិបាល​ បានទទូចឱ្យមន្រ្តីដាក់ផ្ទាំង LED បន្ថែម ដើម្បីអាចទាញចំណូល តាមរយៈការផ្សព្វផ្សាយពាណិជ្ជកម្ម។ ចំណែកអ្នកបើកបររថយន្តក្រុងចាំបាច់ត្រូវតែមានការត្រួតពិនិត្យសុខភាពត្រឹមត្រូវ និងសារធាតុញៀន។ 

 

ការត្រួតពិនិត្យកន្លែងសាធារណៈនៅក្នុងប្រទេសនេះ ធ្វើឡើងក្រោយមេដឹកនាំថៃ បានប្រកាសផ្អាកធ្វើទស្សនកិច្ចនៅបរទេសរយៈពេល ២ខែ ដោយផ្តោតលើកិច្ចការក្នុងស្រុកវិញម្តង៕