ចាប់ពីថ្ងៃទី១៣ ខែមេសា​ ដល់ថ្ងៃទី១៦ ខែមេសា ប្រជាជនកម្ពុជាទាំងអស់ អបអរសាទរពិធីចូលឆ្នាំប្រពៃណីរបស់ខ្លួន ដោយប្រជាជនជាច្រើន បានត្រលប់ទៅស្រុកកំណើត ដើម្បីជួបជុំគ្រួសារ និងធ្វើពិធីបែបប្រពៃណីមួយចំនួន។ 

 

ក្នុងឱកាសនេះ រដ្ឋមន្រ្តីការបរទេសអាម៉េរិក លោក អាន់តូនី ប្លីងខិន បានជូនពរដល់ប្រជាជនកម្ពុជានៅទូទាំងពិភពលោក ជួបតែសំណាងល្អ។

 

«ដោយតំណាងឱ្យអាម៉េរិក ខ្ញុំសូមជូនពរប្រជាជនខ្មែរទាំងអស់នៅកម្ពុជា និងជុំវិញពិភពលោក ក្នុងឱកាសចូលឆ្នាំខ្មែរ ពោរពេញដោយភាពរីករាយ សំណាងល្អ និងវិបុលភាព»។ នេះបើតាមសេចក្តីប្រកាសព័ត៌មានចេញដោយក្រសួងការបរទេសអាម៉េរិក នៅថ្ងៃទី១ ខែមេសា។ 

 

មិនតែប៉ុណ្ណោះ លោកប្លីងខិន បានអបអរសាទរពិធីចូលឆ្នាំខ្មែរជាមួយប្រជាជននៅកម្ពុជា និងអាម៉េរិក ហើយថែមទាំងជូនពរឱ្យឆ្នាំរោងនាំមកតែសំណាងល្អ សុខភាពល្អ និងឪកាសដល់ប្រជាជន។

 

ស្របគ្នានេះ លោករដ្ឋមន្រ្តីបានបញ្ជាក់ផងដែរថា រដ្ឋាភិបាលក្រុងវ៉ាស៊ីនតោន នឹងបន្តធ្វើការជាមួយប្រជាជនកម្ពុជា ដើម្បីកសាងវិបុលភាព ប្រជាធិបតេយ្យ និងប្រទេសឯករាជ្យ។ ប្រមុខការទូតរូបនេះ ក៏បានប្តេជ្ញាពង្រឹងទំនាក់ទំនងរវាងប្រជាជន និងប្រជាជនផងដែរ៕