នៅថ្ងៃទី១ ខែមិថុនា ដែលជាទិវាកុមារអន្ដរជាតិ សហព័ន្ធកីឡាទោចក្រយានកម្ពុជា នឹងរៀបចំការជិះកង់ ដែលមានចម្ងាយ ៣១០គីឡូម៉ែត្រ ពីភ្នំពេញ ទៅក្រុងសៀមរាប។ លោក នូ ចំរើន បានប្រាប់សារព័ត៌មានថ្មីៗ តាមតេឡេក្រាមថា នេះ គឺជាលើកដំបូងដែលសហព័ន្ធរៀបចំព្រឹត្តិការណ៍នេះ ដោយមានគោលដៅជួយឧបត្ថម្ភដល់មន្ទីរពេទ្យកុមារអង្គរ និងបំផុសចលនាកីឡាទោចក្រយានទៅកីឡាករ-កីឡាការិនី ក្នុងការជិះកង់ទៅខេត្តសៀមរាប។
 

«សហព័ន្ធមានគោលបំណង រៀបចំព្រឹត្តិការណ៍នេះឡើង ដើម្បីកៀរគរជាសម្ភារៈ និងថវិកាជួយដល់មន្ទីរពេទ្យកុមារអង្គរ និងបំផុសចលនាដល់ក្រុមកីឡាករ-កីឡាការិនីជិះកង់ទៅកាន់ខេត្តសៀមរាប។»។ លោក នូ ចំរើន បាននិយាយដូច្នេះ។
 

ចំពោះការជិះកង់ចម្ងាយ៣១០គីឡូម៉ែត្រនេះ សហព័ន្ធ បានត្រៀមលក្ខណៈរួចជាស្រេចចំពោះសុវត្ថភាព និងបញ្ហាការពារផ្សេងៗ ទាំងសុខមាលភាពអ្នកចូលរួមជាដើម។ អគ្គលេខាធិការសហព័ន្ធរូបនេះ បញ្ជាក់ថា មានឡានពេទ្យ និងឡានស៊ឺរ៉ែន បើកផ្លូវជូនដល់កីឡាករ-កីឡាការិនី។ អគ្គលេខាធិការសហព័ន្ធកីឡាទោចក្រយានកម្ពុជា អះអាងថា៖«យើងមានរៀបចំក្បូនឡានគាំទ្រ ឡានពេទ្យ និងឡានស៊ឺរ៉ែនបើកផ្លូវជូនកីឡាករ ហើយក្រៅពីឡាន យើងមានក្រុមម៉ូតូគាំទ្រការធ្វើចរាចរ និងគាំទ្រកីឡាករ ដើម្បីហុចទឹក ភេសជ្ជៈ និងអាហារសម្រន់។»។ 
 

គួរបញ្ជាក់ផងដែរថា ព្រឹត្តិការណ៍ជិះកង់នេះ មិនបានកំណត់តម្លៃ និងគុណភាពកង់ទេ។ នោះ មានន័យថាកង់ប្រភេទណាក៏អាចចូលរួមបានដែរ។ ចម្ងាយ៣១០គីឡូម៉ែត្រនេះ គឺត្រូវជិះរយៈពេលមួយថ្ងៃ ហើយចេញដំណើរចាប់ពីម៉ោង ៤:៣០ព្រឹក ដោយគ្រោងទៅដល់មន្ទីរពេទ្យកុមារអង្គរ នៅម៉ោង៧:៣០យប់៕