ជាតិ
សង្គមជាតិ
លោក អាឡិច ប្រកាសនៅកម្ពុជារហូតអាជ្ញាធរចាប់បញ្ជូនចេញ
×
ប្រធានអង្គការចលនាមាតាធម្មជាតិ លោក អាឡិច ហ្គន់សាឡេស បានអះអាងថា រូបលោកនឹងមិនចាកចេញពីប្រទេសកម្ពុជាដោយខ្លួនឯងនោះឡើយ ដោយរូបលោករង់ចាំឲ្យអាជ្ញាធរចាប់បញ្ជួនខ្លួនចេញពីកម្ពុជាតែម្តង ។ បើតាមជនជាតិអេស្បាញរូបនេះ បើទោះជាខ្លួនត្រូវចាកចេញពីប្រទេសកម្ពុជាក៏ដោយ តែរូបលោកនៅតែចង់ឃើញព្រៃឈើនៅតំបន់អារ៉ែង នៅតែគង់វង់ដដែល ។
មានសំឡេង
ដរាបណាអាជ្ញាធរ មិនចាប់បញ្ជូនខ្លួនចេញពីកម្ពុជាទេ លោក អាឡិច មិនចាកចេញចេញពីកម្ពុជាដោយចិត្តឯងជាដាច់ខាត។ នេះជាការអះអាងរបស់បុរសជនជាតិអេស្បាញលោក អាឡិច ហ្គន់សាឡេស ប្រធានអង្គការចលនាមាតាធម្មជាតិ។ ការប្តេជ្ញាបែបនេះ ធ្វើឡើងក្រោយពីរូបលោកត្រូវប្រឈមមុខ នឹងការចាប់ខ្លួនបណ្ដេញចេញពីប្រទេសកម្ពុជាមុនថ្ងៃទី២០កុម្ភៈ បន្ទាប់ពីរដ្ឋមន្ត្រីក្រសួងមហាផ្ទៃ លោក ស ខេង បានសម្រេចចិត្តមិនបន្តទិដ្ឋាការអោយលោករស់នៅកម្ពុជាទៀត។ គ្រាន់តែឮដំណឹងថា អាជ្ញាធរកម្ពុជា គ្រោងចាប់បញ្ចូនខ្លួនចេញពីកម្ពុជានោះ លោក អាឡិច បានផ្ទេរការងារជូនដល់ក្រុមយុវជនកម្ពុជា ដែលស្រលាញ់ព្រៃឈើតំបន់អារ៉ែងរួចរាល់ហើយ ដើម្បីឲ្យពួកគេថែរក្សាព្រៃឈើនៅទីនោះឲ្យបានគង់វង់ នៅពេលដែលរូបលោកចាកចេញពីប្រទេសកម្ពុជា។ នេះជាការបញ្ជាក់ប្រាប់សារព័ត៌មានថ្មីៗនៅរសៀលនេះរបស់លោក អាឡិច ។
ប្រធានចលនាមាតាធម្មជាតិរូបនេះបន្ថែមថា ៖« ខ្ញុំមិនទាន់ចេញភ្លាមនៅពេលនេះទេ លុះត្រាតែគេចាប់បញ្ជូនខ្ញុំចេញប្រទេសទើបខ្ញុំចាកចេញ ព្រោះខ្ញុំរស់នៅទីនេះយូរហើយ ខ្ញុំក៏ដូចជាប្រជាជនខ្មែរដទៃទៀតដែរ ដូចនេះទាល់តែចាប់បញ្ជូនខ្ញុំទើបបានខ្ញុំចាកចេញ ។ ហើយពេលខ្ញុំចាកចេញពីទីនេះ ខ្ញុំសង្ឃឹមថាព្រៃឈើនៅតំបន់អារ៉ែង នៅតែមិនបាត់បង់ដដែល »។
បើតាមជនជាតិអេស្បាញរូបនេះ កន្លងមករូបលោកធ្លាប់សុំអន្តរាគមន៍ពីស្ថានកុងស៊ុលប្រទេសអេស្បាញ ស្ថិតនៅក្នុងប្រទេសថៃផងដែរ ប៉ុន្ដែអគ្គស្ថានកុងស៊ុល ក៏មិនអាចជួយដោះស្រាយបញ្ហានេះជូនរូបលោកបានឡើយ។
កន្លងមកលោក ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា ការបន្ដទិដ្ឋាការ ឬ មិនបន្ដទិដ្ឋាការជូនជនបរទេសណាមួយ នោះគឺសិទ្ធិរបស់សាមីប្រទេស ក្នុងការសម្រេចទៅលើជនបរទេស ដែលមករស់នៅប្រទេសកម្ពុជា។ចំពោះករណី លោក អាឡិច នេះ លោក ខៀវ សុភ័គ បានវាយតម្លៃសកម្មភាពរបស់លោក អាឡិចកន្លងមក ដោយលោកបានផ្លែផ្កាដូច្នេះថា «យើងឃើញថាសកម្មភាពជនបរទេសនេះ ស្រលាញ់ខ្មែរជាងប្រជាពលរដ្ឋខ្មែរទៀត។ ស្ដេចខ្មែរច្រើនណាស់ ដែលសុគតដោយសារជនបរទេស»។
ទាក់ទងនឹងបញ្ហានេះមន្ត្រីការពារសិទ្ធិមនុស្សសមាគមអាដហុក លោក នី ចរិយា យល់ឃើញថា ក្នុងករណីដែលនាយកដ្ឋានអន្តោប្រវេសន៍ មិនបន្តទិដ្ឋាការឲ្យជនជាតិអេស្បាញនោះ គឺអាចបណ្ដាលមកពីរដ្ឋាភិបាលកម្ពុជា មិនពេញចិត្តនិងសកម្មភាពរបស់លោក អាឡិច ដែលតែងតែចូលរួមសកម្មភាពនានា ក្នុងការការពារតំបន់អារ៉ែងកន្លងមក។ ហើយលោកថា ការមិនផ្ដល់ទិដ្ឋាការជូនលោក អាឡិចនេះ អាចជាការរើសអើងជាតិសាសន៍ ដែលផ្ទុយពីច្បាប់អន្តរជាតិផងដែរ។
បើតាមមន្ត្រីការពារសិទ្ធិមនុស្សរូបនេះ ក្នុងករណីរដ្ឋាភិបាល ក៏ដូចជានាយកដ្ឋានអន្តោប្រវេសន៍ មិនអាចផ្ដល់ទិដ្ឋាការបន្ដជូនលោក អាឡិច លុះត្រាតែជនបរទេសរូបនេះ បានប្រព្រឹត្តបទល្មើសដែលបានចែងនៅក្នុងច្បាប់អន្តោប្រវេសន៍ ។
គួរចាប់អារម្មណ៍ដែរថា កន្លងមកអាឡិច ហ្គន់សាឡេស ធ្លាប់បានរងការគំរាមពីសំណាក់ លោក ឈាង វុន សមាជិកសភាគណបក្សប្រជាជនកម្ពុជា ដែលធ្លាប់បានគំរាមបណ្ដេញខ្លួន ចេញពីប្រទេសកម្ពុជា ដោយកាលនោះលោក ឈាង វុន បានចោទបុរសជនជាតិអេស្ប៉ាញរូបនេះថា បានលូកដៃចូលកិច្ចការផ្ទៃក្នុងរដ្ឋាភិបាលកម្ពុជា ៕
© រក្សាសិទ្ធិដោយ thmeythmey.com