ជាតិ
សង្គមជាតិ
អ្នកភូមិព្រះដាក់ធ្វើកន្ត្រងប្រហុកយក្សត្រៀមចូលរួមក្នុងព្រឹត្តិការណ៍អង្គរសង្ក្រាន្ត កន្រ្តងប្រហុក ដែលអ្នកភូមិព្រះដាក់ កំពុងរៀបចំធ្វើកាលពីថ្ងៃទី១៥ ខែកុម្ភៈ ឆ្នាំ២០១៥ ។
× សៀមរាប៖ កន្ត្រងប្រហុកយក្ស ដែលមានទំហំធំមិនធ្លាប់មានពីមុនមក នឹងបង្ហាញវត្តមានដល់ភ្ញៀវទេសចរ ក្នុងព្រឹត្តិការណ៍អង្គរសង្ក្រាន្ត ឆ្នាំ២០១៥ នៅក្នុងខេត្តសៀមរាប។
កន្ត្រងប្រហុកយក្ស ធ្វើឡើងពីឫស្សី មានទំហំ ១,៨៥ម៉ែត្រ កម្ពស់ ១,៤០ ម៉ែត្រ និងប្រវែង៥ម៉ែត្រ បានរៀបចំរួចរាល់ហើយ។ កន្ត្រងប្រហុកដ៏ធំមិនធ្លាប់មាននេះ ធ្វើឡើងដើម្បីបង្ហាញពីស្នាដៃរបស់ប្រជាពលរដ្ឋខ្មែរ ជាពិសេសស្នាដៃអ្នកភូមិអង្គរ គឺភូមិព្រះដាក់ ឃុំព្រះដាក់ ស្រុកបន្ទាយស្រី ខេត្តសៀមរាប។
ដើម្បីចង់បានជាភូមិគំរូទៅថ្ងៃអនាគត អ្នកភូមិព្រះដាក់ បានសម្រេចនូវសមិទ្ធិផលដ៏ធំ ដែលពួកគេមិនធ្លាប់ធ្វើពីមុនមក នោះគឺការច្នៃរបស់ប្រើប្រាស់ប្រចាំថ្ងៃរបស់ពួកគេ មានកន្ត្រងប្រហុកជាដើម ទៅជារបស់ធំៗ ដែលមានទំហំ ម៉ែត្រៗ ។ កន្ត្រងប្រហុក មួយក្នុងចំណោមវត្ថុប្រើប្រាស់មួយចំនួនទៀត សម្រាប់យកទៅបង្ហាញក្នុងព្រឹត្តិការណ៍អង្គរសង្ក្រាន្តនាពេលខាងមុខនេះ។
ពលរដ្ឋ និងក្រុមជាង បានឲ្យដឹងថា ពួកគេបានប្រើពេលប្រមាណ១សប្តាហ៍ ដើម្បីធ្វើកន្ត្រងប្រហុកយក្សនេះ។ ប្រសិនបើប្រជាពលរដ្ឋ ឫភ្ញៀវទេសចរទាំងអស់ បានឃើញកន្ត្រងប្រហុកយក្ស អាចទៅទស្សនាបាននៅបរិវេណប្រាសាទបាយ័ន ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៥ ក្នុងព្រឹត្តិការណ៍អង្គរសង្ក្រាន្តលើកទី៣ ឆ្នាំ២០១៥ ៕
© រក្សាសិទ្ធិដោយ thmeythmey.com