ជាតិ
TV «ព្រះអាទិត្យ»របស់ CNRP ត្រូវពន្យាពេលបង្កើត
×
ភ្នំពេញ៖ ទូរទស្សន៍របស់គណបក្សសង្គ្រោះជាតិដែលអាចមានឈ្មោះថា ទូរទស្សន៍«ព្រះអាទិត្យ» ដែលគ្រោងបង្កើតនៅឆ្នាំ២០១៥នេះ ត្រូវបានពន្យាពេលនៃការបង្កើត។ ការបង្កើតជាផ្លូវការអាចត្រូវបានពន្យាពេលរហូតដល់ឆ្នាំ២០១៧ខាងមុខនេះ។
លោក ហុង សុខហួរ សមាជិកព្រឹទ្ធសភានៃគណបក្សសមរង្ស៊ី បានថ្លែងប្រាប់នៅថ្ងៃសុក្រទី៣ខែមេសានេះថា ការពន្យាពេលនៃការបង្កើតប៉ុស្តិ៍ទូរទស្សន៍«ព្រះអាទិត្យ»នៃគណបក្សសង្គ្រោះជាតិនេះ គឺដោយសារថ្នាក់ដឹកនាំគណបក្សជាប់រវល់គិតគូរពីរឿងការបង្កើតច្បាប់ គជប ថ្មី។ ដូច្នេះ គម្រោងនៃការបង្កើតទូរទស្សន៍ថ្មីត្រូវយឺតយ៉ាវបន្តិច។
បើយោងតាមគម្រោង ទូរទស្សន៍ CNRP ដែលអាចមានឈ្មោះថា«ព្រះអាទិត្យ ត្រូវដាក់អោយដំណើរការនៅឆ្នាំ ២០១៥នេះ។ ប៉ុន្តែឥឡូវនេះ គម្រោងត្រូវរុញទៅបង្កើតយ៉ាងយូរបំផុតត្រឹមឆ្នាំ២០១៧ ជាឆ្នាំនៃការបោះឆ្នោតឃុំសង្កាត់។
លោក ហុង សុខហួរ បានបញ្ជាក់បន្ថែមទៀតថា ក្រោយចូលឆ្នាំខ្មែរនេះ ថ្នាក់ដឹកនាំនឹងចាប់ផ្តើមគិតគូរពីរឿងបង្កើតទូរទស្សន៍ថ្មីនេះ ហើយយុទ្ធនាការនៃការរៃអង្គាសថវិកាសម្រាប់ដំណើរការទូរទស្សន៍ក៏ត្រូវចាប់ផ្តើមក្រោយឆ្នាំខ្មែរដែរ។ «យើងគ្រោងប្រមូលថវិកាពីជនជាតិខ្មែរនៅក្រៅប្រទេស និងក្នុងប្រទេស»។ នេះគឺជាការបញ្ជាក់របស់លោក សុខហួរ។
ដើម្បីអាចដាក់អោយដំណើរទូរទស្សន៍ថ្មីនេះបាន គណបក្សសង្គ្រោះជាតិត្រូវការថវិកា៣លានដុល្លារអាមេរិក។ បើយោងតាមលោក ហុង សុខហួរ ទូរទស្សន៍ព្រះអាទិត្យនេះ នឹងបម្រើផលប្រយោជន៍ពលរដ្ឋគ្រប់និន្នាការនយោបាយ។
សូមបញ្ជាក់ថា នេះគឺជាលើកទី១នៅក្នុងប្រវត្តិសាស្ត្រនយោបាយខ្មែរហើយ ដែលគណបក្សប្រឆាំងមានទូរទស្សន៍ដោយខ្លួនឯងនោះ៕
© រក្សាសិទ្ធិដោយ thmeythmey.com