ជាតិ
អាជ្ញាធរអប្សរា មិនប្រាប់ទីតាំងរក្សាទុកមកុដមាសឡើយ ព្រោះបារម្ភពីសុវត្ថិភាព
×![]()
សៀមរាប៖ រយៈពេលប៉ុន្មានថ្ងៃនេះ មានការផ្សព្វផ្សាយព័ត៌មានមិនពិតនៅលើបណ្តាញសង្គម Facebook ដោយចោទ អាជ្ញាធរជាតិអប្សរាថាបានធ្វើឲ្យបាត់បង់ ឬលក់វត្ថុដ៏មានតម្លៃ ដែលជាមរតកបេតកភណ្ឌរបស់ជាតិទាំងមូល។បន្ទាប់ពីបដិសេធការចោទប្រកាន់ លោក ប៊ុន ណារិទ្ធ អគ្គនាយកអាជ្ញាធរជាតិអប្សរា បានចេញមុខធ្វើការបកស្រាយ ដោយបង្ហាញមកុដមាសដ៏មានតម្លៃនោះដល់សាធារណជន។ ទាក់ទងទីតាំងរក្សាទុកមកុដមាស ស្ថាប័នជំនាញ មិនបានបង្ហើបឲ្យដឹងឡើយដោយព្រួយបារម្ភពីសុវត្ថិភាព។
នៅរសៀលថ្ងៃទី២៨ មេសា ២០១៥ លោក ប៊ុន ណារិទ្ធអគ្គនាយក អាជ្ញាធរជាតិអប្សរាបានយក មកុដមាសដែលរកឃើញពីកំណាយនៅប្រាសាទតាព្រហ្មកាលពីឆ្នាំ២០១២ មក បង្ហាញដល់សាធារណជន ជាពិសេសមន្ត្រីជំនាញដែលមានសមត្ថកិច្ចដើម្បីពិនិត្យមើល និងដើម្បីបញ្ជាក់ថា ពិតជាគ្មានការបាត់បង់ដូចការចោទ ប្រកាន់របស់អ្នកប្រើប្រាស់បណ្តាញសង្គមនោះឡើយ។
អាជ្ញាធរជាតិអប្សរាអះអាងថា ខ្លួននៅបន្តថែរក្សាដើម្បីធ្វើការសិក្សាស្រាវជ្រាវបន្ថែមទៀត រហូតដល់បាន លទ្ធផលគ្រប់ជ្រុងជ្រោយ។ «រាល់វត្ថុបុរាណដែលបានប្រទះឃើញថ្មីទាំងអស់ យើងមិនអាចយកទៅដាក់តាំងនៅសារមន្ទីរបានទេ ប្រសិនបើមិនទាន់មានការស្រាវជ្រាវចប់សព្វគ្រប់។ ម្យ៉ាងទៀតប្រសិនបើរូបនោះធំហើយស្គាល់ប្រភពទីតាំងច្បាស់លាស់ នៅពេលសិក្សាចប់គេអាចយកទៅដាក់នៅទីតាំងដើមបានប្រសិនបើមានសុវត្ថិភាព ហើយចំពោះរូប តូចៗដែលងាយបាត់បង់គឺត្រូវថែរក្សានៅកន្លែងមានសុវត្ថិភាពកន្លែង ជំនាញរបស់ស្ថាប័នមានសមត្ថកិច្ចឬសារមន្ទីរ ជាដើម»។ នេះជាការបញ្ជាក់របស់ស្ថាប័នជាតិដែលទទួលបន្ទុកអភិរក្សតំបន់អង្គរ។មន្ត្រីម្នាក់របស់អាជ្ញាធរអប្សរា បានបញ្ជាក់ប្រាប់សារព័ត៌មានថ្មីៗថា មកុដមាសទម្ងន់៩៤,៥២ក្រាម ដែលស្ថាប័នឥណ្ឌា ធ្វើកំណាយឃើញអំឡុងពេលជួសជុសប្រាសាទតាព្រហ្ម អំឡុងឆ្នាំ២០១២ ត្រូវបានយកទៅរក្សាទុកនៅកន្លែងសុវត្ថិភាព។ ចម្ងល់នៅត្រង់ថា តើរហូតមកដល់ពេលនេះ មកុដមាសនោះ រក្សាទុកនៅកន្លែងណាឲ្យប្រាកដ។ សំណួរនេះ ក៏មានការលើកឡើងនូវការចោទប្រកាន់ស្ថាប័នអាជ្ញាធរអប្សរា ដែលជាអ្នកគ្រប់គ្រងនៅតំបន់នោះ ថាអាចលួចលក់មកុដនោះផង។ តែយ៉ាងណា អាជ្ញាធរអប្សរាបំភ្លឺថា ការមិនបង្ហើបពីទីតាំងមកុដ ក៏ដើម្បីសុវត្ថិភាពរបស់វាដែរ។
មន្ត្រីនៃអាជ្ញាធរអប្សរាបានឲ្យដឹងថា បច្ចុប្បន្នមកុដមាស ត្រូវបានរក្សាទុកនៅកន្លែងមានសុវត្ថិភាពបំផុត។ មន្ត្រីរូបនោះ បានបញ្ជាក់ពីមូលហេតុពិតប្រាកដ ដែលអាជ្ញាធរ មិនប្រាប់ពីទីតាំងដាក់មកុដមាសនោះថា៖« ចុះបើខ្ញុំប្រាប់ឥឡូវថា មកុដនោះនៅកន្លែងណា តើយប់នេះនឹងមានអ្វីកើតឡើងចំពោះមកុដនោះ»?
បើទោះជាមិនបានបញ្ជាក់ពីថ្ងៃខែរួចរាល់ តែមន្ត្រីនៃអាជ្ញាធរអប្សរា បានបញ្ជាក់ថា បច្ចុប្បន្នអ្នកជំនាញកំពុងចងក្រង រៀបចំប្រវត្តិនៃមកុដនោះ មុននឹងយកទៅដាក់នៅកន្លែងដើម ឫកន្លែងមានសុវត្ថិភាពណាមួយ។ មន្ត្រីរូបនោះ ក៏បានស្នើដល់សាធារណជនគួរកុំជឿលើព័ត៌មានបោកប្រាស់តាមបណ្តាញសង្គមហ្វេសប៊ុកមួយចំនួន ដែលមានបំណងមិនល្អ និងញុះញង់ឲ្យស្អប់ស្ថាប័នអាជ្ញាធរអប្សរា៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 23 ម៉ោង
