ជាតិ
អភិបាលរាជធានីចាប់ផ្តើមរកដំណោះស្រាយជាមួយពលរដ្ឋរស់នៅក្បែរលូបឹងត្របែក លោក ប៉ា សុជាតិវង្ស កំពុងពន្យល់ពលរដ្ឋអំពីគម្រោងអភិវឌ្ឍន៍ស្តារលូបឹងត្របែក
× តំណាងពលរដ្ឋ
× ស្ថានភាពបឹងត្របែក
×
× ភ្នំពេញ៖ សាលារាជធានីភ្នំពេញ នឹងត្រូវស្តារលូបឹងត្របែក និងពង្រីកស្ថានីយ៍បូមទឹក ដើម្បីជួយបញ្ចៀសបញ្ហាជំនន់ទឹកភ្លៀងក្នុងរាជធានី។ ដើម្បីអនុវត្តគម្រោងនេះ សាលារាជធានីត្រូវជួបជាមួយពលរដ្ឋប្រមាណ៣០០គ្រួសារក្រីក្រដែលរស់នៅជុំអាងស្តុកទឹកលូបឹងត្របែកនេះ។
អភិបាលរាជធានីភ្នំពេញ លោក ប៉ា សុជាតិវង្ស បានចុះជួបជាមួយតំណាងពលរដ្ឋប្រមាណ៣០០គ្រួសារដែលរស់នៅជុំវិញលូបឹងត្របែកនៃសង្កាត់ផ្សារដើមថ្កូវ នៅព្រឹកថ្ងៃទី២៦ឧសភានេះ។ ជំនួបនេះមានគោលដៅស្វែងរកដំណោះស្រាយសមរម្យ ជាមួយពលរដ្ឋ មុននឹងអនុវត្តគម្រោងស្តារបឹងស្តុកទឹកលូនេះ។
ប្រជាពលរដ្ឋ ដែលមានមួយចំនួនបានអះអាងថា ពួកគេបានមករស់នៅមិនតិចជាង២០ឆ្នាំមកហើយនោះ ត្រូវរងប៉ះពាល់ដោយគម្រោងនេះ ហើយត្រូវចាកចេញពីទីនេះ។ យោងតាមប្រសាសន៍របស់លោកអភិបាលរាជធានីភ្នំពេញ សាលារាជធានីមានគោលការណ៍២ចំណុច។ ទីមួយ រដ្ឋនឹងទិញដីពីប្រជាពលរដ្ឋ ជាថ្នូរនឹងការចាកចេញ។ ទី២ ពលរដ្ឋអាចបន្តរស់នៅទីនោះបាន ប៉ុន្តែពួកគេត្រូវតែទិញដីពីរដ្ឋវិញ ដើម្បីទទួលបានប្លង់កម្មសិទ្ធិស្របច្បាប់។ គ្រាន់តែមានគោលការណ៍បែបនេះ ប៉ុន្តែភាគីទាំងពីរនៅមិនទាន់និយាយដល់តម្លៃនៅឡើយទេ។
លោក ប៉ា សុជាតិវង្ស បានពន្យល់ប្រាប់ពលរដ្ឋយ៉ាងដូច្នេះថា៖«នេះជាលទ្ធភាពក្នុងការដោះស្រាយមួយ ដែលបងប្អូនអាចនឹងទទួលយកបាន ហើយអាជ្ញាធរ នឹងពិនិត្យបន្ថែមទៀត ថានឹងត្រូវផ្តល់គោលនយោបាយប៉ុន្មានចំពោះបងប្អូនក្រោយពិនិត្យជាក់ស្តែង។ យើងមិនចង់ឲ្យមានការធ្វើបាតុកម្មទេ ដូច្នេះយើងត្រូវបង្កើតវប្បធម៌ពិភាក្សាដោយសន្តិវិធី»។
បើតាមរបាយការណ៍ដែលអានដោយអភិបាលខណ្ឌចំការមន លោក ព្រុំ សំខាន់ បឹងត្របែក មានទំហំ ២៦ហិចតា ហើយប្រជាជនកំពុងរងផលប៉ះពាល់ក្នុងគម្រោងអភិវឌ្ឍបឹងនេះ មានចំនួនជាង ៣០០គ្រួសារ ក្នុងនោះមាន ផ្ទះសម្បែងធ្វើពីឈើ ប្រក់សង្កសីជាង ៦០០ខ្នង។
តំណាងពលរដ្ឋក្នុងតំបន់បឹងត្របែក លោក សួស ណាមី បានឡើងថ្លែងទៅកាន់ លោក ប៉ា សុជាតិវង្ស ថា ពួកគេយល់ព្រមទទួលយកគោលការណ៍ទាំងពីរចំណុចរបស់អាជ្ញាធរ។ ប៉ុន្តែលោកបានសំណូមថា អាជ្ញាធរគួរតែផ្តល់សំណងឲ្យបានសមរម្យ ដែលអាចឲ្យប្រជាជន មានលំនៅដ្ឋានថ្មីក្នុងការរស់នៅ។ «យើងមិនចង់ចេញពីកន្លែងចាស់ ដោយយើងគ្មានជម្រក ច្បាស់លាស់ គ្មានផ្សារ សាលារៀន មន្ទីរពេទ្យសម្រាប់រស់នៅទេ។ អាជ្ញាធរចង់លុបបំបាត់ សំណង់អាណាធិបតេយ្យ ដូច្នេះអាជ្ញាធរគួរគិតរឿងនេះ»។ នេះជាការលើកឡើងរបស់លោក សួស ណាមី។
ទាក់ទិននឹងវិធានការនេះ នាយកលេខាធិការដ្ឋានអង្គការក្រុមការងារពិសេសសិទ្ធិលំនៅឋាន លោក សៀរ ភារម្យ បានសម្តែងការគាំទ្រនឹងសកម្មភាពរបស់អាជ្ញាធរក្រុងភ្នំពេញ ដែលបង្កើត ឲ្យមានវេទិកាពិភាក្សារកដំណោះស្រាយផ្ទាល់ជាមួយប្រជាជន។ ហើយ លោកសំណូមថា អាជ្ញាធរគួរសិក្សា និងទទួលយកក្តីកង្វល់ដែលជាបញ្ហាប្រឈមនានា របស់ប្រជាជន បន្ថែមទៀត។ លោកសង្កត់ថា៖«អាជ្ញាធរគួរតែយកមតិរបស់ពលរដ្ឋមកសិក្សាឲ្យច្បាស់ ជៀសវាង ពួកគាត់ចាកចេញពីលំនៅដ្ឋាន ដោយបាត់បង់ការរកចំណូលគាត់ ពិសេសធ្វើឲ្យប៉ះពាល់ដល់ ការសិក្សារបស់កុមារ»៕
© រក្សាសិទ្ធិដោយ thmeythmey.com