ជាតិ
នយោបាយជាតិ
រូបពីហ្វេសប៊ុក៖Samdech Hun Sen, Cambodian Prime Minister
×![]()
លោកនាយករដ្ឋមន្ត្រី ហ៊ុន សែន បាននិយាយអំពីអាជីពក្នុងក្តីស្រមៃរបស់លោកប្រាប់និស្សិតនៃសាកលវិទ្យាល័យន័រតុនថា លោកមានបំណងចង់ក្លាយជាគ្រូបង្រៀនមួយរូបប៉ុណ្ណោះ ហើយក៏មិនដែលបានគិតថា លោកនឹងក្លាយជានាយករដ្ឋមន្ត្រីដែរ។
ឆ្នាំ ២០១៥ នេះ លោក ហ៊ុន សែន មានវ័យ ៦៥ ឆ្នាំ និងគ្រងតំណែងជានាយករដ្ឋមន្ត្រីអស់រយៈពេល ៣០ ឆ្នាំមកហើយ។ រយៈពេល ៣០ ឆ្នាំ ក្នុងតំណែងដឹកនាំប្រទេសនេះ លោកនាយករដ្ឋមន្ត្រី ជួបរឿងរ៉ាវមិនតិចឡើយ មានទាំងរឿងល្អ និងរឿងអាក្រក់។
តាមពិតទៅលោកនាយករដ្ឋមន្ត្រីដែលតែងតែហៅខ្លួនឯងថា ជា«អ្នកនយោបាយជើងយូរ» មិនដែលមានក្តីស្រមៃចង់ក្លាយជានាយករដ្ឋមន្ត្រីម្តងណានោះឡើយ។ អាជីពក្នុងសុបិនរបស់យុវជនស្រុកស្ទឹងត្រង់ គ្រាន់តែចង់ធ្វើជាគ្រូបង្រៀន និងអ្នកបើកយន្តហោះប៉ុណ្ណោះ។ក្នុងអំឡុងពេលធ្វើបាឋកថា ស្តីពី «នយោបាយ ឈ្នះ ឈ្នះ នៅកម្ពុជា» នៅចំពោះមុខនិស្សិតសាកលវិទ្យាល័យន័រតុនជិត១ពាន់នាក់ នៅថ្ងៃទី ១៥ ខែមិថុនានេះ ខណៈដែលកំពុងនិយាយពីចំណុចល្អរបស់ខ្លួនអំពីនយោបាយឈ្នះឈ្នះដែលនាំឲ្យកម្ពុជាមានសន្តិភាពនោះ លោក ហ៊ុន សែន ឆ្លៀតនិយាយពីក្តីស្រមៃរបស់ខ្លួនកាលពីអតីតកាលយ៉ាងនេះថា៖« ក្តីស្រមៃរបស់ខ្ញុំចង់ត្រឹមតែធ្វើជាគ្រូបង្រៀនទេ។ ហើយពេលប្រទេសមានសង្គ្រាម ខ្ញុំស្រមៃចង់ក្លាយជាអ្នកបើកយន្តហោះ» ។ អតីតក្មេងវត្តរូបនេះបន្ថែមដូច្នេះថា៖« ខ្ញុំមិនដែលស្រមៃចង់ធ្វើជានាយករដ្ឋមន្ត្រីអ្វីនោះទេ។ ខ្ញុំមិនដឹងថា វាសនាអ្វីបានជាធ្វើឲ្យខ្ញុំក្លាយជានាយករដ្ឋមន្ត្រីនោះឡើយ ហើយធ្វើនាយករដ្ឋមន្ត្រី បានយូរទៀត»។
នៅពេលដែលថ្លែងដល់ជីវិតជានាយករដ្ឋមន្ត្រីអស់រយៈពេល៣០ឆ្នាំមកនេះ លោក ហ៊ុន សែន ហាក់មានមោទកភាពណាស់ចំពោះការរក្សាតំណែងរបស់ខ្លួនបានយូរ។ លោក បាននិយាយថា លើលោកនេះ គ្មាននរណាមួយកាន់តំណែងជានាយករដ្ឋមន្ត្រីបានយូរដូចជារូបលោកនោះទេ។ មូលហេតុដែលលោកធ្វើជានាយករដ្ឋមន្ត្រីបានយូរ និងប្រជាជននៅតែស្រឡាញ់គាំទ្ររូបលោកនោះ ដោយសារតែការលះបង់របស់លោកកន្លងមកក្នុងបុព្វហេតុដើម្បីជាមាតុភូមិតែប៉ុណ្ណោះ មិនមែនដើម្បីក្រុម ឬបក្សខ្លួនឡើយ។ នេះជាការអះអាងរបស់លោក ហ៊ុន សែន ដែលនឹងក្លាយជាប្រធានគណបក្សប្រជាជនកម្ពុជាក្នុងពេលដ៏ខ្លីខាងមុខនេះ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 21 ម៉ោង
