ជាតិ
នយោបាយជាតិ
ទូរទស្សន៍ក្រសួងមហាផ្ទៃ៖ ចិនចាប់យកវិស័យនគរបាលខ្មែរ ?
× នៅពេលដែលក្រសួងមហាផ្ទៃបង្កើតប្រព័ន្ធផ្សព្វផ្សាយ (ទូរទស្សន៍ និងវិទ្យុ) អ្នកតាមដានស្ថានការណ៍សង្គមកម្ពុជាមិនទាន់ហ៊ាននិយាយអំពីការរីកចម្រើនក្នុងវិស័យសារព័ត៌មាន ដូចអ្នកកាសែតឡើយ។ តែពួកគេឆ្ងល់ទៅវិញ។
វាហាក់គ្មានភាពចាំបាច់ឡើយដែលក្រសួងមហាផ្ទៃត្រូវបានបង្កើតវិទ្យុ និងទូរទស្សន៍របស់ខ្លួននោះ។ លោក អ៊ូ វីរៈ អ្នកតាមដានស្ថានការណ៍សង្គមកម្ពុជាយល់ឃើញយ៉ាងនេះ។ «ខ្ញុំថា វាគ្រាន់តែជាការពង្រឹងការឃោសនាលើវិស័យប្រដាប់អាវុធ។ វាមិនមែនជាសញ្ញាល្អប៉ុន្មានទេ។ វាជាការផ្តល់អំណាចជ្រុលពេកទៅលើវិស័យប៉ូលីស»។ នេះជាការអត្ថាធិប្បាយរបស់លោក អ៊ូ វីរៈ មុននឹងលោករំឮកថា កម្ពុជាកំពុងធ្វើដំណើរទៅដូចប្រទេសថៃ ដែលនៅទីនោះ កងទ័ពក៏មានបណ្តាញផ្សព្វផ្សាយរបស់ខ្លួន។
ប្រធានសមាគមអាដហុក លោក ធន សារាយ ក៏និយាយភ្លាមដែរថា លោកមិនយល់ពីមូលហេតុដែលក្រសួងមហាផ្ទៃត្រូវបានបង្កើតវិទ្យុ និងទូរទស្សន៍ផ្ទាល់ខ្លួននោះ។ ដូចលោក អ៊ូ វីរៈ ដែល លោក ធន សារាយ រំឮកបែបឆ្ងល់ថា ហេតុអ្វីសាលារាជធានីភ្នំពេញមានទូរទស្សន៍ប៉ុស្តិ៍លេខ៣ កងទ័ពមានទូរទស្សន៍ប៉ុស្តិ៍៥ ហើយឥឡូវក្រសួងមហាផ្ទៃមានទូរទស្សន៍ខ្លួនឯងទៀត ? នេះលោក ធន សារាយ មិននិយាយពីទូរទស្សន៍ជាតិផង។ «ខ្ញុំគ្រាន់តែគិតថា វាច្រើនពេក។ យើងមានស្ថានីយទូរទស្សន៍កាន់តែច្រើនមែន ប៉ុន្តែវាសុទ្ធតែជាស្ថានីយដែលមានជំហរប្រកាន់បក្សនយោបាយម្ខាងៗ ។ យើងនៅខ្វះទូរទស្សន៍អព្យាក្រឹត ឬវិជ្ជាជីវៈដែលផ្តល់ព័ត៌មានគ្រប់ជ្រុងជ្រោយ»។ ទោះយ៉ាងណាក៏ដោយ ប្រធានសមាគមការពារសិទ្ធិមនុស្សអាដហុកសង្ឃឹមថា ទូរទស្សន៍របស់ប៉ូលីសនឹងមានឥទ្ធិពលក្នុងការផ្សព្វផ្សាយលើកទឹកចិត្តឲ្យពលរដ្ឋគោរពច្បាប់ កាត់បន្ថយករណីអសន្តិសុខសង្គមជាដើម។
និយាយមកដល់ត្រង់នេះ លោក កៃ គឹមសុង និពន្ធនាយកកាសែតភ្នំពេញប៉ុស្តិ៍ជាភាសាខ្មែរបានយល់ស្រប។ ថ្នាក់ដឹកនាំកាសែតភ្នំពេញប៉ុស្តិ៍រូបនេះ មិននិយាយដល់បញ្ហានយោបាយនោះឡើយ តែបានសាទរគម្រោងបង្កើតទូរទស្សន៍ និងវិទ្យុរបស់ក្រសួងមហាផ្ទៃ។ លោក កៃ គឹមសុង ដែលយល់ថា ចិនគ្រាន់តេមានសណ្តានចិត្តជួយឧបត្ថម្ភក្រសួងមហាផ្ទៃឲ្យបង្កើតប្រព័ន្ធផ្សព្វផ្សាយនោះ បាន វាយតម្លៃយ៉ាងដូច្នេះ៖«សម្រាប់ខ្ញុំ គឺវាល្អ។ វាបង្ហាញពីបរិយាកាសរីកចម្រើនក្នុងវិស័យសារព័ត៌មានទៅវិញទេ។ យើងដឹងហើយថាក្រសួងមហាផ្ទៃមានវេបសាយព័ត៌មានរបស់ខ្លួន ហើយក៏ទើបតែបង្កើតបានកាសែត ក្នុងពេលថ្មីៗនេះទៀត។ ដូច្នេះ ក្រសួងមហាផ្ទៃមានវិទ្យុ និងទូរទស្សន៍ដើម្បីបង្កើនការផ្សព្វផ្សាយសកម្មភាព និងព័ត៌មានសន្តិសុខរបស់ខ្លួន វាក៏ជាប្រការល្អដែរ»។
វាអាចជារឿងល្អក្នុងក្របខណ្ឌនៃការផ្សព្វផ្សាយព័ត៌មានមែន ប៉ុន្តែនៅពេលដែលទូរទស្សន៍និងវិទ្យុរបស់ក្រសួងមហាផ្ទៃត្រូវសហការជាមួយក្រុមហ៊ុននៃប្រទេសចិននោះ ការនេះវាក៏បង្កើតឲ្យមានការព្រួយបារម្ភខ្លះសម្រាប់លោក អ៊ូ វីរៈ និងលោក ធន សារាយដែរ។ ខណៈលោក ធន សារាយ គិតថាទូរទស្សន៍« ក្រសួងមហាផ្ទៃ-ចិន » នឹងក្លាយជាឧបករណ៍មួយ ទៀតដែលនាំវប្បធម៌ចិនចូលមកកម្ពុជានោះ លោក អ៊ូ វីរៈ មើលឃើញថាចិនកំពុងចាប់យកវិស័យនគរបាលមួយទៀត ក្រៅពីយោធារបស់កម្ពុជា។ ចំពោះលោក អ៊ូ វីរៈ មហាអំណាចចិនកំពុងតែប្រើប្រាស់វិស័យការពារជាតិ និងគម្រោងអភិវឌ្ឍ ដើម្បីពង្រីកឥទ្ធិពលរបស់ខ្លួនក្នុងតំបន់។
អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុក្រសួងមហាផ្ទៃ លោក ម៉ៅ ប៊ុណារិន បានពន្យល់អំពីមូលហេតុនៃការបង្កើតទូរទស្សន៍ប៉ុស្តិ៍លេខ៦១ និងវិទ្យុ៩០.២៥MHz ថា ក្រសួងមហាផ្ទៃចង់បង្កើនការចាក់ផ្សាយព្រឹត្តិការណ៍ព័ត៌មានទូទៅ ពិសេស នាទីសន្តិសុខមាតុភូមិ ឲ្យបានទាន់ពេលវេលា និងទៀងទាត់។ លោកបន្តថាជាង ២០ឆ្នាំមកហើយ ដែលក្រសួងមហាផ្ទៃបានផលិតកម្មវិធីទូរទស្សន៍មួយឈ្មោះថា នាទីសន្តិសុខមាតុភូមិ ដោយធ្វើការចាក់ផ្សាយតាមរយៈបណ្តាស្ថានីយទូរទស្សន៍មួយចំនួនក្នុងប្រទេស។ ប៉ុន្តែដោយ សារ តែការប្រកួតប្រជែងក្នុងវិស័យសោតទស្សន៍កាន់តែតានតឹង ដែលធ្វើឲ្យទូរទស្សន៍ទាំងនោះបន្ថយការផ្សព្វផ្សាយកម្មវិធីសន្តិសុខរបស់ក្រសួងមហាផ្ទៃ ទើបក្រសួងត្រូវពង្រីកប្រព័ន្ធផ្សព្វផ្សាយរបស់ខ្លួនដោយផ្ទាល់៕
Tag:
ស ខេង ទូរទស្សន៍ ចិន
© រក្សាសិទ្ធិដោយ thmeythmey.com