ជាតិ
អ្នកនាំពាក្យក្រសួងយុត្តិធម៌ និយាយខុសច្បាប់? រាប់ពីខាងឆ្វេង៖ លោក សុក សំអឿន លោក ហុង សុខហួរ លោក គឹម សន្តិភាព លោក នី ចរិយា
× ក្រោយពីតុលាការចាត់វិធានការលើ ហុង សុខហួរ មន្ត្រីរដ្ឋាភិបាលភិបាល បានធ្វើសន្និសីទកាសែត ព្យាយាមបកស្រាយការពារចំណាត់ការរបស់តុលាការ ខណៈដែលមន្ត្រីអង្គការក្រៅរដ្ឋាភិបាល និងអ្នកច្បាប់មួយចំនួនរិះគន់នីតិវិធីរបស់តុលាការលើសមាជិកព្រឹទ្ធសភាគណបក្សសម រង្ស៊ី លោក ហុង សុខហួរ។ លើសពីនេះ លោក គឹម សន្តិភាព អ្នកនាំពាក្យក្រសួងយុត្តិធម៌ និយាយថា តុលាការអាចនឹងមានចំណាត់ការលើលោក សម រង្ស៊ី ប្រសិនបើរកឃើញកំហុស។ អ្នកច្បាប់ មន្ត្រីជាន់ខ្ពស់អង្គការក្រៅរដ្ឋាភិបាល បានចាត់ទុកការលើកឡើងរបស់អ្នកនាំពាក្យរូបនេះ ចេះតែនិយាយការពារកំហុសរដ្ឋាភិបាល ផ្ទុយពីច្បាប់។
លោក ផៃ ស៊ីផាន លោក គឹម សន្តិភាព បានចេញមុខអត្ថាធិប្បាយពីករណីចាប់ខ្លួនសមាជិកព្រឹទ្ធសភា គណបក្សសម រង្ស៊ី លោក ហុង សុខហួរ នៅទីស្តីការគណៈរដ្ឋមន្ត្រី កាលពីថ្ងៃពុធម្សិលមិញ។ លោក គឹម សន្តិភាព អ្នកនាំពាក្យក្រសួងយុត្តិធម៌ បានព្រលយសម្តីថា បន្ទាប់ពីលោក ហុង សុខហួរ តុលាការអាចនឹងមានវិធានការលើលោក សម រង្ស៊ី បើរកឃើញថា លោក សម រង្ស៊ី មានជាប់ពាក់ព័ន្ធនឹងករណីនេះ។ «ករណីលោក សម រង្ស៊ី សូមបញ្ជាក់ថា ករណីនេះ បញ្ហាព្រហ្មទណ្ឌជាក់ស្តែង យើងអនុវត្តលើជនដែលប្រព្រឹត្តផ្ទាល់...។ ប៉ុន្តែក្នុងករណីបណ្តឹងដែលកំពុងស្ថិតនៅក្នុងបណ្តឹងតុលាការ វាជាសិទ្ធិអំណាចរបស់តុលាការ ហើយប្រសិនបើតុលាការរកឃើញថា មានចំណងទាក់ទងណាមួយនោះ ចំណាត់ការនីតិវិធីព្រហ្មទណ្ឌនឹងមាន»។ នេះជាការបញ្ជាក់របស់អ្នកនាំពាក្យខាងលើ។
ការលើកឡើងរបស់លោក គឹម សន្តិភាព ផ្ទុយពីច្បាប់ ហើយគ្រាន់តែដើម្បីលាក់បាំងនូវកំហុសរបស់រដ្ឋាភិបាល និងតុលាការប៉ុណ្ណោះ។ នេះជាការរិះគន់របស់លោក នី ចរិយា អនុបណ្ឌិតច្បាប់ និងជាមន្ត្រីជាន់ខ្ពស់អង្គការអាដហុក។ លោក នី ចរិយា មិនញញើតនឹងនិយាយថា តុលាការចាប់ខ្លួនលោក ហុង សុខហួរ ទាំងគ្មានកំហុស ហើយកាន់តែខុសបើតុលាការមានវិធានការលើលោក សម រង្ស៊ី ទៀតនោះ។ លោកថា លោក ហុង សុខហួរ មិនត្រឹមតែមិនបានប្រព្រឹត្តបទល្មើសជាក់ស្តែងទេ ថែមទាំងមិនបានប្រព្រឹត្តបទល្មើសក្លែងបន្លំឯកសារសាធារណៈ ឬប្រើប្រាស់ឯកសារក្លែងក្លាយ ដូចការចោទប្រកាន់របស់តុលាការ និងរដ្ឋាភិបាលនោះឡើយ។
លោក គឹម សន្តិភាព បានលើកអំណះអំណាងដោយផ្អែកទៅលើមាត្រា ៨៦ នៃក្រមនីតិវិធីព្រហ្មទណ្ឌថា លោក ហុង សុខហួរ ពិតជាបានប្រព្រឹត្តបទល្មើសព្រហ្មទណ្ឌជាក់ស្តែងមែន ដែលអាចឲ្យតុលាការចាប់ខ្លួនរូបលោក ដោយមិនចាំបាច់ដកអភ័យឯកសិទ្ធិជាសមាជិកព្រឹទ្ធសភាជាមុន។ អ្នកនាំពាក្យរូបនេះ ពន្យល់ពីនិយមន័យនៃបទល្មើសជាក់ស្តែងយ៉ាងនេះថា៖« ទី ១ បទល្មើសដែលកំពុងប្រព្រឹត្ត ទី២ បទល្មើសដែលប្រព្រឹត្តរួចភ្លាម។ ដូច្នេះក្រឡេកមកមើលករណីនេះវិញ ទី ១ នៅពេលលោក ហុង សុខហួរ កំពុងផលិតវីដេអូ គឺគ្មាននរណាដឹងទេ ទី ២ ដឹងថាកើតបទល្មើស គឺនៅពេលដែលគាត់បង្ហោះឯកសារនេះចេញតែម្តង។ នេះហើយកំណត់ថា បទល្មើសកំពុងកើតឡើង…..។ ករណីនេះ នៅពេលបង្ហោះនៅលើ Page សម រង្ស៊ី សមត្ថកិច្ច បានធ្វើករណីនេះភ្លាម បន្តរហូត ព្រោះយោងតាមមាត្រា ១០៦ ធ្វើជាបន្តបន្ទាប់ ចាប់ពីថ្ងៃមានបទល្មើសកើតឡើងរហូតដល់ ៧ ថ្ងៃ ព្រោះគាត់ផ្សព្វផ្សាយនៅលើប្រព័ន្ធហ្វេសប៊ុក»។
មកស្តាប់ពីអំណះអំណាងរបស់លោក នី ចរិយា វិញ ដែលថា លោក ហុង សុខហួរ មិនបានប្រព្រឹត្តបទល្មើសក្លែងបន្លំឯកសារសាធារណៈនោះ លោក ពន្យល់ដូច្នេះថា៖« តាមច្បាប់ បទល្មើសក្លែងឯកសារសាធារណៈ លុះត្រាតែជននោះ បានក្លែងឯកសារសាធារណៈហើយ ធ្វើជាសំណើណាមួយ ឲ្យអ្នកដទៃ ឬអាជ្ញាធរ យល់ព្រមតាមសំណើររបស់ខ្លួន។ បែបនេះ បានគេហៅថា ក្លែងឯកសារសាធារណៈ។ អនុបណ្ឌិតច្បាប់រូបនេះ បញ្ជាក់បន្ថែមយ៉ាងនេះទៀតថា៖« ករណីលោក ហុង សុខហួរ គាត់គ្រាន់តែបកស្រាយ ឬគ្រាន់តែធ្វើបទបង្ហាញមួយប៉ុណ្ណោះ។ ចុះបើអ្នកធ្វើបទបង្ហាញដទៃទៀត និយាយខុសមិនជាប់គុកអស់ហើយ? វាគ្រាន់តែជាទស្សនៈនៃបុគ្គលម្នាក់ទេ»។
អ្នកច្បាប់ដ៏ល្បីនៅកម្ពុជាមួយរូប ក៏បានចេញមុខវែកញែកករណីនេះដែរ។ លោកមេធាវី សុក សំអឿន មិនទាន់ហ៊ានសន្និដ្ឋានថា លោក ហុង សុខហួរ ប្រព្រឹត្តបទល្មើសក្លែងឯកសារសាធរណៈឬយ៉ាងណានោះទេ។ តែលោកមិនយល់ស្របនឹងការលើកឡើងរបស់លោក គឹម សន្តិភាព ដែលថា លោក ហុង សុខហួរ ប្រព្រឹត្តបទល្មើសជាក់ស្តែងនោះទេ។ «រូបនៅលើហ្វេសប៊ុក គ្រាន់តែជា រូបភាព មិនមែនមនុស្សកំពុងប្រព្រឹត្តនោះឡើយ។ វាមិនមែនជាបទល្មើសជាក់ស្តែងទេ»។ លើសពីនេះ លោកមេធាវី អះអាងថា ការបង្ហោះវីដេអូ នៅលើទំព័រហ្វេសប៊ុកមិនមែនជាការផ្សព្វផ្សាយជាសាធារណៈឡើយ ពីព្រោះគ្មានច្បាប់ណាចែង។ «នៅលើសកលលោកនេះ គេមិនបានកំណត់ថា ការបង្ហោះអ្វីមួយនៅលើហ្វេសប៊ុកផ្ទាល់ខ្លួន ជាការផ្សព្វផ្សាយសារធារណៈទេ។ កម្ពុជាយើងក៏មិនទាន់មានច្បាប់គ្រប់គ្រង់ប្រព័ន្ធអ៊ីធឺណេតដែរ»។ នេះជាការសង្កត់ធ្ងន់របស់លោក សុក សំអឿន។
សូមរម្លឹកថា សមត្ថកិច្ចបានចាប់ខ្លួន លោក ហុង សុខហួរ កាលពីព្រឹកថ្ងៃទី១៥ ខែសីហា នៅភូមិគ្រឹះមួយកន្លែង ស្ថិតក្នុងសង្កាត់ភ្នំពេញថ្មី ខណ្ឌសែនសុខ ក្រោយពីលោក ហុង សុខហួរ បកស្រាយសន្ធិសញ្ញារដ្ឋាភិបាលសម័យសាធារណៈរដ្ឋប្រជាមានិតកម្ពុជាជាមួយវៀតណាមប្រាសចាកការពិត។ នៅថ្ងៃទី១៥សីហា ដដែល ព្រះរាជអាជ្ញារង មាស ច័ន្ទពិសិដ្ឋ បានចោទប្រកាន់លោក ហុង សុខហួរ ប្រព្រឹត្តបទល្មើសចំនួន ៣ ករណី រួមមាន ក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កភាពអនាធិបតេយ្យ ដល់សន្តិសុខ តាមមាត្រា ៦២៩ ៦៣០ និង៤៩៥ នៃក្រមព្រហ្មទណ្ឌ៕
© រក្សាសិទ្ធិដោយ thmeythmey.com