អន្តរជាតិ
នយោបាយជាតិ
កូរ៉េទាំងពីរបាញ់ផ្លោងដាក់គ្នា ហើយប្រជាជនជាប់ព្រំដែនរត់ភៀសខ្លួន
× ថ្ងៃព្រហស្បតិ៍នេះ កូរ៉េខាងត្បូងសម្រេចបាញ់ផ្លោងតបវិញ ក្រោយពេលដែលទាហានកូរ៉េខាងជើងបានបាញ់គ្រាប់រ៉ុហ្កែតផ្លោងចូលទឹកដីខ្លួន។អ្នកនាំពាក្យក្រសួងការពារជាតិកូរ៉េខាងត្បូងបានបញ្ជាក់ថាប្រជាជនច្រើនគ្រួសារត្រូវបានគេណែនាំឲ្យភៀសខ្លួនចេញពីព្រំដែនក្រោយមានការបាញ់តបតគ្នានេះដែរ។ នេះបើយោងតាមទីភ្នាក់ងារព័ត៌មាន AFP។
ក្រសួងការពារជាតិកូរ៉េខាងត្បូងបានប្រកាសថា កងកម្លាំងរបស់ខ្លួនបានសម្រេចបាញ់តបតចូលដីកូរ៉េខាងជើងវិញ ក្រោយពេលដែលកងទ័ពកូរ៉េខាងជើងបាញ់គ្រាប់រ៉ុហ្កែតចូលទឹកដីខ្លួនមុននៅរសៀលថ្ងៃព្រហស្បតិ៍នេះ។ មិនមានរបាយការណ៍ណាមួយបញ្ជាក់ពីអ្នកស្លាប់ ឬបាត់បង់ជីវិតឡើយ ប៉ុន្តែកូរ៉េខាងត្បូងបានបញ្ជាឲ្យមានការជម្លៀសប្រជាជននៅជាប់តំបន់ដែលមានការប៉ះទង្គិចគ្នានេះ ដើម្បីការពារគ្រោះថ្នាក់។ កូរ៉េខាងត្បូងបាញ់តបតវិញដោយប្រើប្រាស់កាំភ្លើងធំច្រើនគ្រាប់ ហើយបើតាមសម្តីអ្នកនាំពាក្យក្រសួងការពារជាតិក្រុងសេអ៊ូល កងកម្លាំងកូរ៉េខាងត្បូងត្រៀមលក្ខណៈរួចជាស្រេចនិងប្រុងជើងការហើយសម្រាប់តបត បើសិនជាមានករណីវាយប្រហារទ្រង់ទ្រាយធំកើតឡើងនោះ។
ការបាញ់ផ្លោងដាក់គ្នានេះកើតឡើងក្រោយមានការតានតឹងដាក់គ្នាខ្លាំងរយៈពេលប៉ុន្មានថ្ងៃចុងក្រោយ។ មិនមានការបញ្ជាក់ច្បាស់ឡើយថា តើកូរ៉េខាងជើងបាញ់សម្តៅទាហានកូរ៉េខាងត្បូងឬយ៉ាងណា ប៉ុន្តែជារួមគេវាយតម្លៃថា គ្រាប់របស់កូរ៉េខាងជើងបាញ់សម្តៅមេក្រូ និងគ្រឿងបំពងសំឡេងរបស់កូរ៉េខាងត្បូងដែលឃោសនាក្តែងៗបង្ខួចឈ្មោះរបបដឹកនាំក្រុងព្យុងយ៉ាងប៉ុណ្ណោះ។ កន្លងមកកូរ៉េខាងជើងបានទាមទារម្តងជាពីរដងឲ្យក្រុងសេអ៊ូលដកឧបករណ៍ទាំងនោះចេញឲ្យអស់ពីព្រំដែន ប៉ុន្តែកូរ៉េខាងត្បូងមិនខ្ចីស្តាប់និងធ្វើតាមការទាមទារឡើយ។
កូរ៉េខាងត្បូងគ្រោងនឹងកោះប្រជុំបន្ទាន់មួយ ដើម្បីជជែកពិភាក្សាពីការវិវត្តន៍នៃស្ថានការណ៍ជារួមនៃការប៉ះទង្គិចគ្នានេះដែរ។ គេមិនរំពឹងថាស្ថានការណ៍នេះកាន់តែអាក្រក់ទេ ព្រោះជាច្រើនលើកច្រើនសារមកហើយដែលភាគីទាំងពីរបាញ់ឆ្លងឆ្លើយដាក់គ្នាវិញទៅមក។ ហើយម្យ៉ាងបើកម្ទេចឧបករណ៍ឃោសនានោះបានសម្រេចហើយ កូរ៉េខាងជើងក៏មិនបន្តបាញ់ផ្លោងទៀតដែរ។ អាចនិយាយថា ភាគីទាំងពីរមិនអាចបន្តធ្វើឲ្យការបោះះទង្គិចគ្នានេះកាន់តែធ្ងន់ធ្ងរ រហូតរីករាលដាលទៅជាសង្គ្រាមបានឡើយ។
ស្ថានការណ៍ជារួមនៅឧបទ្វីបកូរ៉េ កាន់តែក្តៅខ្លាំងក្រោយពេលដែលក្រុងសេអ៊ូលចោទក្រុងព្យុងយ៉ាងថាបានបង្កប់មីននៅតំបន់គ្មានយោធា ដែលបានធ្វើឲ្យទាហានខ្លួនរងរបួសកន្លងមក។ ក្រុងព្យុងយ៉ាងខឹងច្រលោតដែរ ព្រោះសម្តីចោទប្រកាន់គ្មានភស្តុតាងរបស់ក្រុងសេអ៊ូលនេះ។ បន្ថែមពីនេះ កូរ៉េខាងត្បូងក៏សម្រេចបន្តធ្វើសមយុទ្ធយោធាទ្រង់ទ្រាយធំប្រចាំឆ្នាំ ជាមួយអាមេរិកនៅក្បែរៗព្រំដែនកូរ៉េខាងជើងទៀត ទោះជាកូរ៉េខាងជើងគំរាមខ្លាំងប៉ុណ្ណាក្តី។ អ្វីដែលគេបារម្ភ កូរ៉េខាងជើងបានព្រមានថានឹងវាយប្រហារអាមេរិកដោយប្រើប្រាស់អាវុធប្រល័យលោកដែលខ្លួនមានដែរ បើសិនកូរ៉េខាងត្បូងនិងអាមេរិកចរចេសរឹងរូសបន្តធ្វើសមយុទ្ធទៀត។ ប៉ុន្តែដល់ថ្ងៃធ្វើសមយុទ្ធចាប់ផ្តើម កូរ៉េខាងជើងស្រាប់តែស្ងៀមស្ងាត់មិនមានសកម្មភាពអ្វីសោះ៕
© រក្សាសិទ្ធិដោយ thmeythmey.com