ជាតិ
នយោបាយជាតិ
លោក ហ៊ាង ឫទ្ធី៖ លោក ម៉ម សូណង់ដូ ឲ្យខ្ញុំវាយប្រហារតែ CNRP កុំប៉ះពាល់ CPP
×
លោក ហ៊ាង ឫទ្ធី អនុប្រធានគណបក្សសំបុកឃ្មុំសង្គមប្រជាធិបតេយ្យ បានចូលខ្លួនបំភ្លឺនៅសាលាដំបូងរាជធានីភ្នំពេញ នាព្រឹកថ្ងៃទី៤ ខែវិច្ឆិកា ទាក់ទងនឹងបណ្តឹងសុំរំលាយគណបក្សចេញពីបញ្ជីរបស់ក្រសួងមហាផ្ទៃ។ ការដាក់បណ្ដឹងឲ្យរំលាយគណបក្សនេះធ្វើឡើងក្រោយពីលោក ហ៊ាង ឫទ្ធី និងលោក ម៉ម សូណង់ដូ ប្រធានគណបក្សនេះ មានទំនាស់ផ្ទៃក្នុងបក្សជាមួយគ្នា។
ថ្លែងប្រាប់អ្នកសារព័ត៌មានក្រោយការឆ្លើយបំភ្លឺនៅតុលាការ លោក ហ៊ាង ឫទ្ធី បន្តលើកឡើងថា លោក ម៉ម សូណង់ដូ គឺជាអ្នកប្រជាធិបតេយ្យក្លែងក្លាយ។ លោកបានកត់សម្គាល់ថា លោក ម៉ម សូណង់ដូ ទំនងជាមានទំនាក់ទំនងជិតស្និទ្ធជាមួយគណបក្សប្រជាជនកម្ពុជា។
លោក ហ៊ាង ឫទ្ធី បានបញ្ជាក់យ៉ាងដូច្នេះថា៖ «ខ្ញុំគ្រាន់តែបញ្ជាក់ជូនអត្ថន័យទេ។ រឿងភស្តុតាងដែលខ្ញុំបានឃើញគាត់(លោកម៉ម សូណងដូ) ជាឧបករណ៍គណបក្សប្រជាជននោះគឺមិនឃើញទេ។ ក៏ប៉ុន្តែអ្វីដែលខ្ញុំច្បាស់ជាងគេគឺគាត់បង្គាប់ខ្ញុំ អនុប្រធានគណបក្សឲ្យវាយប្រហាតែគណបក្សសង្គ្រោះជាតិ មិនឲ្យវាយគណបក្សប្រជាជនកម្ពុជា មានន័យថាគាត់មានទំនាក់ទំនងជាមួយគណបក្សប្រជាជនបាត់ទៅហើយ។ អត្ថន័យបានន័យថា មិនមែនជាគណបក្សឯករាជ្យ គណបក្សបម្រើឆន្ទះប្រជាពលរដ្ឋខ្មែរនោះទេ»។
ជាមួយគ្នានេះផងដែរ លោក ហ៊ាង ឫទ្ធី ជឿជាក់ថា ថ្នាក់ដឹកនាំគណបក្សសំបុកឃ្មុំ សង្គមប្រជាធិបតេយ្យ គ្មានសមត្ថភាពគ្រប់គ្រាន់ក្នុងការប្រជែងជាមួយគណបក្សដទៃទៀតនោះឡើយ។
សារព័ត៌មានថ្មីៗ មិនអាចអាចសុំបំភ្លឺពីលោក ម៉ម សូណង់ដូ បានឡើយនៅព្រឹកថ្ងៃពុធនេះ៕
Tag:
គណបក្សសំបុកឃ្មុំសង្គមប្រជាធិបតេយ្យ
© រក្សាសិទ្ធិដោយ thmeythmey.com