លោក សម រង្ស៊ី ថា ខ្លួននឹងការពារកូនលោក ហ៊ុន សែន បើថ្ងៃណាមួយលោក ហ៊ុន សែន មានរឿងនៅតុលាការ

ជាតិ

នយោបាយជាតិ

លោក សម រង្ស៊ី ថា ខ្លួននឹងការពារកូនលោក ហ៊ុន សែន បើថ្ងៃណាមួយលោក ហ៊ុន សែន មានរឿងនៅតុលាការ

13, Nov 2015 , 9:57 am

រូបភាព

ដោយ: ថ្មីៗ

ប្រធានគណបក្សសង្គ្រោះជាតិ លោក សម រង្ស៊ី បានអះអាងថា ប្រសិនបើថ្ងៃណាមួយលោក ហ៊ុន សែន ត្រូវតុលាការចោទប្រកាន់ពីបទល្មើសអ្វីមួយនោះ រូបលោកនឹងចេញមុខការពារមុនគេ នូវកូនៗរបស់លោកនាយករដ្ឋមន្ត្រី។ លោក សម រង្ស៊ី ថ្លែងបែបនេះ រយៈ ពេលតែជាង ៦ ម៉ោងប៉ុណ្ណោះ បន្ទាប់ពីលោក ហ៊ុន សែន ថ្លែងសារនយោបាយវាយប្រហាររូបលោកខ្លាំងៗ។

ការលើកឡើងរបស់លោក សម រង្ស៊ី ធ្វើឡើងតាមរយៈសារអេឡិចត្រនិច ផ្ញើទៅលោកនាយករដ្ឋមន្ត្រី ហ៊ុន សែន ផ្ទាល់ កាលពីម៉ោង ២៣ និង៣០ នាទី ថ្ងៃទី ១២ ខែវិច្ឆិកា ហើយដែលត្រូវបានផ្សព្វផ្សាយបន្តដោយសារសារព័ត៌មាន Fresh News ។ សាររបស់លោក សម រង្ស៊ី ដែលផ្ញើទៅលោក ហ៊ុន សែន បន្ទាប់ពីលោកនាយករដ្ឋមន្ត្រីហៅលោក សម រង្ស៊ី ថា «កូនអាក្បត់ជាតិ» យ៉ាងនេះថា៖ «បើថ្ងៃណាមួយ លោក ហ៊ុន សែន ត្រូវគេចោទប្រកាន់ពីរឿងអ្វីមួយ នៅចំពោះមុខតុលាការណាមួយ ខ្ញុំនឹងចេញមុខមុនគេ ការពារកូនរបស់លោក បើកូនទាំងនោះទទួលនូវការស្តីបន្ទោសណាមួយ ពីព្រោះកូនមិនមែនជាអ្នកទទួលខុសត្រូវ ហើយក៏មិនពាក់ព័ន្ធអ្វី ទៅនឹងរឿងដែលគេចោទ ប្រកាន់ឪពុកនោះទេ»។

ជាមួយគ្នានេះ នៅក្នុងសារអ៊ីមែលដដែលនោះ លោក សម រង្ស៊ី ក៏បានលើកឡើងពីបញ្ហាអំពើហិង្សាលើតំណាងរាស្ត្រគណបក្សសង្គ្រោះជាតិ និងការដកតំណែងលោក កឹម សុខា ពីអនុប្រធានទី ១ នៃរដ្ឋសភា ដែលធ្វើឲ្យបរិយាកាសនយោបាយអាក្រក់និងជាឧបសគ្គដល់ការបោះឆ្នោត នៅឆ្នាំ ២០១៧ និង ឆ្នាំ ២០១៨ ។«ទង្វើទាំងអស់នេះ អាចជាផ្នែកនៃគម្រោងមួយ ដែលគេរៀបចំឡើង ដើម្បីបង្អាក់ដំណើរការបោះឆ្នោត ទាំងមូល តែម្តង។ នេះគ្រាន់តែជា យោបល់ របស់ខ្ញុំ»។ នេះជាការឆ្លើយតបរបស់លោក សម រង្ស៊ី ជុំវិញបញ្ហាបោះឆ្នោតនាពេលខាងមុខ ក្រោយពីលោកនាយករដ្ឋមន្ត្រីចោទលោក សម រង្ស៊ី ថា និយាយគ្មានភស្តុតាង ហើយអាចប្រឈមនឹងផ្លូវច្បាប់៕