ជាតិ
នយោបាយជាតិ
លោក អេង ឆៃអ៊ាង ហៅដីកាចាប់ខ្លួនលោក សម រង្ស៊ី ថា ខុសនីតិវិធី
× មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង យល់ថា ដីកាតាមចាប់ខ្លួនលោក សម រង្ស៊ី ប្រធានគណបក្សខ្លួននាពេលនេះ គឺជារឿងនយោបាយ ដែលមិនមានច្បាប់ទម្លាប់ត្រឹមត្រូវឡើយ។លោក បាននិយាយបែបចំអកទៅលើដីកាចាប់ខ្លួននេះវិញថា តុលាការអនុវត្តដីកាចាប់ខ្លួនលោក សម រង្ស៊ី តាមអំណាចអ្នកនយោបាយ ។
លោក អេង ឆៃអ៊ាង បានចាត់ទុកករណីនេះថា «មិនមែនជារឿងឈឺចាប់ទេ តែជារឿងគួរឲ្យអស់សំណើច » ដែលអ្នកនយោបាយនៅកម្ពុជា នៅតែចង់យកចាញ់យកឈ្នះគ្នា ។«ខ្ញុំយល់ថានេះគឺជារឿងនយោបាយទាំងអស់ ដែលមិនមានច្បាប់ទម្លាប់ច្បាស់លាស់ ព្រោះលោក សម រង្ស៊ី បានចូលស្រុកនៅឆ្នាំ២០១៣ ចុះម៉េចបានជាតុលាការមិនព្រមបង្គាប់ចាប់ខ្លួន។ ហើយឥឡូវតុលាការទើបចេញដីកាចាប់ខ្លួន នៅពេលលោក សម រង្ស៊ី មានអភ័យឯកសិទ្ធិទៅវិញ ក្រោយអ្នកនយោបាយកាន់អំណាច ព្រមានបក្សប្រឆាំង»។ នេះជាការបញ្ជាក់របស់លោក អេង ឆៃអ៊ាង ដែលលោកបានចំអកទៅលើប្រព័ន្ធយុត្តិធម៌កម្ពុជាទៀតថា ច្បាប់ស្រុកខ្មែរចង់ធ្វើអ្វីក៏បាន ឲ្យតែអ្នកមានអំណាចនយោបាយចង់ឈ្នះ អ្នកនយោបាយគណបក្សប្រឆាំង។
ក្រោយពីតុលាការបានចេញចេញដីកាបង្គាប់ឲ្យចាប់ខ្លួននេះលោក សម រង្ស៊ី ក៏បានដឹងពីដំណឹងនេះដែរ ដោយលោកបានសរសេរលើហ្វេសប៊ុកខ្លួនថា «ដីកា បង្គាប់ ឲ្យ ចាប់ខ្លួន ចំពោះ រូបខ្ញុំ ទើបតែត្រូវគេបញ្ចេញ បួន-ដប់ នាទី មុននេះ»។
លោក ស៊ឺ វណ្ណនី ព្រះរាជអជ្ញារងសាលារាជធានីភ្នំពេញ នាថ្ងៃទី១៣ ខែវិច្ឆិកា ឆ្នាំ២០១៥ នេះ បានចេញដីការចាប់ខ្លួនលោក សម រង្ស៊ី តាមអំណាចសាលដិកាស្ថាពរ ចុះថ្ងៃទី១២ ខែមីនា ឆ្នាំ២០១៣ របស់សាលាឧទ្ធរណ៍។ លោក សម រង្ស៊ី ត្រូវចោទប្រកាន់ពីបទ បរិហារកេរ្តិ៍ជាសាធារណៈ និងញុះញង់ឲ្យមានការរើសអើង ប្រព្រឹត្តទៅនៅសារមន្ទីរជើងឯក កាលពីថ្ងៃទី១៧ ខែមេសា ឆ្នាំ២០០៨ ។
ក្នុងសំណុំរឿងនេះ លោក សម រង្ស៊ី ត្រូវតុលាការរាជធានីភ្នំពេញកាត់ទោសឲ្យជាប់ពន្ធនាគារ២ឆ្នាំ និងពិន័យ៨លានរៀល ហើយសាលាឧទ្ធរណ៍បានសម្រេចចំណាយសំណុំរឿងចេញពីបញ្ជីក្តីសាលាឧទ្ធរណ៍ តែលោកមិនទាន់ទទួលការអនុវត្តន៍ទោសឡើយ៕
Tag:
អេង ឆៃអ៊ាង
សម រង្ស៊ី
© រក្សាសិទ្ធិដោយ thmeythmey.com