ជាតិ
សង្គមជាតិ
ថ្មីៗប្រើគោរមងារ«សម្តេច ហ៊ុន សែន» និង «ឯកឧត្តម សម រង្ស៊ី» ចាប់ពីពេលនេះទៅ
× ភ្នំពេញ៖ រដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានចេញផ្សាយសេចក្តីជូនដំណឹងមួយនៅព្រឹកថ្ងៃទី១៦ធ្នូនេះ រម្លឹកអង្គភាពសារព័ត៌មានទាំងអស់ឲ្យគោរពគោរមងារ«សម្តេច» ដែលត្រូវបានព្រះរាជទានដោយព្រះមហាក្សត្រ ជូនឥស្សរជនជាន់ខ្ពស់។ ឥស្សរជនដែលទទួលបានគោរមងារសម្តេច មានដូចជា សម្តេច ហេង សំរិន, សម្តេច ហ៊ុន សែន, សម្តេច ស ខេង, សម្តេច សាយ ឈុំ, សម្តេច ប៊ុន រ៉ានី, សម្តេច គង់ សំអុល, សម្តេចក្រុមព្រះ នរោត្តម រណឬទ្ធិ ជាដើម។ សារព័ត៌មានថ្មីៗឯកភាពនឹងសេចក្តីជូនដំណឹងនេះ។ ប៉ុន្តែ ស្របពេលជាមួយគ្នា សារព័ត៌មានអនឡាញថ្មីៗ នឹងប្រើពាក្យឯកឧត្តមដើម្បីហៅឯកឧត្តម សម រង្ស៊ី និងឯកឧត្តម កឹម សុខា ជាផ្លូវការនៅក្នុងអត្ថបទព័ត៌មានរបស់ខ្លួន។
ក្រោយពីទទួលបានសេចក្តីជូនដំណឹងរបស់ក្រសួងព័ត៌មានរួចមក សារព័ត៌មានអេឡិចត្រូនិកថ្មីៗសូមជម្រាបជូនអ្នកអាន អ្នកស្តាប់ អ្នកទស្សនា នៃសារព័ត៌មានអនឡាញថ្មីៗឲ្យជ្រាបថា ក្រុមការងារសារព័ត៌មានថ្មីៗសម្រេចឯកភាពគោរពតាមសេចក្តីជូនដំណឹងរបស់ក្រសួងព័ត៌មាន។
ប៉ុន្តែ ដើម្បីកុំឲ្យមានការភ័ន្តច្រឡំ ឬមានការបកស្រាយខុសគោលដៅ សារព័ត៌មានថ្មីៗសូមបញ្ជាក់ថា ចាប់ពីពេលនេះតទៅ សារព័ត៌មានអនឡាញថ្មីៗ នឹងហៅលោក សម រង្ស៊ី និងលោក កឹម សុខា ថា ឯកឧត្តមផងដែរ។ ឯកឧត្តម សម រង្ស៊ី និងឯកឧត្តម កឹម សុខា គឺជាប្រធាន និងអនុប្រធានគណបក្សប្រឆាំងដែលមានអាសនៈនៅក្នុងរដ្ឋសភា។ ចំពោះតំណាងរាស្ត្រផ្សេង និងប្រធានគណបក្សផ្សេងដែលមិនទាន់មានអាសនៈនៅក្នុងរដ្ឋសភា សារព័ត៌មានអនឡាញថ្មីៗ នឹងបន្តហៅងារជា«លោក»ដូចសព្វដង។
សូមបញ្ជាក់ថា ការបង្កើតបទបញ្ជាផ្ទៃក្នុងសម្រាប់សារព័ត៌មានថ្មីៗនៅពេលនេះ បានកើតឡើងក្រោយការចេញសេចក្តីជូនដំណឹងរបស់ក្រសួងព័ត៌មាន។
នៅព្រឹកថ្ងៃពុធទី១៦ខែធ្នូនេះ ក្រសួងព័ត៌មានបានតម្រូវឲ្យម្ចាស់អង្គភាពសារព័ត៌មានទាំងអស់គោរពលិខិតក្រើនរម្លឹកស្តីពីការគោរពវិជ្ជាជីវៈសារព័ត៌មានរបស់ក្រសួងចុះថ្ងៃទី៣១កក្កដាឆ្នាំ២០០០ និងសេចក្តីណែនាំមួយចំនួនទៀត ដែលសំដៅដល់ការអនុវត្តតាមច្បាប់របស់កម្ពុជា។ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ត្រូវចេញផ្សាយសេចក្តីណែនាំមួយចុះថ្ងៃទី១៦ខែធ្នូនេះ ដើម្បីរម្លឹកឲ្យអង្គភាពសារព័ត៌មានទាំងអស់ គោរពគោរមងារ«សម្តេច»។
«កន្លងមក ក្រសួងសង្កេតឃើញថា មានប្រព័ន្ធផ្សព្វផ្សាយមួយចំនួននៅមានភាពខ្វះចន្លោះ ឬបំភ្លេចចោល មិនប្រើគោរមងារ ដែលប្រោសព្រះរាជទានដោយព្រះមហាក្សត្រ ជាស្ថាប័នកំពូលនៃព្រះរាជាណាចក្រកម្ពុជា ពិសេសគោរពងារសម្តេច ដែលបានប្រគល់ជូនឥស្សរជនជាថ្នាក់ដឹកនាំដ៏ឆ្នើម តាមរយៈព្រះរាជក្រឹត្យ មានលក្ខណៈជាលិខិតបទដ្ឋានគតិយុត្ត មានតម្លៃក្នុងឋានានុក្រមច្បាប់»។ នេះជាខ្លឹមសារនៃមូលហេតុដែលក្រសួងព័ត៌មានត្រូវចេញលិខិតរម្លឹកអ្នកសារព័ត៌មានឲ្យគោរពគោរមងារសម្តេច។
សព្វថ្ងៃនេះ ឥស្សរជនដែលទទួលបានគោរពងារសម្តេច មានដូចជា សម្តេច ហេង សំរិន, សម្តេច ហ៊ុន សែន, សម្តេច ស ខេង, សម្តេច សាយ ឈុំ, សម្តេច ប៊ុន រ៉ានី, សម្តេច គង់ សំអុល, សម្តេចក្រុមព្រះ នរោត្តម រណឬទ្ធិ ជាដើម៕
© រក្សាសិទ្ធិដោយ thmeythmey.com