ពីនេះ ពីនោះ
សម្តេច! តម្លៃចំណតរថយន្តជុំវិញផ្សារ ត្រូវគេយកតាមចិត្តដដែល!
× ដូចវែកចក។ ឬអាចនិយាយបានថា គេនៅតែមិនស្តាប់បញ្ជាសម្តេចនាយករដ្ឋមន្ត្រី ហ៊ុន សែន ហើយរាស្ត្រក៏នៅតែខឹងរដ្ឋាភិបាលដដែល។ មានស្លាកបិទថា តម្លៃចតរថយន្តមួយលើក៥០០រៀលមែន ប៉ុន្តែជាក់ស្តែង ក្រុមសន្តិសុខនៃក្រុមហ៊ុនឯកជនជុំវិញផ្សារនៅតែយកប្រាក់១០០០រៀល ឬ២០០០រៀល តាមចិត្តដដែល។
នៅក្នុងខែកុម្ភៈឆ្នាំ២០១៤ សម្តេច ហ៊ុន សែន បានស្រែកបញ្ជាឲ្យក្រុមហ៊ុនឯកជនទាំងនោះយកតម្លៃតាមសៀវភៅបន្ទុក។ តែឥតប្រយោជន៍ទាល់តែសោះ។ អភិបាលរាជធានីក៏ធ្លាប់ព្រមានដកហូតសិទ្ធិអាជីវកម្មពីក្រុមហ៊ុនដែលទទួលបន្ទុកចាត់ចែងចំណតជុំវិញផ្សារដែរ។ ប៉ុន្តែវាក៏នៅតែគ្មានប្រសិទ្ធភាព។ គ្មានអ្នកណាស្តាប់អ្នកណាទេ។
តាំងពីមន្ត្រីជាន់ខ្ពស់នៅសាលារាជធានី រហូតដល់ប្រធានផ្សារ បានត្រឹមតែនិយាយប្រាប់សារព័ត៌មាន ឲ្យពលរដ្ឋទូរសព្ទប្តឹង បើសន្តិសុខយកលុយចំណតលើសកំណត់។ នេះមិនមែនជាវិធានការចម្បងឡើយ។ ហេតុអ្វីប្រធានអង្គភាពគ្មានទឹកមាត់និយាយឲ្យបុគ្គលិកស្តាប់ ដោយប្រាប់ឲ្យពួកគេយកថ្លៃចំណតតាមផ្ទាំងតម្លៃដែលពួកគេដាក់តាំងជុំវិញផ្សារបាន?
ល្បិច
ពេលខ្លះអ្នកមកយកលុយពីម្ចាស់រថយន្តគឺមិនមែនបុគ្គលិកក្រុមហ៊ុនដែលទទួលបន្ទុកចាត់ចែងចំណតនោះឡើយ។ អាចជាមនុស្សនៅក្បែរនោះដែលគេស្គាល់ជិតដិត ឬជាបុគ្គលិករបស់ក្រុមហ៊ុនដែរ តែពួកគេស្លៀកធម្មតា ហើយមកទារលុយលើសកំណត់ពីម្ចាស់រថយន្ត។ ធ្វើយ៉ាងដូច្នេះ ប្រសិនបើមានម្ចាស់រថយន្តណាប្តឹងផ្តល់ នោះគេអាចគេចចេញពីការទទួលខុសត្រូវបានខ្លះ។
សម្តេចនាយករដ្ឋមន្ត្រីបានសម្រេចការងារកាត់បន្ថយចំណាយរបស់ប្រជាជនបានច្រើនក្នុងរយយៈពេលចុងក្រោយនេះ។ តែសូមសម្តេចត្រឡប់ក្រោយទៅចាត់ការរឿងតម្លៃចំណតរថយន្តជុំវិញផ្សារម្តងទៀត។ ពលរដ្ឋមានការងារច្រើន ដើម្បីរកស៊ីចិញ្ចឹមគ្រួសារ ហើយក៏មិនចង់ឈ្លោះជាមួយក្រុមសន្តិសុខជុំវិញផ្សារដែរ។ ប៉ុន្តែពលរដ្ឋក្តៅក្រហាយ៕
© រក្សាសិទ្ធិដោយ thmeythmey.com